നാർക്കോട്ടിക്ക് ജിഹാദ് എന്ന വാക്ക് ആദ്യമായിട്ടാണ് കേൾക്കുന്നത്. ബഹുമാന്യനായ ഒരു പണ്ഡ്യതനും സമൂഹത്തിൽ സ്വാധീനമുള്ള വ്യക്തി എന്ന നിലയിലും ഇത്തരം പ്രസ്താവനകൾ നടത്തുമ്പോൾ ശ്രദ്ധിക്കണം. ബിഷപ്പ് ഇത്തരമൊരു പ്രസ്താവന നടത്തിയത് എന്ത് അടിസ്ഥാനത്തിലാണെന്നും എന്ത് ഉദ്ദേശിച്ചാണെന്നും അറിയില്ല. നാർക്കോട്ടിക് എന്ന വാക്കിന് എന്തെലുമൊരു മതത്തിൻ്റെ നിറം ചർത്തിക്കൊണ്ടുക്കേണ്ട കാര്യമില്ല. അതിൻ്റെ നിറം സാമൂഹിക വിരുദ്ധതയാണ്. നാർക്കോട്ടിക്കുമായി ബന്ധപ്പെട്ട പ്രശ്നങ്ങൾ ഒരു പ്രത്യേക സമുദായത്തെ മാത്രം ബാധിക്കുന്നതല്ലെന്നും മുഖ്യമന്ത്രി വ്യക്തമാക്കി.
ഒരു മതവും മയക്കുമരുന്നിനെ പ്രോത്സാഹിപ്പിക്കുന്നില്ല. സാധാരണഗതിയിൽ ആ ഒരു നിലപാടാണ് നാം എടുക്കേണ്ടത്. നാർക്കോട്ടിക് സമൂഹത്തെയാകെ ബാധിക്കുന്ന പ്രശ്നം എന്ന നിലയിൽ നാം എല്ലാവരും അതിൽ ഉത്കണ്ഠാകുലരാണ്. കഴിയാവുന്ന രീതിയിൽ അതിനെ തടയാനുള്ള നടപടികൾ സ്വീകരിച്ച് കൊണ്ടിരിക്കുമെന്നും കൊവിഡ് അവലോകന യോഗത്തിന് ശേഷം നടന്ന വാർത്താസമ്മേളനത്തിൽ മുഖ്യമന്ത്രി പറഞ്ഞു.
കേരളത്തിലെ കത്തോലിക്ക പെൺകുട്ടികളെയും യുവാക്കളെയും ലക്ഷ്യമാക്കി ലൗ ജിഹാദിനൊപ്പം നാർക്കോട്ടിക് ജിഹാദും നടക്കുന്നുണ്ടെന്ന പാലാ ബിഷപ്പ് മാർ. ജോസഫ് കല്ലറങ്ങാട്ടിൻ്റെ പ്രസ്താവനയ്ക്കെതിരെ മുസ്ലീം കോർഡിനേഷൻ കമ്മിറ്റി രംഗത്തുവന്നു. പാലാ ബിഷപ്പ് ഹൗസിലേക്ക് മാർച്ച് നടത്തിയ ഇവരെ ബാരിക്കേഡ് കെട്ടി പോലീസ് തടഞ്ഞു. ബിഷപ്പിൻ്റെ പ്രസ്താവന സാമുദായിക ഐക്യം തകർക്കുമെന്നും മതേതര സമൂഹത്തിൽ ഭിന്നിപ്പുണ്ടാക്കുമെന്നും കാണി മുസ്ലീം ഐക്യവേദി കോട്ടയം ജില്ലാ പോലീസ് മേധാവിക്ക് പരാതി നൽകി. മറ്റ് ജില്ലകളിലും പോലീസിൽ പരാതി നൽകുന്നത് ഉൾപ്പെടെയുള്ള നിയമനടപടികളുമായി മുസ്ലീം സംഘടനകൾ രംഗത്തുന്നുണ്ട്.
വിവാദ പ്രസ്താവനയിൽ പാലാ ബിഷപ്പിനെതിരെ വികാരം ശക്തമായതോടെ പിന്തുണയുമായി ബിജെപി രംഗത്തുണ്ട്. സത്യം പറയുന്ന ബിഷപ്പിനെ വളഞ്ഞിട്ട് ആക്രമിക്കാൻ അനുവദിക്കില്ലെന്ന് ബിജെപി ദേശീയ നിർവ്വാഹക സമിതി അംഗം പി കെ കൃഷ്ണദാസ് പറഞ്ഞു. അതിനിടെ കല്ലറങ്ങാട്ടിൻ്റെ പ്രസ്താവനയ്ക്ക് പിന്തുണയുമായി ഇരിങ്ങാലക്കുട ബിഷപ്പ് പോളി കണ്ണൂക്കാടന്‍ രംഗത്തുവന്നു. ലൗ ജിഹാദിനും നാർക്കോട്ടിക് ജിഹാദിനുമെതിരെ കരുതൽ വേണം. ഇക്കാര്യത്തിൽ മാതാപിതാക്കൾ കൂടുതൽ ജാഗ്രത പാലിക്കണമെന്നും അദ്ദേഹം വ്യക്തമാക്കി.
ആയുധം ഉപയോഗിക്കാൻ കഴിയാത്ത സ്ഥലങ്ങളിൽ ലൗ ജിഹാദിനും നാർക്കോട്ടിക് ജിഹാദും ഉപയോഗിക്കുന്ന അവസ്ഥയാണുള്ളതെന്നാണ് പാലാ ബിഷപ്പ് പറഞ്ഞത്. “കത്തോലിക്ക യുവാക്കളിൽ മയക്കുമരുന്ന് ഉപയോഗം വ്യാപകമാക്കാൻ ഗൂഢനീക്കം നടക്കുന്നുണ്ട്. ഈ സാഹചര്യത്തിൽ കത്തോലിക്ക കുടുംബങ്ങൾ കരുതിയിരിക്കണം. ഇതര മതസ്ഥരായ യുവതികൾ ഇസ്ലാമിക് സ്റ്റേട് (ഐഎസ്) ക്യാമ്പിൽ എങ്ങനെ എത്തിയെന്ന് പരിശോധിച്ചാൽ ഇക്കാര്യങ്ങൾ മനസിലാകും. കത്തോലിക്ക യുവാക്കളിൽ ലഹരിമരുന്ന് ഉപയോഗം വർധിപ്പിക്കാൻ പ്രത്യേക ശ്രമം നടക്കുന്നുണ്ട്. യുവജനങ്ങളെ മയക്കുമരുന്നിന് അടിമകളാക്കി അവരുടെ ജീവിതം നശിപ്പിച്ച് കളയുന്ന രീതിയെ ആണ് നാർക്കോട്ടിക് അഥവാ ഡ്രഗ് ജിഹാദ് എന്ന് പറയുന്നത്. വർധിച്ച് വരുന്ന കഞ്ചാവ് മയക്കുമരുന്ന് കച്ചവടങ്ങൾ ഇതിലേക്ക് വിരൽ ചൂണ്ടുന്നത്” – എന്നുമാണ് പറഞ്ഞത്.
