ഹൊറർ സിനിമകൾ ഇഷ്ടമാണോ? 13 സിനിമ കണ്ടാൽ 1 ലക്ഷം രൂപ പ്രതിഫലം

പേടിപ്പെടുത്തുന്ന രംഗങ്ങളുള്ള സിനിമകൾ കൂളായി ഇരുന്ന് കാണുന്ന വ്യക്തിയാണോ നിങ്ങൾ? എത്ര കണ്ടാലും ഒരു പ്രശ്നവുമില്ല എന്നുറപ്പാണോ? എങ്കിൽ നിങ്ങൾക്ക് പറ്റിയ ഒരു ജോലിയുണ്ട്, ഹൊറർ മൂവി ഹാർട്ട് റേറ്റ് അനലിസ്റ്റ്. അമേരിക്ക ആസ്ഥാനമായ ഒരു കമ്പനിയാണ് 13 ഹൊറർ സിനിമകൾ കാണുന്നതിന് 1,300 ഡോളർ, ഏകദേശം 95,800 രൂപ വാഗ്ദാനം ചെയ്യുന്നത്.

ഫിനാൻസ്ബസ് കമ്പനിയാണ് ഹൊറർ സിനിമ ആസ്വാദകർക്കുള്ള സുവർണാവസരമായെത്തിയിരിക്കുന്നത്. ഒരു ഫിറ്റ്ബിറ്റ് സ്മാർട്ട് വാച്ച് ധരിച്ചാണ്. സിനിമകൾ കാണേണ്ടത്. സിനിമ കാണുന്ന വ്യക്തിയുടെ ഹൃദയമിടിപ്പ് നിരീക്ഷിക്കാൻ സ്മാർട്ട് വാച്ച് ഉപയോഗിക്കുമെന്ന് കമ്പനി വ്യക്തമാക്കിയിട്ടുണ്ട്. ഇതുവരെ ലോകത്ത് നിർമ്മിച്ചതിൽ വച്ച് ഏറ്റവും പേടിപ്പെടുത്തുന്ന 13 സിനിമകളാണ് കാണേണ്ടത്.

സോ, അമിറ്റിവില്ലെ ഹൊറർ, എ ക്വയറ്റ് പ്ലേസ്, എ ക്വയറ്റ് പ്ലേസ് പാർട്ട് 2, കാൻഡിമാൻ, ഇൻസിഡിയസ് എന്നിവയാണ് ഹൊറർ ഫെസ്റ്റ് വാച്ച് ലിസ്റ്റിലെ ചില സിനിമകൾ. ദി ബ്ലെയർ വിച്ച് പ്രോജക്റ്റ്, സിനിസ്റ്റർ, ഗെറ്റ് ഔട്ട്, ദി പർജ്, ഹാലോവീൻ (2018), പാരനോർമൽ ആക്റ്റിവിറ്റി, അന്നബെല്ലെ തുടങ്ങിയവയാണ് മറ്റുള്ള സിനിമകൾ.

ചെറിയ ബഡ്ജറ്റിൽ നിർമ്മിക്കുന്ന ഹൊറർ സിനിമകളാണോ വൻ ബഡ്ജറ്റിൽ തയ്യാറാക്കുന്ന സിനിമകളാണോ കൂടുതൽ പേടിപ്പെടുത്തുന്നത് എന്ന പ്രോജക്ടിന്റെ ഭാഗമായാണ് തങ്ങൾ ഹൊറർ സിനിമ ആസ്വാദകർക്കായി ഇത്തരമൊരു അവസരം ഒരുക്കുന്നത് എന്നാണ് കമ്പനി വ്യക്തമാക്കുന്നത്.

ഈ മാസം 26-നകം നിങ്ങൾക്ക് ‘ഹൊറർ മൂവി ഹാർട്ട് റേറ്റ് അനലിസ്റ്റ്’ എന്ന തസ്തികയിലേക്ക് അപേക്ഷിക്കാം.18 വയസ്സിന് മുകളിലായിരിക്കണം നിങ്ങളുടെ പ്രായം. ഓരോ സിനിമയും കൃത്യമായി റേറ്റിംഗ് ചെയ്യുകയും ചെയ്യണം. ഒക്ടോബറിലാണ് സിനിമ കാണേണ്ടത്.