കോട്ടയം: നാർക്കോട്ടിക് ജിഹാദ് വിഷയത്തിൽ മുഖ്യമന്ത്രിയെ കടന്നാക്രമിച്ച് ദീപിക. തീവ്രവാദികളെ ഭയന്ന് നടത്തിയതാകാം മുഖ്യമന്ത്രിയുടെ പ്രതികരണമെന്ന് എഡിറ്റോറിയൽപേജിൽ പ്രസിദ്ധീകരിച്ച ലേഖനത്തിൽ ദീപിക പറയുന്നു. പക്ഷേ അദ്ദേഹം കേരളത്തിന്റെ മുഖ്യമന്ത്രിയാണ്. ഇത്രയും ഉപദേശകർ ഉണ്ടായിട്ടും ഇതുവരെ നാർക്കോട്ടിക് ജിഹാദിനെ കുറിച്ച് കേരളത്തിലെ മുഖ്യമന്ത്രി കേട്ടിട്ടില്ല. കേരളാ കോൺഗ്രസ് മാണികൂടി ഉൾപ്പെട്ടതാണ് മുന്നണി. മുഖ്യമന്ത്രി പറയുന്നതല്ല തങ്ങളുടെ അഭിപ്രായമെങ്കിൽ ജോസ് കെ.മാണി തുറന്നു പറയേണ്ടതുണ്ടെന്നും ജാഗ്രത പുലർത്താൻ പറയുന്നത് അവിവേകമോ എന്ന ലേഖനത്തിൽ ദീപിക ആവശ്യപ്പെട്ടു.
പാലാ ബിഷപ്പ് മാർ ജോസഫ് കല്ലറങ്ങാട്ടിലിനെ വിമർശിച്ച പ്രതിപക്ഷ നേതാവ് വി.ഡി സതീശൻ, പി.ടി. തോമസ് എന്നിവർക്കെതിരേയും ലേഖനത്തിൽ വിമർശമുണ്ട്. കോൺഗ്രസ് നേതാക്കളായ വി.ഡി.സതീശനും പി.ടി. തോമസും പിതാവിന്റെ വാക്കുകളെ അപലപിച്ചു. സതീശൻ പ്രതിപക്ഷ നേതാവാണ്. കേരളത്തിലെ ജനാധിപത്യ മുന്നണിയുടെ നേതാവ് കേരളാ കോൺഗ്രസ് അടക്കമുള്ള കക്ഷികൾ ചേർന്ന ജനാധിപത്യമുന്നണിയുടെ അഭിപ്രായമാകണം പറയേണ്ടത്. വിയോജിപ്പുള്ള ഘടകകക്ഷികൾ നിലപാട് വ്യക്തമാക്കേണ്ടതുണ്ട്. അല്ലാത്തവർ സതീശനൊപ്പമെന്ന് കരുതേണ്ടിവരും. – ലേഖനം പറയുന്നു.
മുൻ എംഎൽഎ കെ.എസ്. ശബരീനാഥനേയും ലേഖനം വിമർശിക്കുന്നു. പാലാ ബിഷപ്പ് പറഞ്ഞതാണ് സത്യം എന്ന് പറഞ്ഞ യൂത്ത് കോൺഗ്രസുകാരെ വിമർശക്കാൻ ശബരീനാഥൻ അടക്കമുള്ള നേതാക്കൾ തിടുക്കംകാട്ടി. പാലായിലെ യൂത്ത് കോൺഗ്രസുകാരെ ശബരീനാഥന് അറിയണമെന്നില്ല. നൂലിൽകെട്ടി ഇറക്കപ്പെട്ടവനാണല്ലോ അദ്ദേഹം. പാലായിലെ കോൺഗ്രസുകാരെ പുറത്താക്കിയാൽ അവർക്ക് ഒന്നുമില്ലെന്നും കോൺഗ്രസിന് ഏറെ ഉണ്ടാകുമെന്നും ലേഖനം മുന്നറിയിപ്പ് നൽകി.
Content Highlights:Deepika newspaper against Pinarayi Vijayan on Narcotic Jihad Remark
