“കെഎസ്ആർടിസിക്ക് ഓടാൻ പോലും നിവർത്തിയില്ല. ടിക്കറ്റ് വരുമാനമല്ലാതെ മറ്റെന്തെങ്കിലും വരുമാനം കണ്ടെത്താൻ ഒരു മാനേജിങ് ഡയറക്ടർ ശ്രമിക്കുമ്പോൾ അദ്ദേഹത്തെ അധിക്ഷേപിക്കുന്നത് ശരിയല്ല. കൊട്ടാരക്കര പ്രൈവറ്റ് ബസ്റ്റാന്റിലാണ് ബിവറേജ് ഔട്ട്ലറ്റ് ഇരിക്കുന്നത്. അതിനു തൊട്ടപ്പുറത്താണ് കെഎസ്ആർടിസി ബസ് സ്റ്റാന്റ്. രണ്ടും ബന്ധപ്പെട്ടാണ് കിടക്കുന്നത്. അവിടേക്ക് നടന്നു കയറാം. അവിടെ ഈ പറയുന്ന ആപത്തൊന്നും സംഭവിച്ചിട്ടില്ലല്ലോ. എന്തിനേയും എതിർക്കുന്ന ചില ആളുകളുണ്ട്. എയർപോർട്ടിൽ മദ്യശാലകളില്ലേ? കൊച്ചി അന്താരാഷ്ട്ര വിമാനത്താവളത്തിൽ ബാർ ഉണ്ടല്ലോ? ഗൾഫ് രാജ്യങ്ങളിലെ അബുദാബി, ദുബായ് എന്നിവിടങ്ങളിലെ ചെറിയ ഹോട്ടലുകളിലും റസ്റ്റോറന്റുകളിൽ വരെ മദ്യശാലകളുണ്ട്. അവിടെയാരും മദ്യപിച്ച് വണ്ടി ഓടിക്കുന്നില്ലല്ലോ? അവരാരും നാട്ടിലെ സ്ത്രീകളെ ഉപദ്രവിക്കുന്നില്ല, കമന്റടിക്കുന്നില്ല.” ഗണേഷ് കുമാർ പറയുന്നു.
“ഇത് മൊബൈൽ ഫോൺ ടവർ വേണ്ടെന്നു പറയുന്നതുപോലെയാണ്. മറ്റുള്ളവരുടെ പുരയിടത്തിൽ മൊബൈൽ ടവർ വെച്ച് പതിനായിരം കിട്ടുകയാണെങ്കിൽ അത് പറ്റില്ല. എന്റെ പുരയിടത്തിലാണെങ്കിൽ മൊബൈൽ ടവർ വേണം. മൊബൈൽ ടവറിനെതിരെ സമരം ചെയ്തവർ ഇപ്പോൾ കുഞ്ഞുങ്ങൾക്ക് നെറ്റ് കിട്ടുന്നില്ല എന്നു പറയുന്നുണ്ടല്ലോ. അന്ന് എതിർത്തവർ ഇപ്പോൾ എന്തു പറയുന്നു. നാട്ടിലെ മാറ്റങ്ങൾ നമ്മൾ കണ്ടുകൊണ്ടിരിക്കുന്നതല്ലേ. പിന്തിരിപ്പൻ സമീപനം ശരിയല്ല. കൊട്ടാരക്കര ബിവറേജ് ഇരിക്കുന്നത് സ്വകാര്യ വ്യക്തിയുടെ കെട്ടിടത്തിലാണ്. അത് കെഎസ്ആർടിസിയുടെ കെട്ടിടത്തിലേക്ക് മാറ്റി അവർക്ക് വാടക കിട്ടുന്നതിൽ എന്താണ് തെറ്റ്?” ഗണേഷ് കുമാർ ചോദിക്കുന്നു.
അതേസമയം, കെഎസ്ആർടിസി ഡിപ്പോകൾ വഴി മദ്യം ലഭ്യമാക്കുന്നതിനെതിരെ കോൺഗ്രസ് നേതാവ് വിഎം സുധീകരൻ രംഗത്തെത്തിയിരുന്നു. അവശ്യ മരുന്ന് ലഭ്യമാക്കുന്നതുപോലെയാണ് മദ്യം വിൽക്കുന്നത്. കെഎസ്ആർടിസി ഡിപ്പോകൾ വഴി മദ്യം വിൽക്കുന്നത് അപകടകരമാണ്. കോടതി ഇക്കാര്യത്തിൽ ഇടപെടുമെന്നാണ് കരുതുന്നതെന്നും സുധീരൻ പറഞ്ഞു. സർക്കാരിന്റെ തീരുമാനം കോടതി പുനഃപരിശോധിക്കണം. തീരുമാനം വൈകരുത്- സുധീരൻ പറഞ്ഞു.
മദ്യ കടകൾ കെഎസ്ആർടിസി സ്റ്റാന്റിൽ ആരംഭിക്കാനുള്ള മന്ത്രി ആന്റണി രാജുവിന്റെ ആഗ്രഹം വ്യാമോഹമാണെന്നായിരുന്നു കെസിബിസി മദ്യവിരുദ്ധ സിമിതിയുടെ പ്രതികരണം. മദ്യത്തിന്റെ ഉപഭോഗം കുറയ്ക്കാൻ ഒരു ഭാഗത്തു നിന്നും ശ്രമിക്കുമ്പോൾ മദ്യവിതരണം സുഗമമാക്കാനുള്ള നീക്കം സർക്കാരിന്റെ ഭാഗത്തു നിന്നും ഉണ്ടാകുന്നത് ശരിയല്ല. മന്ത്രിയുടെ നീക്കം കണ്ടാൽ ചങ്ങലയ്ക്ക് ഭ്രാന്ത് പിടിച്ചോയെന്ന് തോന്നുമെന്നും മദ്യവിരുദ്ധ സമിതി വ്യക്തമാക്കി.
കെഎസ്ആർടിസി ഡിപ്പോകളിലെ ഒഴിഞ്ഞു കിടക്കുന്ന മുറികൾ വാടകയ്ക്ക് നൽകുമെന്ന് എല്ലാ വകുപ്പുകളേയും അറിയിച്ചിരുന്നു. ബെവ്കോയേയും അത്തരത്തിൽ അറിയിച്ചിരുന്നു. കെഎസ്ആർടിസി വാടക കെട്ടിടത്തിൽ ബെവ്കോ തുടങ്ങാനുള്ള സന്നദ്ധത ബെവ്കോ അറിയിച്ചിട്ടുണ്ട്. മദ്യവിൽപ്പന യാത്രക്കാർക്ക് ബുദ്ധിമുട്ടുണ്ടാക്കില്ല. കെഎസ്ആർടിസിയുടെ ടിക്കറ്റ് ഇതര വരുമാനം വർദ്ധിപ്പിക്കുന്നതിനാണ് നീക്കമെന്നും മന്ത്രി ആന്റണി രാജു പറഞ്ഞു.
നേരത്തെ ടിക്കറ്റ് ഇതര വരുമാനം വർദ്ധിപ്പിക്കുന്നതിന്റെ ഭാഗമായി കെഎസ്ആർടിസിയുടെ പമ്പുകളിൽ നിന്നും പൊതുജനങ്ങൾക്ക് ഇന്ധനം നിറയ്ക്കാനുള്ള അനുമതി നൽകിയിരുന്നു. ഡിപ്പോകളിൽ ഒഴിഞ്ഞു കിടക്കുന്ന മുറികൾ വാടകയ്ക്ക് നൽകുമെന്ന് കെഎസ്ആർടിസി നേരത്തേതന്നെ വ്യക്തമാക്കിയിട്ടുള്ളതാണ്.
