മയക്കുമരുന്നെന്ന സാമൂഹിക വിപത്തിനെതിരെ ജാഗ്രത വേണമെന്നാണ് ബിഷപ്പ് പറഞ്ഞത്. ഒരു മതത്തേയും ഉന്നംവെച്ചല്ല ബിഷപ്പിന്റെ പ്രസ്താവന. മുഖ്യമന്ത്രിയും ഇടതു മുന്നണിയും പറഞ്ഞത് ഇക്കാര്യമാണെന്നും ജോസ് കെ മാണി പറഞ്ഞു. കേരളാ കോൺഗ്രസിന്റെ പ്രതികരണം വൈകിയിട്ടില്ലെന്നും അദ്ദേഹം പറഞ്ഞു.
അതേസമയം മയക്കുമരുന്ന് എന്ന സാമൂഹിക വിപത്ത് ചൂണ്ടിക്കാട്ടുകയും അതിനെതിരെ ജാഗ്രതാ നിർദ്ദേശം നൽകുകയുമാണ് പാലാ ബിഷപ്പ് മാർ ജോസഫ് കല്ലറങ്ങാട്ടിൽ ചെയ്തത് എന്നായിരുന്നു കേരളാ കോൺഗ്രസ് (എം) ചെയർമാൻ ജോസ് കെ മാണി നേരത്തേ പറഞ്ഞത്. സാമൂഹ്യതിന്മകള്‍ക്ക് എതിരെ വിശ്വാസികളെയും പൊതുസമൂഹത്തെയും ബോധവല്‍ക്കരിക്കാനുള്ള ഉത്തരവാദിത്വം എക്കാലവും സഭാനേതൃത്വം നിര്‍വഹിച്ചിട്ടുണ്ടെന്നും അദ്ദേഹം പറഞ്ഞു.
“സ്ത്രീധനം, ജാതിവിവേചനം തുടങ്ങിയ ദുരാചാരങ്ങള്‍ക്ക് എതിരായി രൂപപ്പെട്ട ചെറുത്തുനില്‍പ്പ് ലഹരിമാഫിയകള്‍ക്ക് എതിരെയും രൂപപ്പെടണം. അതിന് സഹായകരമായ ആഹ്വാനത്തിന്റെ പേരില്‍ അദ്ദേഹത്തെ ആക്ഷേപിക്കുന്നവര്‍ കേരളത്തിന്റെ മതസാഹോദര്യവും സമാധാന അന്തരീക്ഷവുമാണ് തകര്‍ക്കാന്‍ ശ്രമിക്കുന്നത്. അത് എതിര്‍ക്കപ്പെടേണ്ടതുണ്ട്. പിതാവിന്റെ വാക്കുകള്‍ വളച്ചൊടിച്ച് ഉപയോഗിക്കുന്നത് സമൂഹത്തിന്റെ പൊതുവായ താല്‍പര്യങ്ങള്‍ക്ക് വിപരീതമാണ്. മയക്കുമരുന്ന് കേരളീയ സമൂഹത്തിന്റെ ഏറ്റവും വലിയ ഭീഷണിയാണെന്നതിൽ തര്‍ക്കമില്ല. കേരളം അഭിമാനകരമായ മതമൈത്രി പുലര്‍ത്തുന്ന നാടാണ്. വ്യത്യസ്ത മതവിഭാഗങ്ങള്‍ക്ക് ഇടയിലുള്ള സാഹോദര്യം നിലനിര്‍ത്താന്‍ നാമെല്ലാവരും കൂട്ടായി ശ്രമിക്കുകയാണ് വേണ്ടത്.” എന്നായിരുന്നു ജോസിന്റെ പ്രസ്താവന.
Also Read:
ബിഷപ്പിനെതിരെ കേസെടുക്കില്ലെന്നാണ് മുഖ്യമന്ത്രി പിണറായി വിജയൻ ബുധനാഴ്ച വാർത്താ സമ്മേളനത്തിൽ പറഞ്ഞത്. ബിഷപ്പിനെ പിന്തുണച്ച് ജോസ് കെ മാണി രംഗത്തെത്തിയത് ചൂണ്ടിക്കാട്ടിയപ്പോൾ, ഒരു സമുദായം എന്ന നിലയ്ക്ക് അതിലെ അംഗങ്ങളുടെ കാര്യം സമുദായം ആലോചിക്കുമല്ലോ. പൊതുവായുള്ള രാഷ്ട്രീയ സംഘടനകൾ സമൂഹത്തിന്റെ കാര്യം നന്നായി ആലോചിക്കും. സമുദായത്തിന്റെ കാര്യം വരുമ്പോൾ സമുദായ സംഘടകളും ആലോചിക്കും. അതിലൊന്നും സാധാരണ ഗതിയിൽ തെറ്റില്ല. അതിന്റെ ഭാഗമായി സാധാരണ ഗതിയിൽ സ്വീകരിക്കുന്ന സമീപനം എന്താ? അതുമായി ബന്ധപ്പെട്ട സമുദായത്തിന്റെ മുന്നിൽ ആരാണോ സംസാരിക്കുന്നത് അവർ അവരുടേതായ അഭ്യർത്ഥന നടത്തും. ഇവിടെ സമുദായത്തോട് പറയേണ്ട കാര്യത്തിൽ ആരും കുറ്റം കാണുന്നില്ല. എന്നാൽ അത് പറയുമ്പോൾ അത് മറ്റേതെങ്കിലുമൊരു മത ചിഹ്നം ഉപയോഗിച്ചുകൊണ്ടാകുന്നതാണ് പ്രശ്നം. അങ്ങനെ വരുമ്പോൾ മറ്റുചിലരുടെ വികാരത്തെ വൃണപ്പെടുത്തുന്ന സാഹചര്യം ഉണ്ടാകും. അത് ഒരിക്കലും സംഭവിക്കാൻ പാടില്ലാത്തതാണ്. സമുദായത്തോട് പറയേണ്ട കാര്യം പറയുന്നത് ഇനിയും തുടരും. അതിൽ യാതൊരു കുറ്റവുമില്ല. അതേ കാര്യമാണ് ജോസ് കെ മാണി എടുത്തു പറഞ്ഞത്- എന്നായിരുന്നു മുഖ്യമന്ത്രിയുടെ പ്രതികരണം.
കൂടാതെ, നാർക്കോട്ടിക്ക് മാഫിയ എന്ന് നമ്മളെല്ലാവരും കേട്ടിട്ടുണ്ട്. ലോകത്തുതന്നെ ലഹരിമരുന്നിനുവേണ്ടി പ്രവർത്തിക്കുന്ന മാഫിയാ സംഘങ്ങളുണ്ട്. അവർ ചില സർക്കാരിനേക്കാളും ശക്തമായതുമാണ്. അങ്ങനെയുള്ള മാഫിയയെക്കുറിച്ച് ഇവിടെ ആരും അറിയാത്തതല്ല. മാഫിയയെ അങ്ങനെയായിട്ടല്ലേ കാണേണ്ടത്. അതിന് മത ചിഹ്നം നൽകാൻ പാടില്ല- എന്നും മുഖ്യമന്ത്രി പറഞ്ഞു.
