മുകുന്ദനുമായുള്ള കൂടിക്കാഴ്ചയുടെ വിവരങ്ങൾ വ്യക്തമാക്കാൻ സുരേഷ് ഗോപി തയ്യാറായില്ല. കൂടിക്കാഴ്ചയിൽ സംഘടനാ കാര്യങ്ങൾ ചർച്ചയായില്ലെന്നും ബിജെപി സംസ്ഥാന അധ്യക്ഷനാകാനില്ലെന്ന് മുൻപ് തന്നെ വ്യക്തമാക്കിയതാണെന്നും അദ്ദേഹം പറഞ്ഞു. സംസ്ഥാന അധ്യക്ഷ പദവിയിൽ നിന്ന് കെ സുരേന്ദ്രനെ മാറ്റി പകരം പുതിയ ആളെ കൊണ്ടുവരാനാണ് ബിജെപിയുടെ പദ്ധതി. ഇക്കാര്യത്തിൽ പ്രഥമ പരിഗണന സുരേഷ് ഗോപിയ്ക്കാണെന്നാണ് മാധ്യമ റിപ്പോർട്ടുകൾ.
കേരള ബിജെപി ഘടകത്തിൽ അടിമുടി മാറ്റമുണ്ടാകുമെന്ന വാർത്തകൾ പുറത്തുവന്നതോടെയാണ് ബിജെപി സംസ്ഥാന അധ്യക്ഷ സ്ഥാനത്തേക്ക് സുരേഷ് ഗോപിയെ ദേശീയ നേതൃത്വം പരിഗണിച്ചേക്കുമെന്ന വാർത്തകൾ പുറത്തുവന്നത്. എന്നാൽ, സംസ്ഥാന അധ്യക്ഷനാകാനില്ലെന്ന നിലപാടിൽ തുടരുകയാണ് അദ്ദേഹം. സുരേഷ് ഗോപി എതിർപ്പ് പ്രകടിപ്പിക്കുന്നുണ്ടെങ്കിലും അന്തിമ തീരുമാനം കേന്ദ്ര നേതൃത്വം സ്വീകരിക്കുമെന്നാണ് റിപ്പോർട്ട്.
നിലവിലെ സംസ്ഥാന അധ്യക്ഷൻ കെ സുരേന്ദ്രനോട് ദേശീയ നേതൃത്വത്തിന് അനുകൂല നിലപാടല്ല ഉള്ളതെന്നാണ് സൂചനകൾ. നിയമസഭാ തെരഞ്ഞെടുപ്പിലെ കനത്ത പരാജയത്തിനൊപ്പം പാർട്ടിയെ പ്രതിസന്ധിയിലാക്കിയ കൊടകര കുഴൽപ്പണക്കേസാണ് സുരേന്ദ്രന് തിരിച്ചടിയായത്. സംസ്ഥാന അധ്യക്ഷ സ്ഥാനത്ത് ഒരു വർഷത്തിലേറെ കാലാവധിയുള്ളപ്പോൾ സുരേന്ദ്രനെ മാറ്റിയാൽ കേസുകളിൽ സുരേന്ദ്രന് പങ്കുണ്ടെന്ന വ്യാഖ്യാനമുണ്ടാകുമെന്ന വിലയിരുത്തലും ബിജെപി നേതൃത്വത്തിനുണ്ട്.
സംസ്ഥാന അധ്യക്ഷ സ്ഥാനത്തേക്ക് സുരേഷ് ഗോപി എം പി, ഹിന്ദു ഐക്യവേദി സംസ്ഥാന അധ്യക്ഷൻ വത്സൻ തില്ലങ്കേരി എന്നിവരുടെ പേരുകളാണ് പ്രധാനമായും ഉയർന്ന് കേൾക്കുന്നത്. സംസ്ഥാന അധ്യക്ഷനാകാനില്ലെന്ന് സുരേഷ് ഗോപി വ്യക്തമാക്കിയതോടെ വത്സൻ തില്ലങ്കേരിയുടെ നിലപാട് നിർണായകമാണ്. നിലവിൽ ഹിന്ദു ഐക്യവേദിയിലാണ് തൻ്റെ പ്രവർത്തനമെന്നും അതിനാൽ തന്നെ അധ്യക്ഷാനാകാൻ തയ്യാറായിട്ടില്ലെന്നും വത്സൻ തില്ലങ്കേരി പറഞ്ഞിരുന്നു. സജീവരാഷ്ട്രീയം ഇപ്പോൾ പരിഗണനയിലില്ലെന്നും അദ്ദേഹം വ്യക്തമാക്കി. സുരേഷ് ഗോപിയെയും വത്സൻ തില്ലങ്കേരിയെയും ഒഴിവാക്കിയാൽ സാധ്യതയുള്ള മറ്റൊരു പേര് കഴിഞ്ഞതവണ അധ്യക്ഷ സ്ഥാനത്തേക്ക് പരിഗണിച്ച എം ടി രമേശിൻ്റേതാണ്.
സുരേന്ദ്രനെ പ്രതിരോധത്തിലാക്കുന്ന കുഴൽപ്പണ വിവാദത്തിൽ കേന്ദ്ര നേതൃത്വത്തോട് പ്രദേശിക തലത്തിൽ എതിർപ്പുണ്ട്. ദേശീയ നേതൃത്വത്തിന് നൽകിയ റിപ്പോർട്ടിൽ ഇക്കാര്യം പറയുന്നുണ്ട്. സംസ്ഥാന നേതൃത്വത്തോടുള്ള വിശ്വാസ്യത ആർഎസ്എസ് നേതാക്കൾക്ക് നഷ്ടപ്പെടുകയും ചെയ്തു. അതിനാല് അവരേക്കൂടി വിശ്വാസത്തിലെടുത്തുള്ള തീരുമാനമാണ് കേന്ദ്രനേതൃത്വത്തിൻ്റെ ഭാഗത്ത് നിന്നും ഉണ്ടാകുക. ഈ സാഹചര്യത്തിലാണ് സംസ്ഥാന അധ്യക്ഷസ്ഥാനത്തേക്ക് നിഷ്പക്ഷനായ ഒരാളെ തേടാൻ ബിജെപി കേന്ദ്ര നേതൃത്വവും ആർഎസ്എസും നീക്കം നടത്തുന്നത്.
