മറ്റൊരു ദിവസം ഹാജരാകാൻ തയ്യാറാണെന്ന് കുഞ്ഞാലികുട്ടി ഇ.ഡിയെ അറിയിച്ചു. വ്യക്തിപരമായ കാര്യങ്ങൾ മൂലം ഹാജരാകാൻ കഴിയില്ലെന്നാണ് അദ്ദേഹം അറിയിച്ചിരിക്കുന്നത്. എന്നാൽ ഇക്കാര്യത്തിൽ അനുകൂല നിലപാട് സ്വീകരിച്ചിട്ടില്ല. കള്ളപ്പണം വെളുപ്പിക്കൽ ആരോപണത്തിൽ മൊഴി നൽകാൻ കുഞ്ഞാലിക്കുട്ടിയേയും ഏഴാം തീയതി മകൻ ആഷിഖിനെയും ഇ.ഡി വിളിപ്പിച്ചിട്ടുണ്ടെന്ന് എംഎൽഎ വ്യകതമാക്കിയിരുന്നു. ഇ.ഡി ഓഫീസിലെത്തി മൊഴി നല്‍കിയ ശേഷം മാധ്യമങ്ങളോട് സംസാരിക്കുന്നതിനിടെയാണ് അദ്ദേഹം ഇക്കാര്യം വ്യക്തമാക്കിയത്.
കെ ടി ജലീലിൻ്റെ ഭാഗത്ത് നിന്നും പ്രസ്താവന ഉണ്ടായതിന് പിന്നാലെയാണ് ഹാജരാകാൻ കഴിയില്ലെന്ന് പി കെ കുഞ്ഞാലിക്കുട്ടി എൻഫോഴ്സ്മെന്റ് ഡയറക്ടറേറ്റിനെ അറിയിച്ചത്. ചന്ദ്രികയിലെ സാമ്പത്തിക ക്രമക്കേടുമായി ബന്ധപ്പെട്ട് മൊഴി നൽകാൻ ഇ.ഡി നോട്ടീസയച്ച് വിളിപ്പിക്കുകയായിരുന്നു. ചില കാര്യങ്ങൾ അറിയാനുണ്ടെന്ന് വ്യക്തമാക്കിയാണ് വിളിച്ച് വരുത്തിയതെന്നും കെ ടി ജലീൽ പറഞ്ഞു.
“നൽകിയ രേഖകൾക്ക് പുറമേ കുറച്ച് രേഖകൾ കൂടി ആവശ്യമുണ്ടെന്ന് പറഞ്ഞിട്ടുണ്ട്. കുഞ്ഞാലിക്കുട്ടിയെ വെള്ളിയാഴ്ചയും മകൻ ആഷിഖിനെ ഏഴാം തീയതിയും ഇ.ഡി വിളിപ്പിച്ചു എന്നാണ് ഞാൻ മനസിലാക്കുന്നത്. എ.ആർ. നഗർ സഹകരണ ബാങ്കുമായി ബന്ധപ്പെട്ട് വിഷയം ഇപ്പോൾ വന്നിട്ടില്ല. ബാങ്കുമായി ബന്ധപ്പെട്ട കാര്യങ്ങൾ വരുന്നതേയുള്ളൂ. അതുമായി ബന്ധപ്പെട്ട അന്വേഷണ റിപ്പോർട്ട് ഇപ്പോൾ സമർപ്പിച്ചു. ചന്ദിക പത്രത്തേയും മുസ്ലീം ലീഗ് സംഘടനകളെയും സ്ഥാപനങ്ങളെയും മറയാക്കി കള്ളപ്പണം വെളുപ്പിക്കുക, അവിഹിത ധനസമ്പാദനം നടത്തുക എന്നത് കുറച്ച് കാലമായി നടക്കുന്നുണ്ട്. ചന്ദ്രികയുടെ നാലര കോടി ഉപയോഗിച്ച് കോഴിക്കോട് നാലേക്കർ ഭൂമി വാങ്ങി. മുസ്ലീം ലീഗ് ഓഫീസ് നിർമ്മിക്കാനാണ് സ്ഥലം വാങ്ങിയത്” – എന്നും ജലീൽ ആരോപിച്ചു.
രണ്ടേകാല്‍ ഏക്കര്‍ ഭൂമി വാങ്ങിയത് ഹൈദരലി തങ്ങളുടെ പേരിലാണ്. നിർമ്മാണത്തിന് അനുയോജ്യമായ രണ്ടേക്കർ സ്ഥലം വാങ്ങിയത് ഒരു പ്രമുഖ നേതാവിൻ്റെ മകൻ്റെ പേരിലാണ്. ഇത്തവണ അധികാരത്തിലെത്തിയാൽ വെള്ളക്കെട്ടുള്ള സ്ഥലം നികത്താമെന്നായിരുന്നു കരുതിയത്. വെള്ളക്കെട്ടും കണ്ടൽകാടും നിറഞ്ഞ സ്ഥലം നികത്തി കോടികളുടെ അധിക ലാഭത്തിന് വിൽക്കാമെന്ന പ്രതീക്ഷയിലാണ് ഈ നീക്കമെല്ലാം നടത്തിയതെന്നും ജലീൽ വ്യക്തമാക്കി.
പരസ്യമായാണ് കെ ടി ജലീൽ ഇത്തവണ കൊച്ചിയിലെ ഇ.ഡി ആസ്ഥാനത്ത് എത്തിയത്. ബുധനാഴ്ച രാത്രി തിരുവനന്തപുരത്ത് നിന്നും ട്രെയിനിൽ കൊച്ചിയിലെത്തിയ ജലീൽ പിന്നീട്, എംഎൽഎ ബോര്‍ഡ് വച്ച വാഹനം വിളിച്ച് വരുത്തിയാണ് ഇ.ഡി ഓഫീസിൽ എത്തിയത്. എആര്‍ നഗര്‍ സഹകരണ ബാങ്കിനെ മറയാക്കി കള്ളപ്പണം വെളുപ്പിക്കലാണ് കുഞ്ഞാലിക്കുട്ടി നടത്തുന്നത് എന്നായിരുന്നു കെ ടി ജലീലിന്റെ പ്രധാന ആരോപണം. സഹകരണ ബാങ്കിൽ കുഞ്ഞാലിക്കുട്ടിക്ക് 300 കോടി കള്ളപ്പണം ഉണ്ടെന്ന് അദ്ദേഹം ആരോപിച്ചിരുന്നു.
