ദുബായ്
ഓപ്പണർമാർ ഒരുക്കിയ മികച്ച തുടക്കം രാജസ്ഥാൻ റോയൽസ് ബാറ്റർമാർക്ക് തുടരാനായില്ല. ബാംഗ്ലൂർ റോയൽ ചലഞ്ചേഴ്സിനെതിരെ ഒമ്പത് വിക്കറ്റ് നഷ്ടത്തിൽ 149 റണ്ണെടുത്തു രാജസ്ഥാൻ.
എവിൻ ലൂയിസും (37 പന്തിൽ 58) യശ്വസി ജെയ്സ്വാളും (22 പന്തിൽ 31) ചേർന്ന് 77 റണ്ണിന്റെ കൂട്ടുകെട്ട് പടുത്തുയർത്തിയെങ്കിലും പിന്നാലെ എത്തിയവർ പരാജയപ്പെട്ടു. ബാംഗ്ലൂരിനായി ഹർഷൽ പട്ടേൽ മൂന്നും യുസ്വേന്ദ്ര ചഹാലും ഷഹബാസ് അഹമ്മദും രണ്ടുവീതം വിക്കറ്റും നേടി.
പത്തോവറിൽ ഒന്നിന് 91 എന്ന നിലയിലായിരുന്നു രാജസ്ഥാൻ. ലൂയിസും ജെയ്സ്വാളും അടിച്ചുതകർത്തു. ലൂയിസ് മൂന്ന് സിക്സറും അഞ്ച് ബൗണ്ടറിയും പറത്തിയപ്പോൾ ജെയ്സ്വാൾ രണ്ട് സിക്സും മൂന്ന് ഫോറും നേടി.
ഇരുവരും പുറത്തായശേഷമെത്തിയ ആർക്കും പിടിച്ചുനിൽക്കാനായില്ല. സഞ്ജു സാംസൺ (15 പന്തിൽ 19), ലിയാം ലിവിങ്സ്റ്റോൺ (6) എന്നിവരെല്ലാം വേഗം കീഴടങ്ങി.
