സ്കൂളുകൾ തുറക്കുന്നതുമായി ബന്ധപ്പെട്ട് മുഖ്യമന്ത്രി പിണറായി വിജയൻ്റെ നേതൃത്വത്തിലുള്ള ഉന്നതതല സമിതിയാകും നിർണായ തീരുമാനങ്ങൾ സ്വീകരിക്കുക. സംസ്ഥാനത്തെ കോളേജുകൾ ഒക്ടോബർ നാലിന് തുറക്കാൻ നേരത്തെ സർക്കാർ തീരുമാനിച്ചിരുന്നു. കൊവിഡ് പ്രതിരോധ വാക്സിനേഷൻ വേഗത്തിൽ തുടരുന്നതും പ്രതിദിന കൊവിഡ് കേസുകളിൽ കുറവ് രേഖപ്പെടുത്താൻ ആരംഭിച്ചതുമാണ് വിദ്യാഭ്യാസ സ്ഥാപനങ്ങൾ തുറക്കുന്നതുമായി ബന്ധപ്പെട്ട് ചർച്ചകൾ നടത്താൻ സർക്കാരിനെ പ്രേരിപ്പിച്ചത്.
സ്കൂളുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾ തുറക്കുന്ന കാര്യത്തിൽ ഗൗരവകരമായ ആലോചനകൾ നടക്കുന്നുണ്ടെന്ന് മുഖ്യമന്ത്രി കഴിഞ്ഞ ദിവസം വ്യക്തമാക്കിയിരുന്നു. വിദഗ്ധരുമായി ഇതുസംബന്ധിച്ച ചർച്ച നടക്കുകയാണെന്ന് കൊവിഡ് അവലോകന യോഗത്തിന് ശേഷം നടന്ന വാർത്താസമ്മേളനത്തിൽ അദ്ദേഹം വ്യക്തമാക്കി
“കൊവിഡ് പ്രതിരോധ വാക്സിൻ സ്വീകരിച്ച വിദ്യാർഥികളുടെയും അധ്യാപകരുടെയും കണക്കെടുത്ത് ഉന്നതവിദ്യാഭ്യാസ വകുപ്പ് ആരോഗ്യ വകുപ്പിന് നൽകും. ഇത് അടിസ്ഥാനമാക്കി വാക്സിനേഷൻ ക്യാമ്പുകൾ സജ്ജമാക്കും. ആരോഗ്യ വകുപ്പും ഉന്നത വിദ്യാഭ്യാസ വകുപ്പും സംയുക്തമായിട്ടാണ് വാക്സിനേഷൻ സൗകര്യം ഒരുക്കുന്നത്. കോളേജുകളിൽ വാക്സിനേഷൻ സൗകര്യം ഒരുക്കും. കോളേജുകൾ തുറക്കുന്നതിനാൽ വിദ്യാർഥികൾക്ക് കൊവിഡ് വാക്സിനേഷന് സൗകര്യമൊരുക്കും. കോളേജിലെത്തുന്ന മുൻപ് തന്നെ ആദ്യ ഡോസ് എടുത്തിരിക്കണം. രണ്ടാമത്തെ ഡോസ് എടുക്കാനുള്ളവർ അതും സ്വീകരിക്കണം” – എന്നും മുഖ്യമന്ത്രി വ്യക്തമാക്കിയിരുന്നു.
ഈ മാസം മുപ്പതിനകം സമ്പൂർണ ആദ്യ ഡോസ് കവറേജാണ് സർക്കാർ ലക്ഷ്യമിടുന്നത്. വാക്സിനേഷൻ 80 ശതമാനത്തോട് അടുക്കുകയാണ്. 78 ശതമാനം പേർക്കും ഒന്നാം ഡോസും 30 ശതാമാനം പേർക്ക് രണ്ടാം ഡോസ് വാക്സിനും നൽകി കഴിഞ്ഞു. 45 വയസിന് മുകളിൽ പ്രായമുള്ള 93 ശതമാനം പേർക്കും ഒരു ഡോസും 50 ശതമാനം പേർക്ക് രണ്ട് ഡോസ് വാകിസിനും നൽകി കഴിഞ്ഞു. ഏഴ് ലക്ഷം ഡോസ് വാക്സിൻ കൈവശമുള്ളതായി മുഖ്യമന്ത്രി വ്യക്തമാക്കിയിരുന്നു.
സ്കൂൾ തുറക്കുന്നതുമായി ബന്ധപ്പെട്ട് തയ്യാറെടുപ്പുകൾ നടത്താൻ ബന്ധപ്പെട്ട് ഉദ്യോഗസ്ഥർക്ക് നിർദേശം നൽകി. സുപ്രീം കോടതി വിധിയുടെ അടിസ്ഥാനത്തിലായിരിക്കും സർക്കാരിൻ്റെ തുടർ നടപടികൾ. സ്കൂളുകൾ തുറന്ന് പ്രവർത്തിക്കുന്നതിൽ വിദ്യാഭ്യാസ വകുപ്പ്, ആരോഗ്യവകുപ്പ്, തദ്ദേശ സ്വയംഭരണ സ്ഥാപനങ്ങൾ എന്നിവയും ഘടകങ്ങളാണ്. 45 ലക്ഷത്തോളം വരുന്ന വിദ്യാർഥികളെയാണ് സ്കൂളുകളിൽ എത്തിക്കേണ്ടി വരുന്നത്. എല്ലാ പഴുതുകളും അടച്ച് പ്രതിരോധം ശക്തിപ്പെടുത്തിയാകും ക്ലാസുകൾ നടത്തുകയെന്നും മന്ത്രി പറഞ്ഞു.
സ്കൂളുകൾ തുറന്ന് പ്രവർത്തിക്കുന്നതിൽ നടപടികൾ സ്വീകരിക്കാമെന്ന് മുഖ്യമന്ത്രി പറഞ്ഞിട്ടുണ്ട്. സ്കൂൾ തുറക്കാൻ വേണ്ടിയും അതിന് ശേഷമുള്ള കാര്യങ്ങൾക്കുമായി മുന്നൊരുക്കങ്ങൾ നടത്താൻ വിദ്യാഭ്യാസ വകുപ്പ് നിർദേശം നൽകിയിട്ടുണ്ട്. ഡെപ്യൂട്ടി ഡയറക്ടർമാർ, സ്കൂൾ പ്രിൻസിപ്പലുമാർ, ഡി.ഒ അടക്കമുള്ള ഓഫീസർമാർ എന്നിവർ ഓരോ വിദ്യാലയങ്ങളുടെയും സാഹചര്യങ്ങൾ കണക്കിലെടുത്ത് ക്ലാസുകൾ നടത്തുന്നതിനുള്ള തയ്യാറെടുപ്പുകൾ ആരംഭിച്ചു. ചില ക്ലാസുകളിൽ അറുപതോളം വിദ്യാർഥികളുണ്ട്. ഈ സാഹചര്യത്തിൽ ക്ലാസുകൾ നടത്തുന്നത് എങ്ങനെയെന്ന് വിശദീകരിക്കുന്ന റിപ്പോർട്ടുകൾ തയ്യാറാക്കുകയും ചെയ്യുന്നുണ്ട്. ഇതനുസരിച്ചാകും ക്ലാസുകൾ പ്രവർത്തിക്കുകയെന്നും വിദ്യാഭാസ മന്ത്രി പറഞ്ഞു.
