ചെങ്ങന്നൂർ: ശാസ്ത്ര സാഹിത്യ പരിഷത്ത് മുൻ ജനറൽ സെക്രട്ടറിയും സാംസ്കാരിക പ്രവർത്തകനുമായ വി.കെ. ശശിധരൻ(83) അന്തരിച്ചു. ചെങ്ങന്നൂരിലെ സ്വകാര്യ ആശുപത്രിയിൽ ബുധനാഴ്ച പുലർച്ചെ 3.25-ഓടെയായിരുന്നു മരണം.
ചെങ്ങന്നൂരിൽ മകളുടെ വീട്ടിൽ വിശ്രമത്തിൽ കഴിയുകയായിരുന്ന ശശിധരന് അടുത്തിടെ കോവിഡ് ബാധിച്ചിരുന്നു. തുടർന്ന് സ്വകാര്യ ആശുപത്രിയിൽ പ്രവേശിപ്പിച്ചു. കോവിഡ് മുക്തനായിരുന്നെങ്കിലും അതേത്തുടർന്നുള്ള മറ്റ് അസുഖങ്ങളും ആരോഗ്യപ്രശ്നങ്ങളും ഉണ്ടായിരുന്നു. തുടർന്ന് അദ്ദേഹത്തെ ഐ.സി.യുവിൽ പ്രവേശിപ്പിച്ചു.
ശാസ്ത്ര സാഹിത്യ പരിഷത് കൊല്ലം ജില്ലാ പ്രസിഡന്റ്, സെക്രട്ടറി, 1977-78 വർഷങ്ങളിൽ സംസ്ഥാന ജനറൽ സെക്രട്ടറി, പ്രസിദ്ധീകരണ സമിതി കൺവീനർ, ബാലവേദി കൺവീനർ എന്നീ നിലയിൽ പ്രവർത്തിച്ചിട്ടുണ്ട്. പരിഷത് ബാലവേദികളിൽ ഒഴിച്ചുകൂടാനാവാത്തതായിരുന്നു ശശിധരന്റെ ഗാനാലാപനം. സംഗീതത്തെ ജനകീയമാക്കുന്നതിൽ വലിയ പങ്കുവഹിച്ചിട്ടുള്ള വ്യക്തി കൂടിയായിരുന്നു വി.കെ.എസ്. എന്നറിയപ്പെട്ടിരുന്ന ശശിധരൻ.
വടക്കൻ പറവൂരിൽ ജനിച്ച ശശിധരൻ, ആലുവയിലെ കോളേജിൽനിന്ന് ബിരുദം നേടി. തുടർന്ന് തിരുവനന്തപുരം എൻജിനീയറിങ് കോളേജിൽനിന്ന് എൻജിനീയറിങ് ബിരുദം കരസ്ഥമാക്കി. ശ്രീനാരായണ പോളി ടെക്നിക്കിൽ ഒൻപതുവർഷം പ്രവർത്തിച്ചു. വകുപ്പു മേധാവിയായാണ് അവിടെനിന്ന് വിരമിച്ചത്.
content highlights:vk sasidharan passes away
