ഭീമമായ പ്രവേശന ഫീസും ദ്വീപിൽ കുറഞ്ഞത് രണ്ട് മാസവും താങ്ങാൻ കഴിയുന്ന യാത്രക്കാർക്ക് മാത്രമാണ് മോണ്ട്സെറാത്ത് തുറന്നിരിക്കുന്നത്. ദ്വീപിലേക്ക് വരാനാഗ്രഹിക്കുന്ന വിനോദസഞ്ചാരികൾക്ക് പ്രതിവർഷം 70,000 ഡോളർ (50 ലക്ഷത്തിൽ കൂടുതൽ) വരുമാനം ഉണ്ടായിരിക്കണമെന്നാണ് വ്യവസ്ഥ. ന്യൂയോർക്ക് ടൈംസിന്റെ റിപ്പോർട്ട് അനുസരിച്ച് ഏപ്രിൽ മുതൽ ഇതുവരെ 7 സമ്പന്ന കുടുംബങ്ങളിൽ നിന്നുള്ള 21 പേർ മാത്രമാണ് ദ്വീപിലേക്ക് പ്രവേശിക്കാൻ യോഗ്യത നേടിയത്.
33 കോവിഡ് -19 കേസുകൾ മാത്രമേ സെപ്റ്റംബർ വരെ ദ്വീപിൽ റിപ്പോർട്ട് ചെയ്തിട്ടുള്ളൂ. അതുകൊണ്ട് തന്നെ മാസ്ക് ധരിക്കുന്നത് ഒരു നിർബന്ധമല്ല എന്ന് യൂറോ ന്യൂസ് റിപ്പോർട്ട് ചെയ്യുന്നു. ദ്വീപിലെ അയ്യായിരത്തോളം വരുന്ന താമസക്കാരെ സംരക്ഷിക്കുന്നതിനായി, വാക്‌സിൻ എടുത്തതും എടുക്കാത്തതുമായ യാത്രക്കാർ എല്ലാവരും രണ്ടാഴ്ചത്തേക്ക് ക്വാറന്റൈനിൽ കഴിയണം. ഇതിനുള്ള പണം യാത്രക്കാർ തന്നെ കണ്ടെത്തണം. ഇതാണ് നല്ല പണക്കാർക്ക് മാത്രം പ്രവേശനം അനുവദിക്കുന്നതിന് പിന്നിലെ ഗുട്ടൻസ്.
