അപകട സാധ്യതകളെക്കുറിച്ച് മുന്നറിയിപ്പ് നൽകുന്നതും തനിക്കേൽപ്പിക്കപ്പെട്ടിരുന്നവരെ അപകടങ്ങളിൽ നിന്ന് രക്ഷിക്കുന്നതും ഉത്തരവാദിത്ത്വബോധമുള്ള അജപാലകൻ്റെ കടമയാണ്. അനാവശ്യമായ മാധ്യമ വിചാരണയിലൂടെയും സംഘടിത നീക്കങ്ങളുടെയും പാലാ ബിഷപ്പിനെയും സഭയെയും അവഹേളിക്കുവാനുള്ള നീക്കങ്ങളിൽ നിന്ന് തത്പരകക്ഷികൾ പിന്തിരിയണം. ജാഗ്രത നിർദേശം നൽകുന്നത് ഉത്തരവാദിത്വമുള്ള ഇടയൻ്റെ കടമയാണെന്നും കാഞ്ഞിരപ്പള്ളി രൂപത വ്യക്തമാക്കി.
ആശങ്കകൾ പരിഹരിക്കുന്നതിന് പകരം ഭീഷണിയിലൂടെ വായ മൂടിക്കെട്ടാൻ ശ്രമിക്കുന്നത് ജനാധിപത്യ മര്യാദകൾക്ക് ചേരുന്നതല്ല. ഒരു സമുദായത്തെയും മതവിഭാഗത്തെയും അപകീർത്തിപ്പെടുത്താതെ സംഘടിത സാമൂഹ്യവിരുദ്ധ പ്രവർത്തനങ്ങളെക്കുറിച്ച് സൂചന നൽകി എന്നതിൻ്റെ പേരിൽ മതസ്പർദ്ധയ്ക്ക് കാരണക്കാരനാക്കി കല്ലറങ്ങാട്ട് പിന്താവിനെ ചിത്രീകരിക്കുന്നത് ഗൂഢതാൽപ്പര്യങ്ങളുടെ സൃഷ്ടിയാണ്. പാലാ ബിഷപ്പ് ഉന്നയിച്ച വിഷയങ്ങളുടെ ഗൗരവം തമസ്കരിച്ച് വിവാദം സൃഷ്ടിക്കുന്നവർ കേരളത്തിൻ്റെ മതസൗഹാർദത്തെയും സാമുദായിക ഐക്യത്തെയും തകർക്കുന്ന അപകടത്തിലേക്കാണ് നാടിനെ എത്തിക്കുന്നതെന്നും കാഞ്ഞിരപ്പള്ളി രൂപത പ്രസ്താവനയിലൂടെ പറഞ്ഞു.
ആശങ്കകൾ ദുരീകരിക്കുകയും യാഥാർത്യ ബോധത്തോടെ വിഷയങ്ങളെ സമീപിക്കുകയും ചെയ്യുന്ന ചർച്ചകൾക്ക് പകരം സത്യത്തിന് പുറം തിരിഞ്ഞ് നിന്ന് കൊണ്ട് വിവാദമുണ്ടാക്കി അത് ആളിക്കത്തിക്കുന്നതിനുള്ള ശ്രമങ്ങളിൽ നിന്നും നിക്ഷിപ്ത താൽപര്യക്കാർ പിന്തിരിയണമെന്നും കാഞ്ഞിരപ്പള്ളി രൂപത വൈദിക പ്രതിനിധിസംഘം ആവശ്യപ്പെട്ടു. പിന്തുണച്ച് അറിയിച്ച് കാഞ്ഞിരപ്പള്ളി രൂപതാ വികാരി ജനറാളുമാരായ ഫാ. ജോസഫ് വെള്ളമറ്റം, ഫാ. ബോബി അലക്‌സ് മണ്ണംപ്ലാക്കല്‍ എന്നിവരുടെ നേതൃത്വത്തില്‍ രൂപതയില്‍ നിന്നുള്ള വൈദികരുടെ പ്രതിനിധിസംഘം പാലാ രൂപതാധ്യക്ഷന്‍ മാര്‍ ജോസഫ് കല്ലറങ്ങാട്ടിനെ സന്ദര്‍ശിച്ചു.
പാലാ ബിഷപ്പിൻ്റെ പ്രസ്താവന വിവാദമായി തുടരുന്നതിനിടെ മന്ത്രി വി എൻ വാസവൻ താഴത്തങ്ങാടി ഇമാം ഷംസുദിൻ മന്നാനി ഇലവുപാലവുമായി കൂടിക്കാഴ്ച നടത്തി. താഴത്തങ്ങാടി പള്ളിയിൽ നടന്ന കൂടിക്കാഴ്ച അര മണിക്കൂറോളം നീണ്ട് നിന്നു. ബിഷപ്പിനെ സന്ദർശിച്ച സാഹചര്യം ഇമാമിനോട് മന്ത്രി വിശദീകരിച്ചു. എന്തെങ്കിലും പ്രത്യേക ലക്ഷ്യത്തോടയല്ല ബിഷപ്പിനെ സന്ദർശിച്ചതെന്നും മന്ത്രി പറഞ്ഞു. അതേസമയം, തങ്ങള്‍ക്കുണ്ടായ അതൃപ്തി കൃത്യമായി മന്ത്രിയെ ധരിപ്പിക്കാന്‍ ലഭിച്ച അവസരമായി കൂടിക്കാഴ്ചയെ കാണുന്നുവെന്ന് താഴത്തങ്ങാടി ഇമാം പ്രതികരിച്ചു.
വിവാദം തുടരുന്നതിനിടെ കത്തോലിക്കാ സഭ ബിജെപിയുടെ യഥാര്‍ത്ഥ സ്വഭാവം മനസ്സിലാക്കണമെന്ന് സിപിഎം പോളിറ്റ് ബ്യൂറോ അംഗം പ്രകാശ് കാരാട്ട് അഭിപ്രായപ്പെട്ടിരുന്നു. ബിജെപി ക്രിസ്ത്യൻ പുരോഹിതരെ തന്ത്രപരമായി വശത്താക്കാൻ ബിജെപി ശ്രമിക്കുകയാണ്. ദേശാഭിമാനിയിൽ എഴുതിയ ലേഖനത്തിലാണ് ബിജെപിയെ കുറ്റപ്പെടുത്തിയിരിക്കുന്നത്. പാലാ ബിഷപ്പിന്റെ പ്രസ്താവന കേരളത്തിൽ ആശങ്കയും സംശയവും ഉണ്ടാക്കി. സമൂഹത്തിൽ വിള്ളലുണ്ടാക്കാൻ ബിഷപ്പിന്റെ പ്രസ്താവന ബിജെപി ഉപയോഗിച്ചെന്നും പ്രകാശ് കാരാട്ട് ‘കേരളത്തിൽ വര്‍ഗീയ ചേരിതിരിവ് അരുത്’ എന്ന തലക്കെട്ടുമായി വന്ന ലേഖനത്തിൽ പറയുന്നു.
