സ്കൂൾ തുറക്കുമോ, ഞായറാഴ്ച ലോക്ക്ഡൗൺ തുടരുമോ? നിർണായക അവലോകന യോഗം ഇന്ന്

തിരുവനന്തപുരം: ഞായറാഴ്ചത്തെ ലോക്ക്ഡൗണും രാത്രികാല കർഫ്യുവും തുടരണോ എന്നതടക്കമുള്ള നിർണായക തീരുമാനങ്ങൾ ഇന്നുണ്ടാകും. മുഖ്യമന്ത്രി പിണറായി വിജയൻ്റെ നേതൃത്വത്തിൽ ഇന്ന് ചേരുന്ന അവലോകന യോഗം വിവിധ വിഷയങ്ങളിൽ നിർണായക തീരുമാനം കൈക്കൊള്ളും.

മുഖ്യമന്ത്രിയുടെ നേതൃത്വത്തിൽ ഇന്ന് ഉച്ചയ്ക്ക് മൂന്നരയ്ക്കാണ് യോഗം ചേരുന്നത്. ഞായറാഴ്ചത്തെ ലോക്ക്ഡൗണും രാത്രികാല കർഫ്യുവും പിൻലിക്കണമെന്ന് മുഖ്യമന്ത്രി കഴിഞ്ഞ ദിവസം വിളിച്ച യോഗത്തിൽ വിദഗ്ധർ അഭിപ്രായപ്പെട്ടിരുന്നു. കഴിഞ്ഞ ദിവസം ചേർന്ന യോഗത്തിൽ സ്കൂളുകൾ തുറന്ന് പ്രവർത്തിക്കുന്നതിൽ നിർദേശങ്ങൾ ഉയർന്നെങ്കിലും കൊവിഡ് കേസുകൾ ഉയർന്ന തോതിൽ തുടരുന്നതിനാൽ പെട്ടെന്ന് ഒരു തീരുമാനത്തിലേക്ക് പോകേണ്ടതില്ലെന്ന നിലപാട് സ്വീകരിക്കുകയായിരുന്നു. വിദഗ്ധ സമിതിയെ വെച്ച് സാഹര്യങ്ങൾ പഠിച്ച ശേഷം ഇക്കാര്യത്തിൽ തീരുമാനം സ്വീകരിക്കാം എന്ന നിലപാടിലാണ് സംസ്ഥാന സർക്കാർ.

ജന ജീവിതം സാധാരണ നിലയിലേക്ക് എത്തിക്കാനുള്ള ശ്രമം ആണ് സർക്കാരിൻ്റെ ഭാഗത്ത് നിന്നും ഉണ്ടാകുന്നത്. കേരളം ഇനിയും പൂർണമായി അടച്ചിടില്ലെന്ന് മുഖ്യമന്ത്രി വെള്ളിയാഴ്ച വ്യക്തമാക്കിയിരുന്നു. പൂർണമായ അടച്ചിടൽ സംസ്ഥാനത്ത് ഇനിയും പ്രായോഗികമല്ല. വാർഡുതല സമിതികൾ ശക്തിപ്പെടുത്തിയുള്ള പ്രതിരോധ പ്രവർത്തനങ്ങളാണ് ആവശ്യം. കൊവിഡിൻ്റെ രണ്ടാം തരംഗത്തിൽ വാർഡുതല സമിതികളുടെ പ്രവർത്തനം പിന്നോട്ട് പോയെന്നും തദ്ദേശ പ്രതിനിധികളുടെ യോഗത്തിൽ മുഖ്യമന്ത്രി പറഞ്ഞിരുന്നു.

ഓണം പ്രമാണിച്ച് നൽകിയ ഇളവുകൾ മൂലം കൊവിഡ് കേസുകൾ ഉയരുമെന്ന പ്രതീക്ഷയിലായിരുന്നു സർക്കാരും ആരോഗ്യ വകുപ്പും. ഇതിൻ്റെ ഭാഗമായിട്ടാണ് നിയന്ത്രണങ്ങൾ കടുപ്പിച്ചത്. എന്നാൽ ആശങ്കപ്പെട്ടത് പോലെ കൊവിഡ് കേസുകളിൽ കാര്യമായ വർധന ഉണ്ടായില്ല. ഒരാഴ്ചത്തെ ശരാശരി രോഗസ്ഥിരീകരണ നിരക്ക് 17.91 ശതമാനമായി കുറഞ്ഞിട്ടുണ്ട്. കഴിഞ്ഞ നാല് ദിവസമായി നിരക്ക് കുറയുന്ന സൂചനയും കാണിക്കുന്നുണ്ട്. ആശുപത്രികളിൽ ചികിത്സ തേടി എത്തുന്നവരുടെ എണ്ണത്തിൽ കാര്യമായ കുറവ് സംഭവിച്ചു.

രാത്രി 10 മണി മുതൽ രാവിലെ ആറ് മണിവരെയുള്ള രാത്രികാല കർഫ്യൂവും ഞായറാഴ്ചകളിൽ ഏർപ്പെടുത്തിയിരിക്കുന്ന ലോക്ക്ഡൗണും തുടരണം എന്നാണ് അവലോകന യോഗത്തിൽ വിലയിരുത്തൽ ഉണ്ടായത്. ഇക്കാര്യത്തിൽ കൂടുതൽ പുനഃപരിശോധന നടത്തണോ എന്ന കാര്യത്തിൽ ഇന്ന് ചേരുന്ന കൊവിഡ് അവലോകന യോഗത്തിൽ തീരുമാനിക്കാമെന്നായിരുന്നു നിർദേശം ഉണ്ടായത്. സംസ്ഥാനത്ത് നിപ ആശങ്ക തുടരുന്നതിനാൽ മറ്റ് തീരുമാനങ്ങൾ ഉണ്ടാകുമോ എന്ന കാര്യത്തിലും വ്യക്തതയില്ല.

തിങ്കളാഴ്ച ആരോഗ്യവകുപ്പ് പുറത്തുവിട്ട കൊവിഡ് വിവരങ്ങളിൽ സംസ്ഥാനത്തെ ടെസ്റ്റ് പോസിറ്റിവിറ്റി നിരക്ക് 16.71 ആണ്. പ്രതിവാര ഇന്‍ഫെക്ഷന്‍ പോപ്പുലേഷന്‍ റേഷ്യോ (WIPR) ഏഴിന് മുകളിലുള്ള 296 തദ്ദേശ സ്വയംഭരണ പ്രദേശങ്ങളാണുള്ളത്. അതില്‍ 81 എണ്ണം നഗര പ്രദേശങ്ങളിലും 215 എണ്ണം ഗ്രാമ പ്രദേശങ്ങളിലുമാണുള്ളത്. വിവിധ ജില്ലകളിലായി 6,20,739 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 5,87,582 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 33,157 പേര്‍ ആശുപത്രികളിലും നിരീക്ഷണത്തിലാണ്. 2463 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്.