ഒക്ടോബർ 2 ഗാന്ധി ജയന്തി ദിനത്തിൽ ഇരുവർക്കും രാഹുൽ ഗാന്ധി കോൺഗ്രസ് അംഗത്വം നൽകുമെന്ന് നേരത്തേ റിപ്പോർട്ട് ഉണ്ടായിരുന്നു. എന്നാൽ ഭഗത് സിങ്ങിന്റെ ജന്മവാർഷികമായ സെപ്റ്റംബ‍ര്‍ 28ന് ഇരുവരും കോൺഗ്രസിൽ അംഗത്വമെടുക്കുമെന്നാണ് വിവരം. ദളിത് നേതാവും ഗുജറാത്തിലെ വഡ്ഗാം മണ്ഡലത്തിൽ നിന്നുള്ള എംഎൽഎയുമാണ് ജിഗ്നേഷ് മേവാനി. കോൺഗ്രസിൽ അംഗത്വമെടുക്കുന്നതോടെ ജിഗ്നേഷിനെ ഗുജറാത്ത് പിസിസിയിലെ വ‍ര്‍ക്കിങ് പ്രസിഡന്റാക്കുമെന്നാണ് സൂചന.
ജവ‍‍ര്‍ലാൽ നെഹ്റു യൂണിവേഴ്സിറ്റിയിലെ മുൻ യൂണിയൻ നേതാവും സിപിഐ ദേശീയ എക്സിക്യൂട്ടീവ് അംഗവുമാണ് കനയ്യ കുമാര്. പാ‍ര്‍ട്ടിയിലെ തന്റെ സ്ഥാനം സംബന്ധിച്ച് കനയ്യ കുമാര് രാഹുൽ ഗാന്ധിയും പ്രിയങ്കാ ഗാന്ധിയുമായി നിരവധി തവണ ച‍ര്‍ച്ച ചെയ്തിട്ടുണ്ടെന്നാണ് റിപ്പോ‍ര്‍ട്ടിൽ പറയുന്നത്. 2019 ലോക്സഭാ തെരഞ്ഞെടുപ്പിൽ ബിഹാറിലെ ബഗുസരായ് മണ്ഡലത്തിൽ നിന്നും മത്സരിച്ചെങ്കിലും ബിജെപിയുടെ ഗിരിരാജ് സിങ്ങിനോട് പരാജയപ്പെട്ടു.
കനയ്യ കുമാര് പാര്‍ട്ടിയിൽ എത്തിയാൽ യുവാക്കളെ കോൺഗ്രസിലേക്ക് ആകര്‍ഷിക്കാനാകുമെന്നാണ് പാ‍ര്‍ട്ടിയുടെ പ്രതീക്ഷ. ജനങ്ങളുമായി അടുത്തിടപഴകുന്ന കനയ്യ പാര്‍ട്ടിക്ക് മുതൽക്കൂട്ടാകുമെന്നാണ് നേതൃത്വം വിലയിരുത്തുന്നത്. പ്രശാന്ത് കിഷോറിനൊപ്പം കനയ്യ കുമാര് രാഹുൽ ഗാന്ധിയുമായി നിരവധി തവണ കൂടിക്കാഴ്ച നടത്തിയിരുന്നു. പ്രശാന്ത് കിഷോ‍ര്‍ കോൺഗ്രസിൽ ചേരുമെന്ന് ഉറപ്പായ ഘട്ടത്തിലായിരുന്നു ഇത്.
