അബോധാവസ്ഥയിലായ കുഞ്ഞിന് കൃത്രിമ ശ്വാസം നല്‍കി ജീവന്‍ രക്ഷിക്കുകയും തുടര്‍ന്ന് മാതൃകാപരമായി ക്വാറന്റൈനില്‍ പോകുകയും ചെയ്ത ശ്രീജയെ ആരോഗ്യ വകുപ്പിന്റെ നന്ദി അറിയിച്ചുവെന്ന് ഫേസ്ബുക്ക് പോസ്റ്റിലൂടെ ആരോഗ്യ മന്ത്രി വ്യക്തമാക്കി.
“സ്വന്തം ജീവന്‍ പോലും നോക്കാതെ മറ്റുള്ളവരുടെ ജീവന്‍ രക്ഷിക്കാന്‍ രാപ്പകല്‍ സേവനമനുഷ്ഠിക്കുന്നവരാണ് നമ്മുടെ ആരോഗ്യ പ്രവര്‍ത്തകര്‍. ഈ കൊവിഡ് കാലത്ത് നമ്മളറിയാത്ത ഓരോ കഥകള്‍ ഓരോ ആരോഗ്യ പ്രവര്‍ത്തകനും പറയാനുണ്ടാകും. അവരുടെ ആത്മാര്‍ത്ഥ പരിശ്രമങ്ങളാണ് ആരോഗ്യ വകുപ്പിന്റെ കരുത്ത്. കഴിഞ്ഞ ഞായറാഴ്ചയാണ് ഛര്‍ദിച്ച് അവശയായി ശ്വാസതടസം നേരിട്ട കുഞ്ഞുമായി അയല്‍വാസിയായ യുവതി ശ്രീജയുടെ വീട്ടില്‍ ഓടിയെത്തിയത്. കുഞ്ഞ് അബോധാവസ്ഥയിലായതിനാല്‍ ആശുപത്രിയിലെത്തും മുന്‍പ് കൃത്രിമ ശ്വാസം നല്‍കണമെന്ന് ശ്രീജയ്ക്കു മനസിലായി. കുഞ്ഞിന്റെ ജീവന്‍ കരുതി കൊവിഡ് സാധ്യത തല്‍ക്കാലം മറന്ന് കൃത്രിമ ശ്വാസം നല്‍കി. തുടര്‍ന്ന് കുഞ്ഞിനെ ആശുപത്രിയിലെത്തിച്ചു. ശ്രീജ നല്‍കിയ കൃത്രിമ ശ്വാസമാണ് കുട്ടിയെ ഏറെ സഹായിച്ചത്. ആരോഗ്യനില വീണ്ടെടുത്ത കുഞ്ഞ് വീട്ടില്‍ തിരിച്ചെത്തി. കുഞ്ഞിന് കൊവിഡ് സ്ഥിരീകരിച്ചതോടെ ശ്രീജ മാതൃകാപരമായി ക്വാറന്റൈനില്‍ പോയി” – എന്നും മന്ത്രി ഫേസ്ബുക്ക് പോസ്റ്റിലൂടെ വ്യക്തമാക്കി.
ഏഴര മണിക്കൂറില്‍ 893 പേര്‍ക്ക് കൊവിഡ് പ്രതിരോധ വാക്സിന് നല്‍കിയ ചെങ്ങന്നൂര്‍ ജില്ലാ ആശുപത്രിയിലെ ജൂനിയര്‍ പബ്ലിക് ഹെല്‍ത്ത് നഴ്‌സായ പുഷ്പലതയെ മന്ത്രി നേരിട്ടെത്തി അഭിനന്ദിക്കുകയും പൊന്നാടയണിയിച്ച് ആദരിക്കുകയും ചെയ്തിരുന്നു.
നല്ലൊരു ടീംവർക്ക് അവിടെ നടക്കുന്നുണ്ടെന്ന് മന്ത്രി വ്യക്തമാക്കിയിരുന്നു. ജെ.എച്ച്.ഐ.മാരായ വിനീത്, ശ്രീരാജ്, ശ്രീദേവി, സ്റ്റാഫ് നഴ്‌സ് രമ്യ, അനിമോള്‍ എന്നിവരാണ് ടീമിലുള്ളത്. ഇവരെയും ആരോഗ്യ മന്ത്രി വീണാ ജോർജ് അഭിനന്ദിച്ചിരുന്നു.
ഏഴര മണിക്കൂറില്‍ 893 പേര്‍ക്ക് വാക്സിന് നല്‍കിയ സംഭവം വാർത്തകളിൽ സജീവമായതോടെ ആരോപണം ശക്തമായിരുന്നു. വാക്സിൻ വിതരണവുമായി ബന്ധപ്പെട്ട് നൽകുന്ന നിർദേശങ്ങൾ പാലിക്കപ്പെട്ടില്ലെന്നും ശാസ്ത്രീയമായ രീതിയിലല്ല ഇത്രയധികം പേർക്ക് വാക്സിൻ നൽകിയതെന്നുമായിരുന്നു പ്രധാന ആരോപണം. ഏഴര മണിക്കൂറിനുള്ളിൽ എങ്ങനെയാണ് ഒരാൾക്ക് ഇത്രയധികം വാക്സിൻ കുത്തിവെപ്പ് എടുക്കാൻ കഴിഞ്ഞതെന്ന ചോദ്യവും ഉയർന്നിരുന്നു. ശാസ്ത്രീയമായി തന്നെയാണ് വാക്സിൻ നൽകിയതെന്നും റെക്കോർഡിന് വേണ്ടിയല്ല ഇത്രയും വാക്സിൻ കുത്തിവെപ്പ് നടത്തിയതെന്നുമായിരുന്നു പുഷ്പലതയുടെ പ്രതികരണം.
“ടീം വർക്കിൻ്റെ ഭാഗമായിട്ടാണ് ഇത്രയും പേർക്ക് വാക്സിൻ നൽകാൻ സാധിച്ചത്. എട്ട് പേരടങ്ങുന്ന സംഘമാണ് വാക്സിനേഷൻ സംഘത്തിൽ ഉണ്ടായിരുന്നത്. ഇവരുടെ പിന്തുണയാണ് വാക്സിനേഷൻ വേഗത്തിലാക്കാൻ സഹായമായത്. പരാമാവധി വേഗത്തിലാണ് ജോലി ചെയ്യുന്നത്. സാധാരണ കൊവിൻ പോർട്ടലിൽ രജിസ്ട്രേഷൻ ചെയ്യാൻ സമയമെടുക്കാറുണ്ട്. അന്ന് പോർട്ടൽ മികച്ച രീതിയിൽ പ്രവർത്തിച്ചു. ഉച്ചയ്ക്ക്ക് ആഹാരം കഴിക്കാനും ശുചിമുറിയിൽ പോകാനും കുറച്ച് സമയം ചെലവഴിച്ചതൊഴിച്ചാൽ മുഴുവൻ സമയവും വാക്സിനേഷൻ നടന്നു. ഒരാൾക്ക് കുത്തിവയ്ക്കാൻ 20 സെക്കൻഡ് വരെ മാത്രമേ വേണ്ടി വന്നുള്ളൂവെന്നാണ് പുഷ്പലത പറയുന്നത്. വാക്സീൻ നൽകി നല്ല പരിചയമുണ്ടായിരുന്നത് കൊണ്ട് ആശങ്കപ്പെടാൻ ഒന്നുമുണ്ടായിരുന്നില്ല” – എന്നും പുഷ്പലത കഴിഞ്ഞ ദിവസം വ്യക്തമാക്കിയിരുന്നു.
