വിഷയത്തിൽ ഹൈക്കോടതി ഉന്നയിച്ച ചോദ്യങ്ങള്‍ക്ക് മറുപടി നല്‍കണമെന്നാണ് നിര്‍ദേശം. ഈ മാസം 26ന് മുൻപാണ് വിശദീകരണം നല്‍കേണ്ടത്. മോൻസൻ്റെ ഡ്രൈവറായിരുന്ന അജിത് തനിക്ക് പോലീസ് സംരക്ഷണം വേണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി പരിഗണിക്കുമ്പോഴായിരുന്നു കോടതിയുടെ പരാമര്‍ശങ്ങള്‍. കേസിൽ അജിത് സുപ്രധാനമായ വെളിപ്പെടുത്തലുകള്‍ നടത്തിയിരുന്നു.
ഏതു സാഹചര്യത്തിലാണ് മോൻസൻ്റെ കലൂരിലെയും ചേര്‍ത്തലയിലെയും വീടുകള്‍ക്ക് സംരക്ഷണം നല്‍കിയതെന്ന് കോടതി ചോദിച്ചു. കുറേയധികം വിലപിടിപ്പുള്ള സാമഗ്രികള്‍ വീടിനുള്ളിൽ ഉണ്ടെന്നായിരുന്നു മോൻസൺ പറഞ്ഞിരുന്നത്. എന്നാൽ ഇതെല്ലാം വ്യാജമാണെന്ന് ഇപ്പോള്‍ തെളിഞ്‍ഞു. ലോകത്തു കേട്ടുകേള്‍വിയില്ലാത്ത കാര്യങ്ങളാണ് മോൻസൺ പറഞ്ഞിരുന്നതെന്നും തന്‍റെ കൈവശം ആനക്കൊമ്പടക്കം ഉണ്ടെന്നായിരുന്നു അവകാശവാദമെന്നും കോടതി ചൂണ്ടിക്കാട്ടി. എന്നാൽ ഇതു സംബന്ധിച്ച് അന്വേഷണമോ പരിശോധനയോ നടത്താൻ പോലീസ് തയ്യാറായില്ല. ഈ സമയത്ത് പോലീസും ഇൻ്റലിജൻസും എവിടെയായിരുന്നുവെന്ന് ഹൈക്കോടതി ചോദിച്ചു.
Also Read:
മോൻസണെപ്പറ്റി പുറത്തു വരുന്ന വാര്‍ത്തകള്‍ കേട്ട് ജനങ്ങള്‍ പൊട്ടിച്ചിരിക്കുകയാണെന്ന് കോടതി പറഞ്ഞു. മോൻസൻ്റെ വീടിനു മുന്നിലുള്ള പോലീസിനെ കാണുമ്പോള്‍ ജനം എന്താണു കരുതേണ്ടതെന്നും കേസ് പരിഗണിച്ച ജസ്റ്റിസ്ദേവൻ രാമചന്ദ്രൻ പറഞ്ഞു. പോലീസ് സംരക്ഷണം നല്‍കിയതു വഴ മോൻസണ് വിശ്വാസ്യത കൂട്ടാനുള്ള ശ്രമമാണ് നടന്നതെന്നുംകോടതി പറഞ്ഞു.
നിരവധി പോലീസുകാര്‍ കേസിൽ ആരോപണം നേരിടുന്നുണ്ടെന്ന് കോടതി പറഞ്ഞു. ചേര്‍ത്തല സിഐ പി ശ്രീകുമാര്‍ അടക്കം പല റാങ്കിലുമുള്ള ഉദ്യോഗസ്ഥര്‍ ആരോപണവിധേയരമാണ്. ഇവരെല്ലാം സര്‍വീസിൽ തുടരുന്നുണ്ടെന്നും കോടതി ഓര്‍മപ്പെടുത്തി. ഈ സാഹചര്യത്തിൽ മോൻസണെതിരെയുള്ള ക്രൈം ബ്രാഞ്ച് അന്വേഷണം മുന്നോട്ടു കൊണ്ടുപോകുന്നതു സംബന്ധിച്ചും കോടതി സംശയം പ്രകടിപ്പിച്ചു..
Also Read:
മുൻപു തന്നെ അജിത് പോലീസ് സംരക്ഷണം ആവശ്യപ്പെട്ട് കോടതിയെ സമീപിക്കുകയും കോടതി അനൂകൂലമായി ഉത്തരവിറക്കുകയും ചെയ്തിരുന്നു. എന്നാൽ ഈ ഹര്‍ജിയിൽ പിന്നീട് ഡിജിപിയെ്ക്കൂടി കക്ഷി ചേര്‍ത്തു.
അതേസമയം, കോടികളുടെ തട്ടിപ്പ് നടത്തിയെന്ന ആരോപണം നേരിടുന്ന മോൻസൺ മാവുങ്കലിനെതിരെ അന്വേഷണം നടത്താൻ ക്രൈം ബ്രാഞ്ച് പ്രത്യേക അന്വേഷണസംഘം രൂപീകരിച്ചു. ഡിജിപി അനിൽകാന്താണ് ഇതുസംബന്ധിച്ച് ഉത്തരവിട്ടത്. തിരുവനന്തപുരം റേഞ്ച് ഐജി സ്പര്‍ജൻ കുമാറിൻ്റെ നേതൃത്വത്തിലുള്ള സംഘമാണ് കേസ് അന്വേഷിക്കുക. ഐജി എസ് ശ്രീജിത്തിനാണ് മേൽനോട്ട ചുമതല.
