എംഎൽഎ മാണി സി കാപ്പനും രംഗത്ത്.
ബിഷപ്പ് പറഞ്ഞത് നിലവിലുള്ള കാര്യങ്ങൾ ആണെന്ന് കേരളാ കോൺഗ്രസ് (എം) വനിതാ വിഭാഗം സംസ്ഥാന അധ്യക്ഷ നിർമ്മല ജിമ്മി വ്യക്തമാക്കി. “ലൗവ് ജിഹാദിനെതിരെയും നാർക്കോട്ടിക് ജിഹാദിനെതിരെയുമാണ് ബിഷപ്പ് സംസാരിച്ചത്. ബിഷപ്പ് പറഞ്ഞ കാര്യങ്ങളിൽ കേന്ദ്ര – സംസ്ഥാന ഏജൻസികൾ അന്വേഷണം നടത്തണം. വിശ്വാസി എന്ന പേരിലാണ് താൻ നിലപാട് പറയുന്നത്. പാർട്ടിയുടെ നിലപാട് നേതാക്കൾ പറയും” – എന്നും നിർമ്മല ജിമ്മി വ്യക്തമാക്കി.
ബിഷപ്പിൻ്റെ പ്രസ്താവന വിവാദമായി തുടരുന്നതിനിടെ കോട്ടയം ജില്ലാ പഞ്ചായത്ത് പ്രസിഡൻ്റ് കൂടിയായ നിർമ്മല ജിമ്മി ബിഷപ്പ് ഹൗസിലെത്തി ബിഷപ്പിനെ നേരിൽ കണ്ടു. പാലാ നഗരസഭാ ചെയർമാനും ബിഷപ്പിന് പിന്തുണയുമായി ബിഷപ്പ് ഹൗസിലെത്തി.
പാലാ ബിഷപ്പ് മാർ ജോസഫ് കല്ലറങ്ങാട്ടിൻ്റെ പ്രസ്താവന ഏതെങ്കിലും സമുദായത്തിന് എതിരല്ലെന്ന് മാണി സി കാപ്പൻ പറഞ്ഞു. “ബിഷപ്പ് ഒരു മതത്തെയും കുറ്റപ്പെടുത്തി സംസാരിച്ചിട്ടില്ല. സമുദായങ്ങളുടെ പേര് ദുരുപയോഗം ചെയ്യുന്നവർക്കെതിരെയാണ് ബിഷപ്പിൻ്റെ പരാമർശം” – എന്നും യുഡിഎഫ് നേതാവും എംഎൽഎയുമായ മാണി സി കാപ്പൻ വ്യക്തമാക്കി.
ബിഷപ്പിന് പിന്തുണയുമായി ബിഷപ്പ് ഹൗസിന് മുന്നിൽ നടന്ന റാലിയിൽ വിവിധ ക്രൈസ്തവ സംഘടനകളുടെ നേതൃത്വത്തിൽ റാലി നടന്നു. പി സി ജോർജ്, ബിജെപി നേതാക്കളായ എൻ ഹരി, നോബിൾ മാത്യു, കത്തൊലിക്ക കോൺഗ്രസ് പ്രവർത്തകർ എന്നിവരുടെ നേതൃത്വത്തിലാണ് റാലി നടന്നത്. പി സി ജോർജാണ് യോഗം ഉദ്ഘാടനം ചെയ്തത്. ബിഷപ്പിൻ്റെ പ്രസ്താവനയ്ക്കെതിരെ കഴിഞ്ഞ ദിവസം മുസ്ലീം സംഘടനകൾ പ്രതിഷേധ ജാഥ നടത്തിയിരുന്നു. ഒരു പ്രത്യേക സമൂഹത്തിന് മേൽ കരിനിഴൽ വീശ്ത്തുന്നതാണ് ബിഷപ്പിൻ്റെ പ്രസ്താവനയെന്നും കേരളത്തിൽ മതസൗഹാർദം തകർക്കുക മാത്രമാണ് ഇത്തരം പ്രസ്താവനകൾ സഹായകമാകുക എന്നും പ്രതിഷേധക്കാർ പറഞ്ഞു.
ബിഷപ്പിൻ്റെ പ്രസ്താവന വിവാദമായതോടെ വിശദീകരണവുമായി പാലാ രൂപത രംഗത്തു വന്നിരുന്നു. സമൂഹത്തിലെ അപകടകരമായ പ്രവണതകളെക്കുറിച്ചാണ് ബിഷപ്പ് മുന്നറിയിപ്പ് നൽകിയതെന്ന സഹായ മെത്രാൻ വ്യക്തമാക്കി. “ബിഷപ്പിൻ്റെ പ്രസ്താവന ഏതെങ്കിലും സമുദായത്തിന് എതിരല്ല. ആരെയും വേദനിപ്പിക്കാൻ ശ്രമിച്ചിട്ടില്ല. തെറ്റിദ്ധാരണ ജനകമായ പ്രചാരണങ്ങൾ അവസാനിപ്പിക്കണം. പരസ്പരം തിരുത്തി ഒരുമയോടെ മുന്നോട്ട് പോകാം” – എന്നും സഹായ മെത്രാൻ മാർ ജേക്കബ് മുരിക്കൻ പുറത്തിറക്കിയ വിശദീകരണ കുറിപ്പിൽ പറയുന്നുണ്ട്.
മതങ്ങളുടെ പേരും ചിഹ്നവും ഉപയോഗിച്ച് സാമൂഹിക വിരുദ്ധ പ്രവർത്തനം നടത്തുന്ന വളരെ ചെറിയ വിഭാഗത്തിൻ്റെ നടപടികളെ എല്ലാ സമുദായങ്ങളും ഗൗരവമായി കാണണമെന്നും വിശദീകരണ കുറിപ്പിൽ പാലാ രൂപത വ്യക്തമാക്കുന്നുണ്ട്.
