എട്ടു പേരുടെ മൂന്ന് വീതം സാംപിളുകളാണ് വൈറോളജി ലാബിലേക്ക് അയച്ചിരുന്നത്. നിപ ബാധിച്ച് മരിച്ച കുഞ്ഞിന്‍റെ മാതാപിതാക്കളും സമ്പർക്കമുണ്ടായിരുന്ന ആരോഗ്യ പ്രവർത്തകരും ഉൾപ്പെടെയുള്ളവരുടെ പരിശോധനാ ഫലം നെഗറ്റീവാണെന്നത് ഈ ഘട്ടത്തിൽ ആശ്വാസകരമാണെന്ന് ആരോഗ്യമന്ത്രി പറഞ്ഞു. ആശുപത്രിയിൽ ഐസൊലേഷനിൽ കഴിയുന്നവരുടെ പരിശോധനാ ഫലവും ഇന്ന് ലഭിക്കും.
Also Read :
നിപ മൂലം മരണപ്പെട്ട കുട്ടിയുടെ സമ്പര്‍ക്കപ്പട്ടികയില്‍ 251 പേരെ ഉള്‍പ്പെടുത്തിയെന്ന് ആരോഗ്യ മന്ത്രി ഇന്നലെ അറിയിച്ചിരുന്നു. ഇതില്‍ 129 പേര്‍ ആരോഗ്യ പ്രവര്‍ത്തകരാണ്. സമ്പര്‍ക്കപ്പട്ടികയില്‍ ആകെ 54 പേര്‍ ഹൈ റിസ്‌ക് വിഭാഗത്തില്‍ പെട്ടവരാണ്. ഇതില്‍ 30 പേര്‍ ആരോഗ്യ പ്രവര്‍ത്തകരാണ്. രോഗം സംശയിക്കപ്പെടുന്നവര്‍ 38 പേരാണ്. ഇതില്‍ 11 പേര്‍ക്ക് രോഗലക്ഷണങ്ങളുണ്ടായിരുന്നത്.
ഇന്നലെ ഉച്ചയോടെ പൂനെ വൈറോളജി ഇന്‍സ്റ്റിറ്റ്യൂട്ടിലെ വിദഗ്ധര്‍ ജില്ലയിലെത്തുകയും കോഴിക്കോട് മെഡിക്കല്‍ കോളേജ് ആശുപത്രിയില്‍ സാംപിള്‍ പരിശോധനക്കുള്ള ക്രമീകരണങ്ങള്‍ നടത്തുകയും ചെയ്തിരുന്നു. പോയന്റ് ഓഫ് കെയര്‍ , ആര്‍ടിപിസിആര്‍ പരിശോധനകള്‍ ലാബില്‍ നടത്താന്‍ സാധിക്കും. ഇവിടെ നടത്തുന്ന പരിശോധനകളുടെ സാംപിള്‍ പൂനെ വൈറോളജി ഇന്‍സ്റ്റിറ്റ്യൂട്ടിലേക്കും അയക്കുമെന്നും മന്ത്രി വ്യക്തമാക്കിയിരുന്നു. ഭോപ്പാല്‍ വൈറോളജി ഇന്‍സ്റ്റിറ്റ്യൂട്ടിലെ വിദഗ്ധര്‍ ബുധനാഴ്ച ജില്ലയിലെത്തുകയും ചെയ്തു.
Also Read :
മൃഗസംരക്ഷണ വകുപ്പ് ഉദ്യോഗസ്ഥര്‍ മരണപ്പെട്ട കുട്ടിയുടെ വീട്ടു പരിസരത്ത് ഇന്നലെ പരിശോധന നടത്തിയിരുന്നു. വീട്ടിലെ റമ്പൂട്ടാന്‍ മരങ്ങളില്‍നിന്ന് സാംപിള്‍ ശേഖരിച്ചു. വീട്ടില്‍ വളര്‍ത്തുന്ന ആടുകളുടെ രക്തവും വായില്‍നിന്നുള്ള സ്രവവും പരിശോധനക്ക് എടുത്തു.
നിപ സ്ഥിരീകരിച്ച പ്രദേശത്ത് പരിശീലനം സിദ്ധിച്ച ടീമുകള്‍ ഗൃഹസന്ദര്‍ശനം നടത്തി ലക്ഷണങ്ങളടക്കമുള്ള വിവരങ്ങള്‍ ശേഖരിക്കാനും തീരുമാനമായിട്ടുണ്ട്. 25 വീടുകള്‍ക്ക് ഒരു ടീം എന്ന രീതിയിലാണ് ഇതിനുള്ള ക്രമീകരണങ്ങള്‍ നടത്തിയിട്ടുള്ളത്.
നിപ സംബന്ധിച്ച എല്ലാ വിവരങ്ങളും അറിയുന്നതിനും കൈമാറുന്നതിനും ഇ ഹെല്‍ത്ത് സോഫ്റ്റ് വെയര്‍ രൂപീകരിച്ചു. ഡാറ്റ അപ്‌ഡേഷനും മോണിറ്ററിങ്ങും റിയല്‍ ടൈമില്‍ നടത്തുകയാണ് ലക്ഷ്യം.
Also Read :
കുട്ടിയുമായി അടുത്തിടപഴകിയ ആരോഗ്യപ്രവര്‍ത്തകരെ ഹൈ റിസ്‌ക് വിഭാഗത്തില്‍ ഉള്‍പ്പെടുത്തി ഐസൊലേറ്റ് ചെയ്തിട്ടുണ്ട്. പ്രാഥമിക സമ്പര്‍ക്ക പട്ടികയിലുള്ളവരെ കണ്‍ട്രോള്‍ റൂമില്‍നിന്നും വിളിച്ച് ആരോഗ്യ വിവരങ്ങള്‍ ചോദിക്കുകയും കൗണ്‍സിലിങ് നല്‍കുകയും ചെയ്യുന്നുണ്ട്.
സാമൂഹിക അകലം പാലിക്കുകയും ഇടയ്ക്കിടയ്ക്ക് കൈകള്‍ സോപ്പും വെള്ളവും ഉപയോഗിച്ച് കഴുകുകയും ചെയ്യുക വഴഇ നിപ്പക്കെതിരെയും പ്രതിരോധം തീര്‍ക്കാനാകും. നിര്‍ബന്ധമായും മാസ്‌ക് ധരിക്കണം. അസുഖം ബാധിച്ചവരെ ചികില്‍സിക്കുന്നവര്‍ പ്രത്യേകം ശ്രദ്ധിക്കണം. രോഗിയുമായി ഒരു മീറ്റര്‍ അകലം പാലിക്കണം. രോഗി ഉപയോഗിച്ച വസ്തുക്കള്‍ പ്രത്യേകം മാറ്റി നിര്‍മാര്‍ജ്ജനം ചെയ്യണം. രോഗലക്ഷണങ്ങളുണ്ടായാല്‍ ഉടന്‍ ആശുപത്രിയില്‍ ചികിത്സ തേടണം.
