അത് ആനക്കൊമ്പല്ല, ഒട്ടകത്തിൻ്റെ എല്ലെന്ന് സംശയം! മോൻസൻ്റെ വീട്ടിലെ നെയിം ബോർഡുകളും നീക്കി

കൊച്ചി: മോൻസൺ മാവുങ്കലിൻ്റെ കലൂരിലെ വീട്ടിലുണ്ടായിരുന്ന വ്യാജമാണെന്ന് കണ്ടെത്തി. വനം വകുപ്പിൻ്റെ പരിശോധനയിലാണ് കണ്ടെത്തൽ. ഇത് ഒട്ടകത്തിൻ്റെ എല്ലാണോ എന്ന് സംശയിക്കുന്നതായി വനം വകുപ്പ് അറിയിച്ചു. ഒട്ടകത്തിൻ്റെ എല്ല് രൂപമാറ്റം വരുത്തി പോളിഷ് ചെയ്തതാണോ എന്ന സംശയത്തെ തുടർന്ന് പരിശോധനയ്ക്കയക്കാൻ വനം വകുപ്പ് തീരുമാനിച്ചു. കൂടുതൽ പരിശോധനയ്ക്കായി രാജീവ് ഗാന്ധി സെൻ്റർ ഫോർ ബയോടെക്നോളജീസിലേക്ക് അയക്കും.

അതോടൊപ്പം കലൂരിലെ മ്യൂസിയത്തിൽ നിന്നും കണ്ടെടുത്ത ചന്ദന ശിൽപ്പങ്ങളും വ്യാജമാണെന്ന് തിരിച്ചറിഞ്ഞു. ഏതാനും ശംഖുകളും മോൻസൻ്റെ വീട്ടിൽ നിന്നും കണ്ടെടുത്തിട്ടുണ്ട്. മോൻസൺ മാവുങ്കലിൻ്റെ പക്കലുള്ള വിശ്വരൂപമടക്കമുള്ള ശിൽപ്പങ്ങൾ തൻ്റേതാണെന്ന് തിരുവനന്തപുരത്തെ ശിൽപ്പി സുരേഷ് വെളിപ്പെടുത്തി. മോൻസൺ തനിക്ക് 75 ലക്ഷം രൂപ നൽകാനുണ്ടെന്നും ഇനി ഈ പണം കിട്ടുമെന്ന പ്രതീക്ഷയില്ലെന്നും അദ്ദേഹം പറഞ്ഞു. ദീർഘകാലം വിദേശത്തായിരുന്നു സുരേഷ്. ശിൽപ്പ നിർമ്മാണ പാരമ്പര്യമുള്ള കുടുംബാംഗമാണ്. വർഷങ്ങളോളം അധ്വാനിച്ചാണ് ശിൽപ്പങ്ങൾ ഉണ്ടാക്കിയതെന്നും അദ്ദേഹം പറഞ്ഞു.

താൻ നിർമ്മിച്ച ശിൽപ്പങ്ങളാണ് പുരാതന ശിൽപങ്ങളായി മോൻസൺ പ്രചരിപ്പിച്ചതെന്ന് സുരേഷ് പറഞ്ഞു. കുമ്പിൾ തടിയിൽ നിർമ്മിച്ച ശിൽപ്പങ്ങളാണിവ. ഇവയാണ് ചന്ദനമരത്തിൽ തീർത്ത ശിൽപ്പങ്ങളെന്ന് പറഞ്ഞ് പറ്റിച്ചത്. മോൻസനെതിരെ ശിൽപ്പി സുരേഷ് ക്രൈം ബ്രാഞ്ചിന് മൊഴി നൽകിയിട്ടുണ്ട്.

അതേ സമയം മോൻസൻ്റെ കലൂരിലെയും ചേർത്തലയിലെയും വീടുകളിൽ വനം വകുപ്പ്, മോട്ടോർ വാഹന വകുപ്പ്, ക്രൈം ബ്രാഞ്ച് സംഘങ്ങൾ പരിശോധന നടത്തി. ഇയാളുടെ കൈവശമുള്ള ആഡംബര വാഹനങ്ങളുടെ രജിസ്ട്രേഷൻ നമ്പറും ഉടമസ്ഥത തെളിയിക്കുന്ന രേഖകളും പരിശോധിക്കുന്നതിനായിരുന്നു മോട്ടോർ വാഹന വകുപ്പുദ്യോഗസ്ഥർ എത്തിയത്‌. അറസ്റ്റ് ചെയ്ത വേളയില്‍തന്നെ കലൂരിലെ ഇയാളുടെ വീട്ടിലുള്‍പ്പെടെ എത്തിച്ച് തെളിവെടുപ്പ് നടത്തിയതിനാല്‍ കസ്റ്റഡിയിലുണ്ടായിരുന്നിട്ടും മോന്‍സനുമായി ക്രൈം ബ്രാഞ്ചിൻ്റെ തെളിവെടുപ്പ് ഉണ്ടായില്ല. മോൻസൻ്റെ വീടിനു മുന്നിലുള്ള നെയിം ബോർഡുകളെല്ലാം ക്രൈം ബ്രാഞ്ച് നീക്കം ചെയ്തിട്ടുണ്ട്.

മൂന് ദിവസത്തേ കസ്റ്റഡി ഇന്ന് അവസാനിക്കുന്നതിനാൽ മോൺസനെ കോടതിയിൽ ഹാജരാക്കും. വിശദമായി ചോദ്യം ചെയ്തശേഷമാണ് അന്വേഷണ സംഘം മോന്‍സനെ കോടതിയില്‍ ഹാജരാക്കുന്നത്. മൂന്ന് ദിവസത്തിനുള്ളില്‍ പരമാവധി കാര്യങ്ങള്‍ ഇയാളില്‍ നിന്ന് ചോദിച്ചറിയാനായിട്ടുണ്ടെന്നാണ് ക്രൈം ബ്രാഞ്ച് പറയുന്നത്. അതിനാല്‍ കസ്റ്റഡി നീട്ടി ചോദിക്കേണ്ടതില്ലെന്നാണ് അന്വേഷണ സംഘത്തിന്‍റെ നിലപാട്. എന്നാല്‍ ഭൂമി തട്ടിപ്പുമായി ബന്ധപ്പെട്ട് പാലാ സ്വദേശി രാജീവ് നല്‍കിയ പരാതിയില്‍ ക്രൈം ബ്രാഞ്ച് ജയിലിലെത്തി മോന്‍സന്‍റെ അറസ്റ്റ് രേഖപ്പെടുത്തിയിരുന്നു. ഇതിന്‍റെ തുടര്‍നടപടിയെന്ന നിലയില്‍ പിന്നീട് കസ്റ്റഡിയില്‍ വാങ്ങാനാണ് ക്രൈം ബ്രാഞ്ചിന്‍റെ തീരുമാനം.

എറണാകുളം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫോളോ ചെയ്യൂഎറണാകുളം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫോളോ ചെയ്യൂ