തിരുവനന്തപുരം: സംസ്ഥാനത്ത് നിയന്ത്രണങ്ങളിൽ കുടൂതൽ ഇളവ്. ഹോട്ടലുകളിൽ ഇരുന്ന് ഭക്ഷണം കഴിക്കാൻ അനുമതി നൽകിയതിനൊപ്പം ബാറുകളിൽ ഇരുന്ന് ഭക്ഷണം കഴിക്കാനും അനുവാദമുണ്ട്. ആകെ സീറ്റിങ് കപ്പാസിറ്റിയുടെ പകുതി ആളുകളെ മാത്രമേ ഒരേ സമയം അനുവദിക്കൂ.
സാമൂഹ്യ അകലവും കൊവിഡ് പ്രോട്ടോക്കോളും പാലിച്ച് വേണം ഇളവുകൾ നടപ്പാക്കാൻ. അതേസമയം, സിനിമാ തിയേറ്ററുകൾ തുറന്ന് പ്രവർത്തിക്കുന്നതിൽ തീരുമാനമായില്ല. മുഖ്യമന്ത്രി പിണറായി വിജയൻ്റെ നേതൃത്വത്തിൽ നടന്ന കൊവിഡ് അവലോകന യോഗത്തിലാണ് ഇക്കാര്യത്തിൽ തീരുമാനം ഉണ്ടായത്.
കൊവിഡ് പ്രതിരോധ വാക്സിൻ്റെ രണ്ട് ഡോസ് സ്വീകരിച്ചവർക്ക് മാത്രമാണ് ബാറുകളിലും ഹോട്ടലുകളിലും ഇരുന്ന് കഴിക്കാൻ അനുമതി നൽകുക. ഹോട്ടലുകളിൽ സിറ്റിങ് കപ്പാസിറ്റിയുടെ 50 ശതമാനം പേരെ പ്രവേശിപ്പിക്കാം. ബാർ ഹോട്ടലുകളിൽ ഇരുന്ന് മദ്യപിക്കാനുള്ള അനുമതി നൽകിയെങ്കിലും ഇരിപ്പിടത്തിൻ്റെ പകുതി മാത്രമേ ഉപയോഗിക്കാൻ കഴിയൂ. എസി പ്രവർത്തിപ്പിക്കാൻ പാടില്ലെന്ന കർശന നിർദേശവും നൽകുന്നുണ്ട്.
