കെപിസിസി ജനറൽ സെക്രട്ടറി കോൺഗ്രസ് വിട്ട് സിപിഎമ്മിൽ ചേർന്നതിന് പിന്നാലെയാണ് പുതിയ കെ സുധാകരൻ്റെ നേതൃത്വത്തിലുള്ള പുതിയ നേതൃത്വത്തെ പരിഹസിച്ച് കോടിയേരി രംഗത്തുവന്നത്. അനിൽ കുമാറിനെ സന്തോഷപൂർവം പാർട്ടിയിലേക്ക് സ്വാഗതം ചെയ്യുന്നതായും എകെജി സെൻ്ററിൽ നടത്തിയ വാർത്താസമ്മേളനത്തിൽ കോടിയേരി പറഞ്ഞു.
സംഘടനാ പ്രശ്നങ്ങൾ കൊണ്ട് മാത്രമല്ല അനിൽകുമാർ കോൺഗ്രസ് വിട്ടത്. “കോൺഗ്രസിൻ്റെ രാഷ്ട്രീയ സമീപനത്തിലെ പ്രശ്നങ്ങൾ കൊണ്ട് കൂടിയാണ് അനിൽകുമാർ കോൺഗ്രസ് വിട്ടത്. ദേശീയ തലത്തിലും കോൺഗ്രസിൽ തമ്മിലടിയും പ്രശ്നങ്ങളുമുണ്ട്. സംസ്ഥാന കോൺഗ്രസിൽ ഗുരുതരമായ പ്രശ്നങ്ങളാണ് സംഭവിക്കുന്നത്. സിപിഎമ്മിനെ അംഗീകരിക്കാൻ തയ്യാറുള്ളവർക്ക് പാർട്ടി എല്ലാവിധ പിന്തുണയും നൽകും. പ്രലോഭനങ്ങൾ ഇല്ലാതെയാണ് അനിൽകുമാർ സിപിഎമ്മിൽ എത്തിയത്. ഇടതുപക്ഷ ജനാധിപത്യ മുന്നണിയാണ് കേരളത്തിൻ്റെ ഭാവിയെന്ന് ജനങ്ങൾ തിരിച്ചറിഞ്ഞു. അതുകൊണ്ട് കൂടിയാണ് ഇത്തരത്തിലുള്ള മാറ്റങ്ങൾ” – എന്നും കോടിയേരി വ്യക്തമാക്കി.
സംസ്ഥാന കോൺഗ്രസിൽ സെമി കേഡർ സംവിധാനം കൊണ്ടുവരുമെന്ന സുധാകരൻ്റെ പ്രസ്താവനയെ കോടിയേരി പരിഹസിച്ചു. “കോൺഗ്രസിലെ സെമി കേഡർ സംവിധാനം എന്താണെന്ന് ഇതുവരെ മനസിലായിട്ടില്ല. കേഡർ പാർട്ടി എന്ന് പറഞ്ഞതുകൊണ്ട് മാത്രം കേഡർ പാർട്ടിയാകില്ല. അതിനാവശ്യമായ പ്രത്യയശാസ്ത്രം, സംഘടനാ സംവിധാനം എന്നിവ വേണം. കോൺഗ്രസിൻ്റെ ഭരണഘടന തന്നെ കേഡർ സംവിധാനത്തിന് സഹായകരമല്ല. കോൺഗ്രസ് നേതൃത്വം പറയുന്നത് എന്താണെന്ന് അവരുടെ അണികൾക്ക് പോലും അറിയാത്ത അവസ്ഥയാണുള്ളത്. കോണ്‍ഗ്രസില്‍ നിന്ന് നേതാക്കളുടെ ഉരുള്‍പ്പെട്ടലാണിപ്പോള്‍ നടക്കുന്നത്. ഇതിൻ്റെ ഭാഗമായിട്ടാണ് അനിൽകുമാർ കോൺഗ്രസ് വിട്ട് സിപിഎമ്മിൽ എത്തിയത്. ” – എന്നും അദ്ദേഹം വ്യക്തമാക്കി.
കോൺഗ്രസ് നേതൃത്വം അച്ചടക്ക നടപടി പിൻവലിക്കാത്തതിൽ പ്രതിഷേധിച്ചാണ് മുതിർന്ന കോൺഗ്രസ് നേതാവ് കൂടിയായ കെപി അനിൽകുമാർ പർട്ടി വിട്ടത്. വാർത്താ സമ്മേളനത്തിലാണ് പാർട്ടി വിടുകയാണെന്ന് അനിൽകുമാർ പ്രഖ്യാപിച്ചത്. സിപിഎമ്മിനൊപ്പം ചേർന്ന് പ്രവർത്തിക്കുമെന്ന് വ്യക്തമാക്കിയ ഇദ്ദേഹം ഇതിന് പിന്നാലെ എകെജി സെന്‍ററിലെത്തുകയും ചെയ്തു. സിപിഎം പൊളിറ്റ്ബ്യൂറോ അംഗം കോടിയേരി ബാലകൃഷ്ണൻ അനിൽകുമാറിനെ സ്വീകരിച്ചു. കെപിസിസി അധ്യക്ഷൻ കെ സുധാകരനെതിരെ രൂക്ഷവിമർശനമാണ് വാർത്താ സമ്മേളനത്തിൽ അനിൽകുമാർ നടത്തിയത്.
അതേസമയം അനിൽകുമാറിനെതിരെ രൂക്ഷവിമർശനവുമായി കോൺഗ്രസ് നേതാവ് പി ടി തോമസും ഷാഫി പറമ്പിലും രംഗത്തെത്തി. അനില്‍കുമാര്‍ പാര്‍ട്ടി വിടുന്നത് എല്ലാ ആനുകൂല്യങ്ങളും അനുഭവിച്ച ശേഷമാണ്. കഷ്ടകാല സമയത്തും പാർട്ടിയോടൊപ്പം നിൽക്കുന്നവരെയാണ് ആവശ്യം. ഇവരാണ് മുൻപ് താക്കോൽ സ്ഥാനത്തിരുന്ന് നിരവധി പേരെ വെട്ടിക്കളഞ്ഞതെന്നും പിടി തോമസ് വിമർശിച്ചു. കോൺഗ്രസ് വികാരം ഉൾക്കൊള്ളാത്ത ആളായിരുന്നു അനിൽകുമാറെന്നാണ് ഷാഫി പറമ്പിൽ എംഎൽഎയുടെ വിമർശനം.
