ഇളം പ്രായത്തിൽ തന്നെ പെൺകുട്ടികളേ വശത്താക്കുക എന്ന ലക്ഷ്യത്തോടെ സ്കൂളുകളിലും കോളേജുകളിലും ഹോസ്റ്റലുകളിലും കച്ചവടസ്ഥാപനങ്ങളിൽ ജിഹാദികൾ വലവിരിച്ചുവെന്ന് നാം തിരിച്ചറിയണം. പൊതുസ്ഥലങ്ങളിലും ഇത്തരം അവസ്ഥയുണ്ട്. നാം ഒരുപാട് വൈകിപ്പോയി. കേരളത്തിൽ നാർക്കോട്ടിക് ജിഹാദാണ് നടക്കുന്നത്. അമുസ്ലീങ്ങളെ പ്രത്യേകിച്ച് ചെറുപ്പക്കാരെ ലഹരിമരുന്നിന് അടിമയാക്കാൻ ശ്രമിക്കുന്ന അവസ്ഥയാണ് കേരളത്തിലുള്ളതെന്നും ബിഷപ്പ് ആരോപിച്ചു.
ആയുധം ഉപയോഗിക്കാൻ കഴിയാത്ത സ്ഥലങ്ങളിൽ ലൗ ജിഹാദിനും നാർക്കോട്ടിക് ജിഹാദും ഉപയോഗിക്കുന്ന അവസ്ഥയാണുള്ളത്. മുസ്ലീം വിഭാഗക്കാർ അല്ലാത്തവർ ഇല്ലാതാകണമെന്നാണ് ജിഹാദി ഗ്രൂപ്പുകളുടെ ലക്ഷ്യം. മുസ്ലീം ആശയങ്ങൾ അടിച്ചേൽപ്പിക്കാൻ പലതരത്തിലുള്ള ശ്രമം നടക്കുന്നുണ്ട്. ഹലാൽ വിവാദങ്ങൾ അടക്കമുള്ളവ ഇതിൻ്റെ ഭാഗമാണെന്നും എട്ട് നോമ്പ് തിരുന്നാളുമായി ബന്ധപ്പെട്ട് നടത്തിയ പ്രസംഗത്തിൽ ജോസഫ് കല്ലറങ്ങാട്ട് പറഞ്ഞു.
സംസ്ഥാനത്ത് ലൗ ജിഹാദില്ലെന്ന മാധ്യമ നിലപാടിനെയും ബിഷപ്പ് തള്ളിപ്പറഞ്ഞു. ലൗവ് ജിഹാദില്ലെന്ന് സ്ഥാപിക്കാൻ ശ്രമിക്കുന്നത് കണ്ണടച്ച് ഇരുട്ടാക്കുന്നതിന് തുല്യമാണ്. ഇത്തരക്കാർക്ക് നിഷിപ്ത താത്പര്യമുണ്ട്. കത്തോലിക്ക യുവാക്കളിൽ മയക്കുമരുന്ന് ഉപയോഗം വ്യാപകമാക്കാൻ ഗൂഢനീക്കം നടക്കുന്നുണ്ട്. ഈ സാഹചര്യത്തിൽ കത്തോലിക്ക കുടുംബങ്ങൾ കരുതിയിരിക്കണം. ഇതര മതസ്ഥരായ യുവതികൾ ഇസ്ലാമിക് സ്റ്റേറ്റ് (ഐഎസ്) ക്യാമ്പിൽ എങ്ങനെ എത്തിയെന്ന് പരിശോധിച്ചാൽ ഇക്കാര്യങ്ങൾ മനസിലാകും.
കത്തോലിക്ക യുവാക്കളിൽ ലഹരിമരുന്ന് ഉപയോഗം വർധിപ്പിക്കാൻ പ്രത്യേക ശ്രമം നടക്കുന്നുണ്ട്. യുവജനങ്ങളെ മയക്കുമരുന്നിന് അടിമകളാക്കി അവരുടെ ജീവിതം നശിപ്പിച്ച് കളയുന്ന രീതിയെ ആണ് നാർക്കോട്ടിക് അഥവാ ഡ്രഗ് ജിഹാദ് എന്ന് പറയുന്നത്. വർധിച്ച് വരുന്ന കഞ്ചാവ് മയക്കുമരുന്ന് കച്ചവടങ്ങൾ ഇതിലേക്ക് വിരൽ ചൂണ്ടുന്നതാണെന്നും മാർ. ജോസഫ് കല്ലറങ്ങാട്ട് പറഞ്ഞു.
വിഷയത്തിൽ പാലാ രൂപത മുൻപും നിലപാട് സ്വീകരിച്ചിരുന്നു. ഈ വിഷയം കൂടുതൽ ശക്തമാക്കുന്നതിൻ്റെ ഭാഗമായിട്ടാണ് ബിഷപ്പ് നേരിട്ട് ഇക്കാര്യത്തിൽ പരസ്യ പ്രതികരണം നടത്തിയിരിക്കുന്നത്. മയക്കുമരുന്ന് നൽകി യുവാക്കളെ മതം മാറ്റുന്ന പ്രവണ കേരളത്തിൽ ഉണ്ടെന്നാണ് അദ്ദേഹം ആരോപിക്കുന്നത്. നിമിഷയുടെയും സോണിയ സെബാസ്റ്റ്യൻ്റെയും പേരെടുത്ത് പറഞ്ഞായിരുന്നു പ്രസംഗം. ലൗ ജിഹാദിന് പുറമേ എന്ന പുതിയ വാക്ക് ഉപയോഗിച്ചതും ശ്രദ്ധേയമാണ്.
അഞ്ചും അതിൽ കൂടുതലും കുട്ടികളുള്ള കുടുംബങ്ങൾക്ക് ആനുകൂല്യം പ്രഖ്യാപിച്ച് പാലാ രൂപതയുടെ നിലപാട് മുൻപ് വിവാദമായിരുന്നു. രണ്ടായിരത്തിനു ശേഷം വിവാഹിതരും അഞ്ചും അതിൽ കൂടുതലും മക്കളുള്ള കുടുംബത്തിന് പ്രതിമാസം 1500 രൂപാ ഫാമിലി അപ്പോസ്തോലേറ്റ് വഴി നൽകുമെന്നുമായിരുന്നു സഭയുടെ പ്രഖ്യാപനം. “ഒരു കുടുംബത്തിൽ നാലാമതായും തുടർന്നും ജനിക്കുന്ന കുട്ടികൾക്ക് സെന്റ് ജോസഫ്സ് കോളേജ് ഓഫ് എഞ്ചിനീയറിങ് ആന്റ് ടെക്നോളജി പാലായിൽ സ്കോളർഷിപ്പോടെ പഠിക്കാം, ഒരു കുടുംബത്തിലെ നാല് മുതലുള്ള കുട്ടികളുടെ ജനനവുമായി ബന്ധപ്പെട്ട ആശുപത്രി സൗകര്യങ്ങൾ മാര് സ്ലീവാ ആശുപത്രിയിൽ സൗജന്യമായി നൽകും’ – എന്നുമാണ് രൂപത പറഞ്ഞത്.
