സുരേഷ് ഗോപിക്ക് ചെരിപ്പുകൊണ്ട് സല്യൂട്ട് നൽകി യൂത്ത് കോൺഗ്രസിൻ്റെ പ്രതിഷേധം

തൃശൂർ: ഒല്ലൂർ എസ്ഐയെക്കൊണ്ട് നിർബന്ധിച്ച് സല്യൂട്ട് ചെയ്യിച്ച് എംപിയുടെ നിലപാടിനെ വിമർശിച്ച് യൂത്ത് കോൺഗ്രസിൻ്റെ പ്രതിഷേധം. സുരേഷ് ഗോപിക്ക് ചെരിപ്പുകൊണ്ട് സല്യൂട്ട് നൽകിയാണ് യൂത്ത് കോൺഗ്രസ് പ്രതീകാത്‌മക പ്രതിഷേധം നടത്തിയത്.

യൂത്ത് കോൺഗ്രസ് പാലക്കാട് നിയോജക മണ്ഡലം കമ്മിറ്റിയുടെ നേതൃത്വത്തിലാണ് പ്രതിഷേധം നടന്നത്. ബഹുമാനവും ആദരവും ചോദിച്ച് വാങ്ങേണ്ടതല്ലെന്ന് വ്യക്തമാക്കിയ യൂത്ത് കോൺഗ്രസ് സംഭവത്തിൽ സർക്കാർ നടപടി സ്വീകരിക്കനമെന്നും ആവശ്യപ്പെട്ടു. സുരേഷ് ഗോപിയുടെ ഭാഗത്ത് നിന്നുമുണ്ടായ നീക്കം വിവാദമായതോടെ പോലീസ് അസോസിയേഷൻ രംഗത്തുവന്നു. പ്രോട്ടോക്കോൾ പ്രകാരം എം പി യെ സല്യൂട്ട് ചെയ്യേണ്ടതില്ലെന്ന നിലപാടാണ് പോലീസ് അസോസിയേഷൻ സ്വീകരിച്ചത്. എന്നാൽ തൻ്റെ പ്രവർത്തിയിൽ പരാതിയുള്ളവർക്ക് രാജ്യസഭാ ചെയർമാന് പരാതി നൽകാമെന്ന് സുരേഷ് ഗോപി അഭിപ്രായപ്പെട്ടു.

സല്യൂട്ട് നൽകുന്നതിൽ രാഷ്ട്രീയ വേർതിരിവ് വരുന്നത് അംഗീകരിക്കാൻ കഴിയില്ലെന്ന് സുരേഷ് ഗോപി ഇന്ന് പറഞ്ഞു. “സല്യൂട്ട് എന്ന് പറയുന്ന പരിപാടിയേ അവസാനിപ്പിക്കണം. ആരെയും സല്യൂട്ട് ചെയ്യണ്ട. അതിൽ രാഷ്ട്രീയ വേർതിരിവ് വരുന്നത് അംഗീകരിക്കാനാകില്ല. ഇന്ത്യയിൽ ഒരു സംവിധാനമുണ്ട്, അത് അനുസരിച്ചേ പറ്റൂ” – എന്നും പാലാ ബിഷപ്പ് ഹൗസിലെത്തി ബിഷപ്പ് മാർ ജോസഫ് കല്ലറങ്ങാട്ടിനെ സന്ദർശിച്ച ശേഷം മാധ്യമപ്രവർത്തകരുമായി സംസാരിക്കുന്നതിനിടെ അദ്ദേഹം പറഞ്ഞു.

സല്യൂട്ട് വിവാദത്തിൽ പോലീസ് അസോഷിയേഷനാണ് പരാതി ഉന്നയിച്ചതെന്ന് മാധ്യമപ്രവർത്തകർ പറഞ്ഞപ്പോൾ അസോസിയേഷനോ?, ആരുടെ അസോസിയേഷൻ എന്നായിരുന്നു സുരേഷ് പ്രതികരിച്ചത്. പോലീസ് അസോസിയേഷൻ ജനാധിപത്യ സംവിധാനത്തിലുള്ളതല്ല. അസോസിയേഷനൊന്നും ജനങ്ങൾക്ക് ചുമക്കാൻ പറ്റില്ല. അവരുടെ ക്ഷേമത്തിന് മാത്രം, അതുവെച്ച് രാഷ്ട്രീയമൊന്നും കളിക്കരുത്. ആ പോലീസ് ഓഫീസർക്കാർക്ക് പരാതിയുണ്ടോ? – എന്നും സുരേഷ് ഗോപി ചോദിച്ചു.

സല്യൂട്ട് നൽകാൻ പാടില്ലെന്ന് ആരാണ് പറഞ്ഞതെന്ന ചോദിച്ച സുരേഷ് ഗോപി സല്യൂട്ട് നൽകേണ്ടതില്ല എന്ന് വിശ്വസിക്കുന്നവർ പാർലമെൻ്റിലെത്തി ചെയർമാന് പരാതി നൽകട്ടെ എന്നും പറഞ്ഞു. നാട്ടുനടപ്പ് എന്ന് പറയുന്നത് രാജ്യത്തെ നിയമത്തെ അടിസ്ഥാനമാക്കിയാണ്. ഡിജിപി അല്ലേ നിര്‍ദേശം കൊടുക്കേണ്ടത്. അദ്ദേഹം പറയട്ടെ എന്നും അദ്ദേഹം കൂട്ടിച്ചേർത്തു.

നിർബന്ധപൂർവം സല്യൂട്ട് വാങ്ങിയിട്ടില്ലെന്നും താൻ ശാസിച്ചിട്ടില്ലെന്നും സുരേഷ് ഗോപി കഴിഞ്ഞ ദിവസം പറഞ്ഞിരുന്നു. സൗമ്യതയോടെ സല്യൂട്ടിന്റെ കാര്യം ഓ‍ര്‍മ്മിപ്പിക്കുകയാണ് ചെയ്തത്. എംപിയെ സല്യൂട്ട് ചെയ്യണമെന്നാണ് രാജ്യസഭാ സെക്രട്ടറിയേറ്റ് അറിയിച്ചിട്ടുള്ളതെന്നും അദ്ദേഹം പറഞ്ഞു. മിന്നൽ ചുഴലിക്കാറ്റിൽ നാശനഷ്ടം ഉണ്ടായ പുത്തൂരിൽ സന്ദർശനം നടത്തുന്നതിനിടെയാണ് സംഭവം. ഞാൻ ഒരു എംപിയാണ്, മേയറല്ല. ഒരു സല്യൂട്ടൊക്കെ ആവാം എന്നാണ് പോലീസ് ഉദ്യോഗസ്ഥനോട് സുരേഷ് ഗോപി പറഞ്ഞത്. 15 മിനിറ്റ് എസ്ഐ വാഹനത്തിൽ ഇരുന്നുവെന്നും ഇത് മര്യാദകേടാണെന്നും അദ്ദേഹം പറഞ്ഞു.

നിർബന്ധിച്ച് സല്യൂട്ട് ചെയ്യിച്ചതിൽ പോലീസ് അസോസിയേഷന് എതിർപ്പുണ്ടെന്ന് മാധ്യമ പ്രവർത്തകൻ സുരേഷ് ഗോപിയുടെ ശ്രദ്ധയിൽ പെടുത്തിയപ്പോൾ പോലീസ് അസോസിയേഷൻകാർ രാഷ്ട്രീയക്കാരാണെന്നായിരുന്നു സുരേഷ് ഗോപി കഴിഞ്ഞ ദിവസം നടത്തിയ പ്രതികരണം.