ഇടതുപക്ഷത്തേക്ക് എത്താനുള്ള കേരളാ കോൺഗ്രസ് എമ്മിൻ്റെ തീരുമാനം യുഡിഎഫിനെ ക്ഷയിപ്പിച്ചു എന്ന കാര്യം വസ്തുതയാണ്. നിയമസഭാ തെരഞ്ഞെടുപ്പിൽ കരുനാഗപ്പള്ളി, മൂവാറ്റുപുഴ എന്നിവടങ്ങളിലെ തോൽവി സംബന്ധിച്ച് പരിശോധന നടത്തി തിരുത്തൽ വരുത്തുമെന്നും സിപിഐ സംസ്ഥാന സെക്രട്ടറി പറഞ്ഞു.
കേരളാ പോലീസിൽ ആർഎസ്എസ് ഗ്യാങ്ങ് പ്രവർത്തിക്കുന്നുണ്ടെന്ന ആനി രാജയുടെ പ്രസ്താവനയെ പിന്തുണച്ച് പ്രതികരണം നടത്തിയ ഡി രാജയെ കാനം തള്ളിപ്പറഞ്ഞു. ദേശീയ എക്സിക്യൂട്ടീവ് തീരുമാനത്തിൻ്റെ ലംഘനമാണ് ആനി രാജ നടത്തിയത്. കേരളവും ഉത്തർപ്രദേശും ഒരു പോലെയല്ല. ജനറൽ സെക്രട്ടറിയുടെ ഭാഗത്ത് കുഴപ്പമുണ്ടെങ്കിൽ വിമർശനം നടത്താം. സംസ്ഥാന കൗൺസിലിലെ ചർച്ചയുടെ വികാരം ജനറൽ സെക്രട്ടറിയെ അറിയിക്കണമെന്നും കാനം വ്യക്തമാക്കി.
കേരളാ കോൺഗ്രസ് (എം) വിഭാഗത്തിനെതിരെ മുൻപും സിപിഐ പ്രസ്താവന നടത്തിയിരുന്നു. വിഭാഗം എൽഡിഎഫിൽ എത്തിയെങ്കിലും പ്രതീക്ഷിച്ച നേട്ടമുണ്ടാക്കാൻ മുന്നണിക്കായില്ല എന്ന തരത്തിലാണ് സിപിഐ വിമർശനം നടത്തിയത്. എന്നാൽ ജോസ് പക്ഷത്തിൻ്റെ മുന്നണിമാറ്റത്തെ മികച്ച തീരുമാനമായിട്ടാണ് സിപിഎം വിലയിരുത്തുന്നത്. അതേസമയം, പാലായിലടക്കം സംഭവിച്ച തോൽ വിയിൽ സിപിഎമ്മിനെതിരെ കേരളാ കോൺഗ്രസ് (എം) ആരോപണം ഉന്നയിക്കുന്നുണ്ട്. പാർട്ടി ചെയർമാൻ കൂടിയായ ജോസ് കെ മാണി പാലായിൽ മാണി സി കാപ്പനെതിരെ പരാജയപ്പെടാൻ കാരണം ഒരു വിഭാഗത്തിൻ്റെ കാലുവാരൽ ആണെന്ന നിലപാടാണ് ജോസ് പക്ഷത്തിനുള്ളത്.
പാലാ തോൽവിയെക്കുറിച്ച് അന്വേഷിക്കാൻ സിപിഎം ജില്ലാ നേതൃത്വത്തിന് താൽപ്പര്യമില്ലെന്ന റിപ്പോർട്ടുകളും പുറത്തുവന്നിരുന്നു. എന്നാൽ മുന്നണിയിലെ പ്രധാന ഘടകകക്ഷിയായ കേരളാ കോൺഗ്രസ് (എം) മുന്നോട്ടുവച്ച ആവശ്യം തള്ളിക്കളയാൻ കഴിയില്ലെന്ന നിലപാടിലാണ് സിപിഎം സംസ്ഥാന നേതൃത്വമുള്ളത്. ഇതോടെയാണ് പാലായിലെ തോൽവിയിലടക്കം അന്വേഷണം നടത്താൻ ജില്ലാ നേതൃത്വം തയ്യാറായതെന്ന റിപ്പോർട്ട് പുറത്തുവന്നിരുന്നു.
“സംഘടനാപരമായി സിപിഎം നടത്തുന്ന അന്വേഷണത്തിൽ അഭിപ്രായം പറയാൻ ആഗ്രഹിക്കുന്നില്ല. പരാജയം സംഭവിച്ച മണ്ഡലങ്ങളിൽ എല്ലാ പാർട്ടികളും വിശദമായ പരിശോധന നടത്താറുണ്ട്. ജയിച്ചാലും തോൽവിയുണ്ടായാലും ഇത്തരത്തിൽ പരിശോധന നടക്കും. സ്വാഭാവിക കാര്യം മാത്രമാണിത്. നിലവിലെ അന്വേഷണം സിപിഎമ്മിൻ്റെ ആഭ്യന്തരകാര്യമായതിനാൽ അഭിപ്രായം പങ്കുവയ്ക്കാൻ ആഗ്രഹിക്കുന്നില്ല” – എന്നായിരുന്നു മുൻപ് ജോസ് കെ മാണി വ്യക്തമാക്കിയത്. നിർണായക തെരഞ്ഞെടുപ്പിൽ പാലായിലെ തോൽവിക്ക് കാരണം ബിജെപി വോട്ടുകൾ മാണി സി കാപ്പന് അനുകൂലമായി മറിഞ്ഞതാണെന്നായിരുന്നു കേരളാ കോൺഗ്രസ് എമ്മിൻ്റെ ആദ്യ പ്രതികരണം. പ്രാഥമിക വിലയിരുത്തലുകൾക്ക് ശേഷം ഇടത് വോട്ടുകൾ അനുകൂലമായില്ലെന്ന പ്രസ്താവനയും പുറത്തുവന്നു.
