കഴിഞ്ഞ മാസമാണ് കിരിക് അഡ്ഡ എന്ന് പേരുള്ള ഫേസ്ബുക്ക് പേജിലാണ് റം ഗുലാബ് ജാമുന്റെ വീഡിയോ പോസ്റ്റ് ചെയ്തത്. 15 സെക്കൻഡ് ദൈർഘ്യമുള്ള വീഡിയോയിൽ ഒരാൾ ഓൾഡ് മോങ്ക് റം ഒരു സിറിഞ്ചിൽ നിറച്ച ശേഷം അടുക്കിവച്ചിരിക്കുന്ന ഗുലാബ് ജാമുനിലേക്ക് കുത്തിനിറയ്ക്കുന്നത് കാണാം. ഓരോ ജാമുനിലും റം സിറിഞ്ചുപയോഗിച്ച് റം കയറ്റിയ ശേഷം ഒരു ഫിനിഷിംഗ് ടച്ചിനായി ജാമുൻ അടുക്കി വച്ചിരിക്കുന്നതിന് മുകളിലേക്ക് റം ഒഴിക്കുന്നതും കാണാം. 5.1 ദശലക്ഷത്തിലധികം വ്യൂകളും 76k ലൈക്കുകളും നേടി വീഡിയോ ദിവസങ്ങൾക്കുള്ളിൽ വൈറലായി.
സാധാരണ ഗതിയിൽ പഞ്ചസാര-സിറപ്പ് മുക്കിയ ഗുലാബ് ജാമുൻ മധുരപലഹാരത്തിൽ വിപ്ലവം സൃഷ്ടിച്ചേക്കാം പുതിയ പരീക്ഷണം എന്നാണ് പലരുടെയും അഭിപ്രായം. റമ്മിൽ കുതിർത്ത ഗുലാബ് ജാമുൻ കഴിച്ചാൽ എന്തായിരിക്കും അവസ്ഥ എന്ന് പലരും ആശ്ചര്യപ്പെട്ടപ്പോൾ ഇത് കഴിക്കുന്ന ആൾക്ക് എത്രമാത്രം ഹാംഗ് ഓവർ ഉണ്ടാകുമെന്നാണ് ചിലരുടെ ആശങ്ക. എവിടെയാണ് ഇത്തരം റമ്മിൽ മുക്കിയ ഗുലാബ് ജാമുൻ ലഭിക്കുക എന്നതാണ് ഒരു കൂട്ടരുടെ സംശയം. പാചകക്കുറിപ്പ് കണ്ടുപിടിച്ചവരെ അഭിനന്ദിക്കുകയും “നല്ല കോമ്പിനേഷൻ” എന്ന് അഭിനന്ദിക്കുന്നവരും കുറവല്ല. അതെ സമയം ഇതിലും നല്ല ടച്ചിങ്‌സ് സ്വപ്നങ്ങളിൽ മാത്രം എന്നാണ് മറ്റൊരാളുടെ കമന്റ്.
