മുട്ട്ലു വീട്ടിൽ എത്തിയിട്ടില്ല എന്ന് മനസിലായതോടെ കുറച്ച് സമയത്തിന് ശേഷം കൂട്ടുകാർ തിരച്ചിൽ ആരംഭിച്ചു. കാട്ടിലാണ് മദ്യ സൽക്കാരം നടന്നത് എന്നതിനാൽ ഏതെങ്കിലും വന്യജീവികൾ മുട്ട്ലുവിനെ പിടിച്ചുകൊണ്ടുപോയിക്കാണുമോ എന്ന പേടിയിലാണ് കൂട്ടുകാർ തിരഞ്ഞിറങ്ങിയത്. മുട്ട്ലുവിനെ കാണാതായതോടെ പോലീസിനെ അറിയിച്ചു. ബർസ മേഖലയിൽ നിന്നുള്ള നിരവധി ടീമുകൾ നടത്തിയ തിരച്ചിലും രക്ഷാപ്രവർത്തനവുമാണ് പിന്നീട് നടന്നത്.
മുട്ട്ലുവിന്റെ അയൽവാസികളും നാട്ടുകാരുമെല്ലാം തിരച്ചിലിൽ പങ്കെടുത്തു. വനത്തിനുള്ളിൽ രക്ഷാപ്രവർത്തകർ മുട്ട്ലുവിന്റെ പേര് ആവർത്തിച്ച് വിളിച്ചതായി പ്രാദേശിക മാധ്യമമായ എൻടിവി റിപ്പോർട്ട് ചെയ്തു. അതിനിടെ തിരച്ചിൽ സംഘത്തിലെ ഒരാൾ ചോദിച്ചു,”നിങ്ങൾ ആരെയാണ് അന്വേഷിക്കുന്നത്? ഞാൻ ഇവിടെയുണ്ട്”. ചോദിച്ചത് ആരെന്നോ? സാക്ഷാൽ ബഹാൻ മുട്ട്ലു.
വിശ്വസിച്ചാലും ഇല്ലെങ്കിലും, കാണാതായ തന്നെ തിരയാനുള്ള സംഘത്തിൽ ബഹാൻ മുട്ട്ലുവും കൂടിയിരുന്നു. ബെയ്ഹാൻ ഇത്രയും സമയവും തങ്ങളോടൊപ്പമുണ്ടെന്നറിഞ്ഞ തിരച്ചിൽ, രക്ഷാപ്രവർത്തക സംഘത്തിലെ എല്ലാവരും ഞെട്ടിപ്പോയെന്ന് പ്രത്യേകം പറയേണ്ടതില്ലല്ലോ. തന്നെ കാണാനില്ലെന്ന് സുഹൃത്തുക്കൾ പോലീസിൽ അറിയിച്ചതായി മുട്ട്ലുവിന് അറിവില്ലായിരുന്നു. എല്ലാവരും ഒരാളെ തേടിയിറങ്ങിയിരിക്കുന്നു എന്ന് മനസ്സിലാക്കിയ ബഹാൻ മുട്ട്ലു തിരച്ചിലിൽ കൂടെക്കൂടുകയായിരുന്നു.
അതെ സമയം വീട്ടിലെത്താതെ എവിടെയായിരുന്നു എന്ന ചോദ്യത്തിന് ബഹാൻ മുട്ട്ലുവിന് മറുപടിയില്ല. എവിടെയോ വീണുറങ്ങിപോയി എന്നാണ് കരുതുന്നത്.
