തിരുവനന്തപുരം: സംസ്ഥാന സർക്കാരിന്റെ കോവിഡ് പ്രതിരോധത്തിൽ നേട്ടമെന്ന് ആരോഗ്യമന്ത്രി വീണ ജോർജ്. വാക്സിനേഷൻ ആദ്യ ഡോസ് 90 ശതമാനം കടന്നുവെന്നും അഞ്ച് സംസ്ഥാനങ്ങളിൽ ഇത് നൂറ് ശതമാനത്തിനടുത്താണെന്നും ആരോഗ്യമന്ത്രി പറഞ്ഞു. ഇതുവരെ 2,39,67,633 (2.39 കോടി) പേർക്ക് ആദ്യ ഡോസ് നൽകി. വാക്സിനെടുക്കാൻ വിമുഖത പാടില്ലെന്നും മരണസംഖ്യ കൂടുതലും വാക്സിനെടുക്കാത്തവരിലാണെന്നും മന്ത്രി വ്യക്തമാക്കി.
കോവിഡ് ജാഗ്രതയിൽ ഒരു വിട്ടുവീഴ്ചയും വരുത്തരുതെന്നും മന്ത്രി ജനങ്ങളോട് അഭ്യർത്ഥിച്ചു. ജനങ്ങൾ സാമൂഹിക അകലം പാലിക്കുന്നതുൾപ്പെടെയുള്ള പ്രതിരോധം പാലിച്ചാൽ മാത്രമേ ഇപ്പോഴുള്ള ഇളവുകൾ തുടരാൻ കഴിയുകയുള്ളൂവെന്നും മന്ത്രി ഓർമ്മിപ്പിച്ചു.സംസ്ഥാന സർക്കാരിന്റെ കോവിഡ് പ്രതിദിന കണക്കുകൾ പുറത്ത് വരുമ്പോൾ ടി.പി ആർ ഉൾപ്പെടുത്തതിന്റെ കാരണവും മന്ത്രി വ്യക്തമാക്കി. 80 ശതമാനത്തിലധികം വാക്സിനേഷൻ പിന്നിട്ടാൽ WIPR കണക്കാക്കിയാൽ മതിയെന്നതിനാലാണ് ഈ മാറ്റമെന്നും മന്ത്രി വ്യക്തമാക്കി.
അതോടൊപ്പം തന്നെ ഡെങ്കി പനി സംബന്ധിച്ച് ചില തെറ്റായ പ്രചാരണങ്ങൾ നടക്കുന്നുണ്ടെന്നും മന്ത്രി പറഞ്ഞു. ഡെങ്കി പനിക്ക് നാല് വകഭേദങ്ങളാണ് ഉള്ളത്. ഇതിൽ രണ്ടാം വകഭേദം പുതിയതായി ഉണ്ടായ ഒന്നാണെന്ന തരത്തിൽ ചില പ്രചാരണങ്ങൾ നടക്കുന്നുണ്ട്. എന്നാൽ അത് തെറ്റാണെന്നും 2017ൽ രാജ്യത്ത് കേരളം ഉൾപ്പെടെ നിരവധി സംസ്ഥാനങ്ങളിൽ ഈ വകഭേദം റിപ്പോർട്ട് ചെയ്തിരുന്നുവെന്നും മന്ത്രി കൂട്ടിച്ചേർത്തു. ഡെങ്കിയുടെ നാല് വകഭേദങ്ങളിൽ ഏറ്റവും അപകടകരമായത് രണ്ടാമത്തേതാണെന്നും മന്ത്രി പറഞ്ഞു.
സംസ്ഥാനത്ത് സ്കൂളുകൾ തുറക്കണമെന്ന നിർദേശം വിദ്യാഭ്യാസ വിദഗ്ധർ ഉൾപ്പെടെ മുന്നോട്ടുവെച്ചതിന്റെ അടിസ്ഥാനത്തിലാണ് തീരുമാനമെടുത്തത്. എന്നാൽ ആരോഗ്യ വകുപ്പിനെ സംബന്ധിച്ച് സ്കൂളുകൾ തുറന്ന് കുട്ടികളെത്തുമ്പോഴേക്കുള്ള തുടർ പ്രവർത്തനങ്ങൾ ഏത് തരത്തിലായിരിക്കണമെന്നത് സംബന്ധിച്ചാണ് വിദ്യാഭ്യാസ വകുപ്പുമായി കൂടിയാലോചന നടത്തുന്നത്. കോളേജിൽ പഠിക്കുന്ന വിദ്യാർത്ഥികളുൾപ്പെടെയാണ് 90 ശതമാനം ആദ്യ ഡോസ് പിന്നിട്ടത്. ഇനിയും വാക്സിൻ ലഭിക്കാത്തവരുണ്ടെങ്കിൽ വിദ്യാർത്ഥികൾക്കായി പ്രത്യേക ക്യാമ്പ് സജ്ജമാക്കുമെന്നും മന്ത്രി പറഞ്ഞു.
Content Highlights: Health Minister Veena George on Covid Vaccination
