കാടകം (കാസര്കോട്) > കാടകത്ത് കാട്ടുപന്നിയുടെ ആക്രമണത്തില് കര്ഷകന് മരിച്ചു. കാവുങാലിലെ പി കുഞ്ഞമ്പു നായരാണ് (60) മരിച്ചത്. റോഡ് മുറിച്ചു കടന്ന കാട്ടുപന്നി കുഞ്ഞമ്പു ഓടിച്ച ഇരുചക്രവാഹനത്തില് ഇടിക്കുകയായിരുന്നു. ശനിയാഴ്ച രാവിലെ ചെര്ക്കള ജാല്സൂര് റോഡില് കര്മംതോടി ബാളക്കണ്ടത്ത് വെച്ചാണ് സംഭവം.
വാഹനത്തില് ഇടിച്ച പന്നി തത്സമയം ചത്തു. ഇടിയുടെ ആഘാതത്തില് സ്കൂട്ടറില് നിന്ന് തെറിച്ചു വീണ കുഞ്ഞമ്പു നായര്ക്ക് തലയ്ക്ക് ഗുരുതര പരിക്കേറ്റു. ഉടന് മുള്ളേരിയ സഹകരണ മെഡിക്കല് സെന്ററില് എത്തിച്ചെങ്കിലും പിന്നീട് മംഗളുരു സ്വകാര്യ ആശുപത്രിയിലേക്ക് മാറ്റി. ശനിയാഴ്ച ഉച്ചയ്ക്കാണ് മരണം. മംഗളുരു ആശുപത്രിയില് ഞായറാഴ്ച മൃതദേഹം പോസ്റ്റ്മോര്ട്ടം ചെയ്ത ശേഷം കാസര്കോട്ടേക്ക് കൊണ്ടുവരും.
