തിരുവനന്തപുരം > കേരളത്തിലെ തദ്ദേശ സ്വയംഭരണ സ്ഥാപനങ്ങള് പ്രതിസന്ധികളില് ആര്ജ്ജവത്തോടെ ഇടപെട്ട പ്രാദേശിക സര്ക്കാരുകളാണെന്ന് മന്ത്രി എം വി ഗോവിന്ദന്. പിഎംഎവൈ നഗരം ലൈഫ്, ദേശീയ നഗര ഉപജീവന മിഷന് ഏകദിന ശില്പശാലയും എആര്എച്ച്സി പദ്ധതി പ്രഖ്യാപനവും ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
പ്രതിസന്ധിഘട്ടത്തില് അതില് ഇടപെടാനുള്ള ശേഷിയും കഴിവും പ്രകടിപ്പിച്ചുകൊണ്ട് ലോകത്തിനുതന്നെ മാതൃകയാകാന് തദ്ദേശ സ്വയംഭരണസ്ഥാപനങ്ങള്ക്ക് കഴിഞ്ഞു. വികസനപദ്ധതികള് ഫലപ്രദമായ രീതിയില് പ്രാവര്ത്തികമാക്കുന്നതിന് തദ്ദേശസ്വയംഭരണ സ്ഥാപനങ്ങളുടെ മികച്ച ഇടപെടല് ആവശ്യമാണ്. വികസനകാര്യങ്ങളില് ഇതര സംസ്ഥാനങ്ങളില് നിന്നും വ്യത്യസ്തമായ കാഴ്ചപ്പാടോടുകൂടിയാണ് കേരളം മുന്നോട്ടു പോകുന്നത്.
ശതകോടീശ്വരന്മാരുടെ ആസ്തി കണക്കാക്കിയല്ല പാവപ്പെട്ട ജനതയുടെ ജീവിതം മെച്ചപ്പെടുത്തുക എന്നതാണ് സംസ്ഥാനത്തിന്റെ വികസനത്തിന്റെ അളവുകോല്. ആ ചരിത്രപരമായ ദൗത്യം ഏറ്റെടുക്കേണ്ടത് തദ്ദേശ സ്വയംഭരണ സ്ഥാപനങ്ങളാണെന്നും മന്ത്രി പറഞ്ഞു.
പിഎംഎവൈ നഗരം ലൈഫ്, ദേശീയ നഗര ഉപജീവന മിഷന് പദ്ധതികളുടെ നിര്വഹണത്തില് സുപ്രധാന പങ്കുവഹിക്കുന്ന നഗരസഭാധ്യക്ഷന്മാര്ക്ക് ഇരുപദ്ധതികളെയും കൂടുതല് പരിചയപ്പെടുത്തുന്നതിനാണ് കുടുംബശ്രീയുടെ ആഭിമുഖ്യത്തില് ശിൽപപശാല സംഘടിപ്പിച്ചത്. വി കെ പ്രശാന്ത് എംഎല്എ, തിരുവനന്തപുരം കോര്പ്പറേഷന് മേയര് ആര്യ രാജേന്ദ്രന്, കുടുംബശ്രീ എക്സിക്യൂട്ടീവ് മിഷന് ഡയറക്ടര് പി ഐ ശ്രീവിദ്യ തുടങ്ങിയവര് സംസാരിച്ചു.
