മുഖ്യമന്ത്രി പിണറായി വിജയൻ്റെ നേതൃത്വത്തിൽ ഇന്ന് ഉച്ചയ്ക്ക് നിർണായക അവലോകന യോഗം ചേരാൻ തീരുമാനിച്ചിരുന്നുവെങ്കിലും യോഗം മാറ്റിവെച്ചു. ഔദ്യോഗിക പരിപാടിയിൽ കാരണമാണ് യോഗം മാറ്റിവച്ചത്. കഴിഞ്ഞ ചൊവ്വാഴ്ചയാണ് ഏറ്റവും ഒടുവിലായി അവലോകന യോഗം ചേർന്നത്.
ടേബിളുകൾ തമ്മിലുള്ള അകലം കൂട്ടിയാകും ഹോട്ടലുകളിൽ ഇരുന്ന് ഭക്ഷണം കഴിക്കാനുള്ള അനുമതി നൽകുക. ബാറുകൾ തുറക്കുന്ന കാര്യത്തിലും തീരുമാനം ഉണ്ടാകും. തിരുവനന്തപുരം, തൃശൂർ, കോഴിക്കോട് എന്നിവടങ്ങളിലെ മ്യൂസിയങ്ങൾ തുറന്ന് പ്രവർത്തിക്കാൻ ആരംഭിച്ചു. തിരുവനന്തപുരത്ത് പ്രഭാത – സായഹ്ന സവാരി നടത്താൻ അനുമതിയുണ്ടാകും. ടൂറിസം കേന്ദ്രങ്ങൾ തുറക്കുന്ന പശ്ചാത്തലത്തിലാണ് മ്യൂസിയങ്ങൾ തുറക്കാനുള്ള തീരുമാനം ഉണ്ടായത്. ആവശ്യം ശക്തമാണെങ്കിലും തിയേറ്ററുകൾ തുറക്കുന്നതിൽ തീരുമാനം ഉണ്ടാകാൻ ഇനിയും വൈകും. എന്നാൽ ഇക്കാര്യത്തിൽ അധികം വൈകാതെ തീരുമാനം അറിയിക്കാമെന്ന നിലപാട് സർക്കാരിനുണ്ട്.
കൂടുതൽ ഇളവുകൾ വരുന്നതോടെ സർക്കാർ ഓഫീസുകളിൽ ശനിയാഴ്ച പ്രവർത്തി ദിനമാക്കി. സെക്രട്ടേറിയേറ്റിൽ പഞ്ചിങ് പുനഃരാരംഭിക്കും. ബയോ മെട്രിക് പഞ്ചിങ് ഒഴിവാക്കി ഐ.ഡി കാര്‍ഡ് പഞ്ചിങ്ങാണ് നടപ്പാക്കുന്നത്. ഇതോടെ സർക്കാർ ഓഫീസുകളിലെ സാധാരണ നിലയിലേക്ക് എത്തുകയും ചെയ്യും. കൊവിഡ് ഒന്നാം തരംഗത്തിന് പിന്നാലെ ഏർപ്പെടുത്തിയ ലോക്ക്ഡൗണിന് ശേഷം ശനിയാഴ്ച പ്രവർത്തിദിനമാക്കിയിരുന്നു. എന്നാൽ രണ്ടാം തരംഗത്തോടെ പ്രവർത്തിദിനം വീണ്ടും അഞ്ച് ദിവസമാക്കിയിരുന്നു.
സംസ്ഥാനത്തെ പ്രതിദിന കൊവിഡ് കേസുകൾ കുറയുകയാണെന്നാണ് കണക്കുകൾ വ്യക്തമാക്കുന്നത്. ആരോഗ്യവകുപ്പ് തിങ്കളാഴ്ച പുറത്തുവിട്ട കണക്കുകൾ പ്രകാരം സംസ്ഥാനത്തെ ടെസ്റ്റ് പോസിറ്റിവിറ്റി നിരക്ക് 16.39 ആണ്. പ്രതിവാര ഇന്‍ഫെക്ഷന്‍ പോപ്പുലേഷന്‍ റേഷ്യോ (WIPR) ഏഴിന് മുകളിലുള്ള 794 തദ്ദേശ സ്വയംഭരണ പ്രദേശങ്ങളിലെ വാര്‍ഡുകളാണുള്ളത്. അതില്‍ 692 വാര്‍ഡുകള്‍ നഗര പ്രദേശങ്ങളിലും 3416 വാര്‍ഡുകള്‍ ഗ്രാമ പ്രദേശങ്ങളിലുമാണുള്ളത്.
സംസ്ഥാനത്തെ വിവിധ ജില്ലകളിലായി 5,90,219 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 5,60,694 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 29,525 പേര്‍ ആശുപത്രികളിലും നിരീക്ഷണത്തിലാണ്. 1853 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്. നിലവില്‍ 2,08,773 കൊവിഡ് കേസുകളില്‍, 13.5 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളിലോ പ്രവേശിപ്പിക്കപ്പെട്ടിട്ടുള്ളത്. 2,08,773 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 41,58,504 പേര്‍ ഇതുവരെ കൊവിഡില്‍ നിന്നും മുക്തി നേടി.
തിങ്കളാഴ്ച സംസ്ഥാനത്ത് 15,058 പേര്‍ക്കാണ് കൊവിഡ് സ്ഥിരീകരിച്ചത്. തൃശൂര്‍ 2158, കോഴിക്കോട് 1800, എറണാകുളം 1694, തിരുവനന്തപുരം 1387, കൊല്ലം 1216, മലപ്പുറം 1199, പാലക്കാട് 1124, ആലപ്പുഴ 1118, കോട്ടയം 1027, കണ്ണൂര്‍ 814, ഇടുക്കി 501, വയനാട് 445, പത്തനംതിട്ട 381, കാസര്‍കോട് 194 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്.
