സമരം വിജയിക്കുന്നതിനായി ഐക്യദാർഢ്യ കൂട്ടായ്മ നടത്തും. കർഷകരുടെ ആവശ്യം ന്യായമാണ്. അതിനെ പിന്തുണയ്ക്കേണ്ടതുണ്ട്. ഈയൊരു സമരംകൊണ്ട് കേരളത്തിലെ വ്യാവസായിക മുന്നേറ്റം തകരുമെന്നു പറയുന്നത് ശരിയല്ല. ഹർത്താൽ പ്രഖ്യാപിക്കുന്ന ദിവസങ്ങളിൽ പരീക്ഷ മാറ്റിവെയ്ക്കാറുണ്ടെന്നും അദ്ദേഹം പറഞ്ഞു.
പാലാ ബിഷപ്പ് ജോസഫ് കല്ലറങ്ങാട്ടിന്റെ പ്രസ്താവനയിൽ ദുരുദ്ദേശമില്ലെന്ന മുൻ നിലപാട് വിജയരാഘവൻ തിരുത്തി. മുഖ്യമന്ത്രി പറഞ്ഞ നിലപാടാണ് എൽഡിഎഫിനുള്ളതെന്ന് അദ്ദേഹം പറഞ്ഞു. വിഷയത്തിൽ മുഖ്യമന്ത്രി നിലപാട് വ്യക്തമാക്കിയിട്ടുണ്ട്. എൽഡിഎഫിന്റെ നിലപാട് മറ്റൊന്നായി കാണേണ്ടതില്ല. കാര്യങ്ങൾ കൂടുതൽ പരിശോധിക്കുമ്പോഴാണല്ലോ അതു സംബന്ധിച്ച അഭിപ്രായങ്ങൾ മാറുന്നതെന്നും അദ്ദേഹം പറഞ്ഞു.
തന്നെ വർഗീയവാദിയെന്നു വിളിക്കുന്നവർക്ക് മറ്റൊന്നും പറയാനില്ലാത്തതുകൊണ്ടാണ് അത്തരം ആക്ഷേപങ്ങൾ ഉന്നയിക്കുന്നത്. വസ്തുതകൾ വേണമെന്നു നിർബന്ധബുദ്ധിയില്ലാതെ വരുമ്പോൾ ഇങ്ങനെ ഓരോന്ന് പറയും. അതിനെ കാര്യമാക്കേണ്ടതില്ലെന്നും വിജയരാഘവൻ പറഞ്ഞു.
അതേസമയം ബിഎംഎസ് ഒഴികെയുള്ള ട്രേഡ് യൂണിയനുകളുടെ സംയുക്ത സമരസമിതി ഹർത്താൽ നടത്തുമെന്ന് അറിയിച്ചിട്ടുണ്ട്. പാൽ, പത്രം, ആംബുലൻസ്, മരുന്ന് വിതരണം, ആശുപത്രി പ്രവർത്തനം, വിവാഹം, രോഗികളുടെ സഞ്ചാരം, മറ്റ് സർവീസുകൾ തുടങ്ങിയവയെ ഹർത്താലിൽ നിന്നും ഒഴിവാക്കി. മോട്ടർ വാഹന തൊഴിലാളികളും ബാങ്ക് ജീവനക്കാരുമടക്കമുള്ള നൂറിലേറെ തൊഴിലാളി സംഘടനകൾ ഭാരത് ബന്ദിന് പിന്തുണ അറിയിക്കുകയും ചെയ്തതോടെ സംസ്ഥാനത്തെ സാഹചര്യം ഹർത്താലിന് തുല്യമാകും.
കേന്ദ്ര സർക്കാരിൻ്റെ ജനദ്രോഹ നയങ്ങൾക്കെതിരെ 27ന് നടത്തുന്ന ഭാരത് ബന്ദിനോട് ഇടത് പാർട്ടികൾ നേരത്തെ തന്നെ അനുകൂല നിലപാട് സ്വീകരിച്ചിരുന്നു. തൊഴിലാളി സംഘടനകളും ബന്ദിനോട് അനുകൂല നിലപാടാണ് സ്വീകരിക്കുന്നത്.
