ടൂറിൻ
ചാമ്പ്യൻസ് ലീഗിൽ നിലവിലെ ചാമ്പ്യൻമാരായ ചെൽസി ഇന്ന് യുവന്റസിനോട്. ഗ്രൂപ്പ് എച്ചിൽ ഇരുടീമുകളും ഓരോ കളി ജയിച്ചു. ഗ്രൂപ്പ് എഫിൽ മാഞ്ചസ്റ്റർ യുണെെറ്റഡിന് വിയ്യാറയലാണ് എതിരാളികൾ. ഗ്രൂപ്പ് ഇയിൽ ബാഴ്സലോണ ബെൻഫിക്കയെയും ബയേൺ മ്യൂണിക്ക് ഡെെനാമോ കീവിനെയും നേരിടും.
ചെൽസിയെ നേരിടാനിറങ്ങുന്ന യുവന്റസിന് മുന്നേറ്റക്കാരുടെ പരിക്കാണ് ആശങ്ക. ഇറ്റാലിയൻ ലീഗിൽ സാമ്പ്ദോറിയക്കെതിരായ കളിക്കിടെ പരിക്കേറ്റ പൗലോ ഡിബാല കളിക്കില്ല. മറ്റൊരു മുന്നേറ്റതാരം അൽവാരോ മൊറാട്ടയും ഇറങ്ങില്ല.
തുടക്കത്തിലെ തകർച്ചയ്ക്കുശേഷം ലീഗിൽ തിരിച്ചുവരവിന്റെ പാതയിലാണ് യുവന്റസ്. അവസാന രണ്ട് മത്സരങ്ങളും ജയിച്ചു. ചാമ്പ്യൻസ് ലീഗ് ആദ്യ കളിയിൽ മാൽമോയെ മൂന്ന് ഗോളിന് തകർത്തു.
സെനിത്തിനെ ഒരു ഗോളിന് തോൽപ്പിച്ചായിരുന്നു ചെൽസിയുടെ തുടക്കം. എന്നാൽ ഇംഗ്ലീഷ് പ്രീമിയർ ലീഗിൽ അവസാനകളി തോറ്റു. മാഞ്ചസ്റ്റർ സിറ്റിയോട് സ്വന്തം തട്ടകത്തിലാണ് തോൽവി വഴങ്ങിയത്. മികച്ച ഗോളടിക്കാരില്ലാത്തതാണ് ചെൽസിക്ക് വിനയാകുന്നത്.
ഗ്രൂപ്പ് എഫിലെ ആദ്യ കളിയിൽ യങ് ബോയ്സിനോട് തോറ്റ യുണെെറ്റഡിന് വിയ്യാറയലിനെതിരെ നിർണായകമാണ്. കാര്യങ്ങൾ എളുപ്പമല്ല യുണെെറ്റഡിന്. ഇംഗ്ലീഷ് ലീഗ് കപ്പിനുപിന്നാലെ പ്രീമിയർ ലീഗിലെ അവസാനകളിയിൽ ആസ്റ്റൺ വില്ലയോടും തോറ്റു. സൂപ്പർതാരം ക്രിസ്റ്റ്യാനോ റൊണാൾഡോയാണ് യുണെെറ്റഡിന്റെ കുന്തമുന. യങ് ബോയ്സിനെതിരെയും റൊണാൾഡോ ഗോളടിച്ചിരുന്നു.
മറ്റൊരു മത്സരത്തിൽ യങ് ബോയ്സ് അറ്റ്-ലാന്റയെ നേരിടും. ആദ്യ കളിയിൽ അറ്റ്-ലാന്റ വിയ്യാറയലുമായി സമനിലയിൽ പിരിഞ്ഞു. ഗ്രൂപ്പ് ഇയിൽ ബയേണിനോട് തകർന്നടിഞ്ഞ ബാഴ്സ ബെൻഫിക്കയ്ക്കെതിരെ മികച്ച ജയമാണ് പ്രതീക്ഷിക്കുന്നത്. സ്പാനിഷ് ലീഗിൽ അവസാനകളിയിൽ ലെവന്റെയെ മൂന്ന് ഗോളിന് തകർത്ത് ആത്മവിശ്വാസം വീണ്ടെടുത്തിട്ടുണ്ട് ബാഴ്സ. പരിക്കുമാറി യുവതാരം അൻസു ഫാറ്റി കളത്തിലെത്തിയത് ബാഴ്സയ്ക്ക് ഊർജമാണ്. 10–-ാംനമ്പർ കുപ്പായത്തിൽ ഗോളും നേടി അൻസു. ബാഴ്സയെ ആദ്യ കളിയിൽ മൂന്ന് ഗോളിന് തകർത്ത ബയേൺ കുതിപ്പ് തുടരാൻ ഡെെനാമോയ്ക്കെതിരെ ഇറങ്ങുന്നു.
