സ്കൂള്‍ ബസുകള്‍ ലഭ്യമാക്കാനായി ജനപ്രതിനിധികളുടെയും നാട്ടുകാരുടെയും സഹായം തേടുമെന്ന് മന്ത്രി വ്യക്തമാക്കി. ഇതു കൂടാതെ കുട്ടികള്‍ക്ക് സ്കൂളിലെത്താനായി കെഎസ്ആര്‍ടിസിയുടെ സേവനയും പ്രയോജനപ്പെടുത്തുമെന്നും മന്ത്രി പറഞ്ഞു. എല്ലാ സ്കൂളുകൾക്കും സർക്കാർ ഫണ്ട് നൽകുന്നത് പ്രായോഗികമല്ല. ഇതിനു മുന്നോടിയായി സ്കൂള്‍ തല യോഗങ്ങള്‍ വിളിച്ചു കൂട്ടുമെന്നും മന്ത്രി പറഞ്ഞു. തദ്ദേശ സ്ഥാപനങ്ങളെയും രാഷ്ട്രീയ പാര‍്ട്ടികളെയും പൊതുജനങ്ങളെയും ഉള്‍പ്പെടുത്തിയായിരിക്കും യോഗം വിളിക്കുക. പിടിഎ ഫണ്ട് കുറവാണെങ്കിൽ പൊതുജനങ്ങളുടെ സഹായം ആവശ്യമായി വരുമെന്നും മന്ത്രി പറഞ്ഞു.
Also Read:
സ്കൂളിൽ അയ്യായിരത്തിലധികം കുട്ടികള്‍ പഠിക്കുന്നുണ്ടെങ്കിൽ കുട്ടികള്‍ക്കായി മാത്രം കെഎസ്ആര്‍ടിസി ബസ് സേവനം ലഭ്യമാക്കാൻ ആലോചിക്കുന്നുണ്ടെന്നും മന്ത്രി ശിവൻകുട്ടി മാധ്യമങ്ങളോടു പറഞ്ഞു. സാമൂഹിക അകലം ഉള്‍പ്പെടെയുള്ള കൊവിഡ് മാനദണ്ഡങ്ങള്‍ പാലിച്ച് കുട്ടികളെ സ്കൂളിലെത്തിക്കുന്നതു സംബന്ധിച്ച ആശങ്കകള്‍ക്കിടെയാണ് മന്ത്രിയുടെ പ്രതികരണം. കൊവിഡ് 19 ലോക്ക്ഡൗൺ മൂലം സാമ്പത്തിക പ്രതിസന്ധി രൂക്ഷമായതോടെ ഗ്രാമീണ പ്രദേശങ്ങളിൽ നിരവധി സ്വകാര്യ ബസുകളും നിരത്തൊഴിഞ്ഞിട്ടുണ്ട്.
സ്കൂളുകളിലെ ഗതാഗത സൗകര്യങ്ങള്‍ സംബന്ധിച്ച് റിപ്പോര്‍ട്ട് സമര്‍പ്പിക്കാൻ ഡെപ്യൂട്ടി ഡയറക്ടര്‍മാര്‍ക്ക് നിര്‍ദേശം നല്‍കിയിട്ടുണ്ടെന്നും ഈ റിപ്പോര്‍ട്ട് ചൊവ്വാഴ്ചയോടെ ലഭിക്കുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു. ഇതിനു ശേഷം വിഷയത്തിൽ മന്ത്രി തന്നെ നേരിട്ട് ഇടപെടുമെന്നും അദ്ദേഹം വ്യക്തമാക്കി. വാഹനസൗകര്യമില്ലാത്ത ചില കേന്ദ്രങ്ങളിൽ കെഎസ്ആര്‍ടിസി തന്നെ നേരിട്ട് ഉപയോഗിക്കാമെന്നാണ് കരുതുന്നതെന്നും സ്കൂള്‍ കുട്ടികള്‍ക്കായി പ്രത്യേക ബോര്‍ഡ് വെച്ച് സര്‍വീസ് നടത്തുന്നത് പരിഗണിക്കുന്നുണ്ടെന്നും മന്ത്രി വ്യക്തമാക്കി. വിദ്യാര്‍ഥി സംഘടനകളും അധ്യാപക സംഘടനകളും ഉള്‍പ്പെടെയുള്ളവരുമായി ചര്‍ച്ച നടത്തുമെന്നും സ്കൂള്‍ തുറക്കുന്നതിൽ ആര്‍ക്കും ആശങ്ക വേണ്ടെന്നും മന്ത്രി പറഞ്ഞു. സ്കൂളുകൾ തുറന്നാലും വിക്ടേഴ്സ് ചാനൽ വഴിയുള്ള ക്ലാസുകൾ തുടരുമെന്നും മന്ത്രി വ്യക്തമാക്കി.
Also Read:
ചൊവ്വാഴ്ച രാവിലെ ഗതാഗതമന്ത്രി ആൻ്റണി രാജുവുമായി ചര്‍ച്ച നടത്തുമെന്ന് അദ്ദേഹം അറിയിച്ചു. സ്കൂള്‍ കുട്ടികളെ കൊണ്ടുപോകുന്ന വാഹനം കുറ്റമറ്റതാക്കുമെന്നും ഇക്കാര്യത്തിൽ സ്കൂളുകളിലെ സാഹചര്യം കൃത്യമായി പരിശോധിച്ച് നടപടി സ്വീകരിക്കുമെന്നും അദ്ദേഹം വ്യക്തമാക്കി. ഒക്ടോബര്‍ 20ന് മുൻപ് വാഹനങ്ങള്‍ കുറ്റമറ്റതാക്കി ഹാജരാക്കണമെന്നാണ് സര്‍ക്കാര്‍ നിര്‍ദേശിച്ചിട്ടുള്ളത്. വാഹനങ്ങളുടെ അറ്റകുറ്റപ്പണികൾക്കും സ്പെയർ പാർട്സ് ഇനത്തിലും വൻതുക ചെലവാകുമെന്ന ആശങ്കയിലാണ് സ്കൂള്‍ മാനേജ്മെൻ്റുകള്‍.
