കൊച്ചി > ഒറ്റ ദിവസം കൊണ്ട് 75000 കിലോ ഏലക്ക ലേലം ചെയ്യുന്ന ബൃഹത് ഇ-ലേലം സ്പൈസസ് ബോര്ഡ് സംഘടിപ്പിക്കുന്നു. 26ന് ഓണ്ലൈന് ആയാണ് പരിപാടി. രാജ്യത്തിന്റെ വിവിധ ഭാഗങ്ങളില് ഉള്ള ഏലക്കൃഷിക്കാരയെയും സുഗന്ധവ്യഞ്ജന വ്യാപാരികളെയും ഒരേ പ്ലാറ്റഫോമില് ഒന്നിച്ചുകൊണ്ടുവരികയും, പരസ്പരം വ്യാപാരം നടത്താനാവുന്ന ഒരു സൗഹൃദ വേദി ഒരുക്കുകയും ചെയ്യുന്നതാകും ഇ-ലേലം.
നിലവില് തുടര്ന്നുപോരുന്ന ഇ-ലേലങ്ങള്ക്കു പുറമെയാണ് ഈ പ്രത്യേക ഇ-ലേലമെന്ന് സ്പൈസസ് ബോര്ഡ് സെക്രട്ടറി ഡി സത്യന് പറഞ്ഞു. കേന്ദ്ര വാണിജ്യ വ്യവസായ വകുപ്പ് രാജ്യമൊട്ടാകെ സംഘടിപ്പിക്കുന്ന ‘വാണിജ്യ സപ്താഹ്’ ആഘോഷങ്ങളുടെ ഭാഗമായാണ് സ്പൈസസ് ബേര്ഡ് ഈ ഇ-ലേലം ഒരുക്കിയിരിക്കുന്നത്. ഏല കര്ഷകര്ക്ക് ഇതുവഴി തങ്ങളുടെ ഏലക്ക വില്ക്കുവാനും മെച്ചപ്പെട്ട വില നേടുവാനും വഴിയൊരുക്കുകയും ചെയ്യുമെന്നും അദ്ദേഹം അറിയിച്ചു.
ഇടുക്കി ജില്ലയിലെ പുറ്റടിയിലുള്ള ഓക്ഷന് സെന്ററിലാണ് ഇ-ലേലം നടക്കുക. ഒട്ടനവധി ഏലക്ക കര്ഷകരും രാജ്യത്തുടനീളമുള്ള ചെറുതും വലുതുമായ സുഗന്ധവ്യഞ്ജന വ്യാപാരികളും ഈ പ്രത്യേക ഇ-ലേലത്തില് പങ്കെടുക്കും എന്ന് സ്പൈസസ് ബോര്ഡ് അറിയിച്ചു.
