‘മോൺസണുമായുള്ള കോടികളുടെ ബിസിനസ് ബന്ധം’; പ്രതികരണം അർഹികുന്നില്ലെന്ന് ചെന്നിത്തല

പത്തനംതിട്ട: മോൻസൺ മാവുങ്കലുമായി തനിക്ക് കോടികളുടെ ബന്ധമുണ്ടെന്ന ആരോപണം തള്ളി . മാന്യമായി രാഷ്ട്രീയ പ്രവർത്തനം നടത്തുന്നവരെ ആക്ഷേപിക്കുന്ന രീതി പതിവാണ്. ആരെങ്കിലും എന്തെങ്കിലും പറയുന്നതിനോട് പ്രതികരിക്കാനില്ലെന്നും ചെന്നിത്തല പറഞ്ഞു. പ്രവാസി വനിത അനിത പുല്ലയിൽ ഉന്നയിച്ച ആരോപണങ്ങൾക്ക് മറുപടി പറയുകയായിരുന്നു അദ്ദേഹം.

അതേസമയം സ്വന്തം മണ്ഡലത്തിലെ സ്ഥാനാർത്ഥി തോറ്റാലും സംസ്ഥാനത്ത് ഭരണം കിട്ടുമെന്ന് പലരും കരുതി. സംസ്ഥാനത്തെ എല്ലാവരും അങ്ങനെ വിചാരിച്ചപ്പോൾ എല്ലായിടത്തും തോറ്റെന്നും ചെന്നിത്തല പറഞ്ഞു. കോൺഗ്രസ് നേതാവാണെന്നു പറഞ്ഞ് ഖദറിട്ട് നടന്നാൽ പോര. ആത്മാർത്ഥതയും സത്യസന്ധതയും പുലർത്തണമെന്നും അദ്ദേഹം വ്യക്തമാക്കി. പത്തനംതിട്ടയിൽ കോൺഗ്രസ് യൂണിറ്റ് കമ്മിറ്റി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഏഷ്യാനെറ്റ് റിപ്പോർട്ട് ചെയ്തു.

താൻ പാർട്ടി സ്ഥാനങ്ങൾ രാജിവെച്ചത് സംഘടനാ പ്രശ്നങ്ങൾകൊണ്ടല്ല. കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ രാജിവെച്ചപ്പോൾതന്നെ രാജിവെക്കാൻ തീരുമാനിച്ചതാണ്. മൂന്ന് മാസങ്ങൾക്കു മുമ്പ് രാജി സമർപ്പിച്ചതാണെന്നും അദ്ദേഹം പറഞ്ഞു. കെ സുധാകരനെതിരെ നടക്കുന്ന അന്വേഷണം രാഷ്ട്രീയ പ്രേരിതമാണെന്നും ചെന്നിത്തല പറഞ്ഞു. ഇടത് തുടർഭരണം കൊവിഡിന്റെ കുഞ്ഞാണെന്നും അദ്ദേഹം പ്രതികരിച്ചു.

നിയമസഭാ തെരഞ്ഞെടുപ്പിൽ കനത്ത തോൽവി നേരിട്ടെന്ന മുസ്ലിം ലീഗിന്റെ വിമർശനത്തോടും ചെന്നിത്തല പ്രതികരിച്ചു. ഉന്നയിച്ച വിമർശനം സദുദ്ദേശപരമാണ്. യുഡിഎഫിന്റെ തിരിച്ചുവരവ് ആഗ്രഹിക്കുന്നതുകൊണ്ടാണ് വിമർശനം ഉന്നയിക്കുന്നത്. നിലവിൽ നേതൃത്വവുമായി യോജിച്ചാണ് പോകുന്നതെന്നും ചെന്നിത്തല പറഞ്ഞു.

അതേസമയം, മുസ്ലിം ലീഗ് പരാജയപ്പെട്ട 12 മണ്ഡലങ്ങളിലും പരാജയത്തിന്റെ കാരണം കണ്ടെത്താൻ പുതിയ കമ്മിറ്റികൾ രൂപീകരിക്കാൻ ധാരണയായി. കഠിനാധ്വാനത്തിലൂടെ ലീഗിന് തിരിച്ചു വരാൻ കഴിയുമെന്ന് മുസ്ലിം ലീഗ് പ്രവർത്തക സമിതി വിലയിരുത്തി. എന്നാൽ യുഡിഎഫിന്റെ മടങ്ങിവരവിൽ സമിതി ആശങ്ക പ്രകടിപ്പിച്ചു.