കേരളത്തിലെ സംഘടനാ പ്രശ്നങ്ങളിൽ ഹൈക്കമാൻഡ് ഇടപെടാത്തതിൻൽ അതൃപ്തി സുധീരൻ പലപ്രാവശ്യം അതൃപ്തി രേഖപ്പെടുത്തിയിരുന്നു. എന്നാൽ ഹൈക്കമാൻഡ് ഇടപെടൽ നടത്താതെ വന്നതോടെയാണ് രാജിയിലേക്ക് നീങ്ങിയതെന്ന് കത്തിൽ സുധീരൻ വ്യക്തമാക്കുന്നുണ്ടെന്നാണ് റിപ്പോർട്ട്. അതേസമയം, സുധീരനുമായി കൂടിക്കാഴ്ച നടത്താൻ കേരളത്തിൻ്റെ ചുമതലയുള്ള എഐസിസി ജനറൽ സെക്രട്ടറി താരിഖ് അൻവറിന് ഹൈക്കമാൻഡ് നിർദേശം നൽകി.
സംസ്ഥാന നേതൃത്വം കൂടിയാലോചനകൾ നടത്താതെ ഏകപക്ഷീയമായ തീരുമാനങ്ങൾ സ്വീകരിക്കുകയാണെന്ന പരാതിയാണ് സുധീരനുള്ളത്. സംസ്ഥാന കോൺഗ്രസിൽ നേതൃമാറ്റം ഉണ്ടായെങ്കിലും പ്രതീക്ഷിച്ച ഗുണം ലഭിച്ചില്ലെന്നും സുധീരൻ വ്യക്തമാക്കുന്നുണ്ട്. കെപിസിസി രാഷ്ട്രീയകാര്യ സമിതിയിൽ നിന്നും രാജിവച്ച സുധീരനെ അനുനയിപ്പിക്കാനുള്ള ശ്രമങ്ങൾ കോൺഗ്രസ് നേതൃത്വത്തിൻ്റെ ഭാഗത്ത് നിന്നും തുടരുന്നതിടെയാണ് അദ്ദേഹം എഐസിസി അംഗത്വവും രാജിവച്ചത്.
എ ഐ സി സി നേതൃത്വവും തന്നെ അവഗണിച്ചുവെന്ന പരാതി സുധീരനുണ്ട്. കെപിസിസി പുനഃസംഘടനയുമായി ബന്ധപ്പെട്ട പല വിഷയങ്ങളിലും സുധീരന് കെപിസിസി നേതൃത്വവുമായി എതിർപ്പുണ്ടായിരുന്നു. എന്നാൽ എ, ഐ ഗ്രൂപ്പുകൾ എതിർപ്പുമായി രംഗത്തുവന്നതോടെയാണ് കൂടുതൽ പ്രതികരണം നടത്തേണ്ടെന്ന നിലപാടിലേക്ക് സുധീരൻ എത്തിയത്. കെപിസിസി പുനഃസംഘടനാ ചർച്ചകൾ അന്തിമഘട്ടത്തിലെത്തി നിൽക്കെ സുധീരൻ്റെ രാജിയുണ്ടായത് സംസ്ഥാന കോൺഗ്രസിനെ വൻ പ്രതിസന്ധിയിലാക്കി.
സുധീരനെ അനുനയിപ്പിക്കുന്നതി സംസ്ഥാന നേതൃത്വത്തിൽ രണ്ട് നിലപാടാണുള്ളത്. പുനഃസംഘടനയിൽ കൂടിയാലോചനകൾ നടക്കുന്നില്ലെന്ന സുധീരൻ്റെ പരാതി അംഗീകരിച്ച് പ്രതിപക്ഷ നേതാവ് വി ഡി സതീശൻ ക്ഷമാപണം നടത്തിയിരുന്നു. എന്നാൽ സതീശൻ നടത്തിയ പരാമർശത്തിലും വീട്ടിലെത്തി സുധീരനെ കണ്ടതിലും കെപിസിപി പ്രസിഡൻ്റ് കെ സുധാകരന് അതൃപ്തിയുണ്ട്.
സുധീരനോട് താൻ അഭിപ്രായങ്ങൾ ചോദിച്ചിരുന്നുവെങ്കിലും എന്നാൽ ആ അവസരങ്ങളൊന്നും അദ്ദേഹം വിനിയോഗിച്ചില്ലെന്ന് സുധാകരൻ കഴിഞ്ഞ ദിവസം പറഞ്ഞിരുന്നു. “എല്ലാ വിഷയങ്ങളും രാഷ്ട്രീയ കാര്യ സമിതിയിൽ ചർച്ച ചെയ്യേണ്ട ആവശ്യമില്ല. കെപിസിസിക്ക് തെറ്റുപറ്റിയാൽ എഐസിസി തിരുത്തും. എഐസിസിയുടെ അനുവാദത്തോടെയാണ് എല്ലാം ചെയ്യുന്നത്. തെറ്റ് ചൂണ്ടിക്കാട്ടിയാൽ തിരുത്താൻ തയ്യാറാണ്”- എന്നും അദ്ദേഹം വ്യക്തമാക്കി. നേതൃത്വത്തിന് വീഴ്ച പറ്റിയെന്ന സതീശന്റെ പ്രസ്താവനയോടും സുധാകരൻ അതൃപ്തി രേഖപ്പെടുത്തി.
രാഷ്ട്രീയകാര്യ സമിതിയിൽ നിന്നും രാജിവച്ചതിന് പിന്നാലെ സുധീരനുമായി ചർച്ചകൾ നടത്തുന്നുണ്ടോ എന്ന ചോദ്യം തന്നെ അപ്രസക്തമാണെന്നാണ് സുധാകരൻ പ്രതികരിച്ചത്. “ചർച്ച നടത്തും. നടത്തണമല്ലോ, അദ്ദേഹം പാർട്ടിയുടെ സീനിയർ ലീഡറാണ്. അദ്ദേഹം രാജിവെച്ചത് ഏത് സാഹചര്യത്തിലായാലും അത് പിൻവലിക്കണമെന്ന് കെപിസിസി നേതൃത്വം ആവശ്യപ്പെടും. അദ്ദേഹത്തെ ഇക്കാര്യം നേരിട്ട് അറിയിക്കും. അദ്ദേഹത്തിന് എന്തെങ്കിലും അഭിപ്രായ വ്യത്യാസം ഉണ്ടെങ്കിൽ കേൾക്കും. അത് പരിഹരിക്കാൻ സാധിക്കുന്നതാണെങ്കിൽ പരിഹരിക്കും. അദ്ദേഹത്തെ ഉൾക്കൊണ്ട് പോകണമെന്ന് തന്നെയാണ് എക്കാലത്തും കോൺഗ്രസും കെപിസിസിയും ആഗ്രഹിക്കുന്നത്” – എന്നും സുധാകരൻ പറഞ്ഞിരുന്നു.
