കരുനാഗപ്പള്ളി > മത്സ്യബന്ധനത്തിനിടെ തൊഴിലാളികളുടെ വലയിൽകുടുങ്ങിയ തിമിംഗലത്തെ രക്ഷപ്പെടുത്തി. കഴിഞ്ഞദിവസം ആലപ്പാട്ട് നിന്നും മത്സ്യബന്ധനത്തിന് പോയ ഓംകാരം എന്ന വള്ളത്തിലെ തൊഴിലാളികളുടെ വലയിലാണ് തിമിംഗലം കുടുങ്ങിയത്.
അഴീക്കലിന് പടിഞ്ഞാറുഭാഗത്ത് ആഴക്കടലിൽ വച്ചായിരുന്നു സംഭവം. തിമിംഗലം കുടുങ്ങി എന്നറിഞ്ഞതോടെ വല വലിക്കാതെ തിമിംഗലത്തെ വലയിൽനിന്നും തൊഴിലാളികൾ രക്ഷപ്പെടുത്തുകയായിരുന്നു.
മത്സ്യബന്ധനത്തിന് ശേഷം തിങ്കളാഴ്ച കരയിലെത്തിയ തൊഴിലാളികളിൽ നിന്നും ഇവർ പകർത്തിയ ദൃശ്യങ്ങളിൽ നിന്നുമാണ് തിമിംഗലം വലയിൽ കുടുങ്ങിയതും രക്ഷപ്പെടുത്തിയതുമായ കാര്യങ്ങൾ നാട്ടുകാർ അറിയുന്നത്. കഴിഞ്ഞ 12 ന് അഴീക്കൽഭാഗത്ത് കൂറ്റൻ തിമിംഗലത്തിന്റെ മൃതദേഹം അടിഞ്ഞിരുന്നു.
