പാലാ ബിഷപ്പിന്റെ പ്രസ്താവനയിൽ മുസ്ലിം സമുദായത്തിന് ആശങ്കയുണ്ടെന്നും അത് ഭരണകൂടം പരിഹരിക്കണമെന്നും സലാം പറഞ്ഞു. മുസ്ലിം സമൂഹത്തിന്റെ ആശങ്ക പരിഹരിക്കാനാണ് പ്രതിപക്ഷ നേതാവ് വി ഡി സതീശനും കെപിസിസി പ്രസിഡന്റ് കെ സുധാകരനും ശ്രമിക്കുന്നത്. വ‍ര്‍ഗീയ ധ്രുവീകരണത്തിന് വിജയരാഘവനാണ് തുടക്കമിട്ടതെന്നും സലാം ആരോപിച്ചു.
മന്ത്രിമാ‍ര്‍ക്കൊപ്പം പഠന ക്ലാസിൽ ഇരുത്തേണ്ടത് വിജയരാഘവനെയാണ്. ജനങ്ങളെ ഭിന്നിപ്പിച്ചു നി‍ര്‍ത്തേണ്ടത് സിപിഎമ്മിന്റെ ആവശ്യമാണെന്നും സലാം ആരോപിച്ചു.
അതേസമയം പാലാ ബിഷപ്പിന്റെ പരാമർശവുമായി ബന്ധപ്പെട്ട് ദീപിക ദിനപത്രത്തിൽ വന്ന ലേഖനം കത്തോലിക്കാ സഭയുടെ നിലപാടല്ലെന്ന് സിറോ മലങ്കര കത്തോലിക്കാ സഭയുടെ അധ്യക്ഷൻ മാർ ബസേലിയോസ് ക്ലീമിസ് ബാവ പറഞ്ഞു. മയക്കു മരുന്നിനെ മയക്കു മരുന്ന് എന്നു തന്നെ പറഞ്ഞാൽ മതിയെന്നും അദ്ദേഹം വ്യക്തമാക്കി. തിരുവനന്തപുരത്ത് വിവിധ മത മേലധ്യക്ഷന്മാരുടെ നേതൃത്വത്തിൽ യോഗം നടത്തിയതിനു ശേഷം പ്രതികരിക്കുകയായിരുന്നു ക്ലീമിസ് ബാവ.
മറ്റ് മതങ്ങളെ ബഹുമാനത്തോടെ കാണുന്ന സാഹചര്യം ഒരുക്കണം. ഇതര മതങ്ങളെ മുറിവേൽപ്പിക്കരുത്. നാടിന്റെ മതസൗഹാ‍ര്‍ദം കാത്തുസൂക്ഷിക്കണം. സമാധാനപരമായ അന്തരീക്ഷം കാത്തു സൂക്ഷിക്കുന്നതിനാണ് ഇന്ന് യോഗം ചേ‍ര്‍‍ന്നതെന്നും ക്ലീമിസ് ബാവ പറഞ്ഞു. വിവിധ മതങ്ങളിലെ അംഗങ്ങൾ ഉൾപ്പെട്ട പ്രാദേശിക ഫോറങ്ങൾ സജീവമാക്കാൻ ആത്മീയ മേഖലയിലുള്ളവ‍ര്‍ ശ്രദ്ധ പുല‍ര്‍ത്തണമെന്നും ക്ലീമിസ് ബാവ കൂട്ടിച്ചേർത്തു.
എന്നാൽ നാർക്കോട്ടിക്ക് ജിഹാദ് പരാമർശം നടത്തിയത് ഒരാൾ മാത്രമാണെന്നും അദ്ദേഹം പ്രസ്താവന പിൻവലിച്ചാൽ പ്രശ്നം അവസാനിക്കുമെന്നും കാന്തപുരം എ പി അബൂബക്കർ മുസ്ലിയാർ വ്യക്തമാക്കിയിരുന്നു. മുസ്ലിങ്ങളുടെ ഭാഗത്തുനിന്നും ഒരു കുഴപ്പവും ഉണ്ടായിട്ടില്ലെന്നും അദ്ദേഹം പറഞ്ഞു.
