കൊച്ചി > നഗരസഭാ സെക്രട്ടറിയുടെ നോട്ടീസ് മറികടന്ന് തൃക്കാക്കര നഗരസഭയിൽ ചെയർപേഴ്സൺ അജിത തങ്കപ്പൻ ഓഫീസിൽ പ്രവേശിച്ചു. ഇന്ന് ഉച്ചതിരിഞ്ഞാണ് അജിത തങ്കപ്പൻ ചെയർപേഴ്സന്റെ ഓഫീസിൽ പ്രവേശിച്ചത്. അതേസമയം സംഭവത്തിൽ പ്രതിപക്ഷം പ്രതിഷേധം ശക്തമാക്കി.
പണക്കിഴി വിവാദത്തിൽ തെളിവുകൾ നഷ്ടമാകാതിരിക്കാൻ വിജിലൻസ് നിർദേശപ്രകാരം നഗരസഭാ സെക്രട്ടറിയാണ് ഓഫീസ് നോട്ടീസ് പതിച്ച് സീൽ ചെയ്തത്. ചെയർപേഴ്സന്റെ മുറിയിലെ സിസിടിവി ദൃശ്യങ്ങൾ സംരക്ഷിക്കുന്നതിനായായിരുന്നു നടപടി. ഹാർഡ് ഡിസ്ക്, മോണിറ്റർ, സിപിയു തുടങ്ങിയ ഉപകരണങ്ങൾ തെളിവായി സംരക്ഷിക്കേണ്ടതിനാൽ വിജിലൻസിന്റെ അനുവാദമില്ലാതെ മുറി തുറക്കരുതെന്നായിരുന്നു നോട്ടീസിലെ നിർദേശം.
സംഭവത്തിൽ തുടർനടപടി ഉറപ്പാക്കി കഴിഞ്ഞ ദിവസം അന്വേഷകസംഘം വിജിലൻസ് ഡയറക്ടർക്ക് റിപ്പോർട്ട് കൈമാറിയിരുന്നു. നഗരസഭാ അധ്യക്ഷ അജിത തങ്കപ്പന്റെ ഓഫീസ് മുറിയിൽനിന്ന് പണമടങ്ങിയ കവറുമായി കൗൺസിലർമാർ പുറത്തേക്ക് വരുന്ന സിസിടിവി ദൃശ്യങ്ങളാണ് വിജിലൻസ് ശേഖരിച്ച പ്രധാന തെളിവ്.
ആറു കൗൺസിലർമാരുടെ ദൃശ്യങ്ങളാണ് വിജിലൻസിന് ലഭിച്ചത്. ഓണക്കോടിക്കൊപ്പം ഒരേതരത്തിലുള്ള കവറുമായാണ് എല്ലാവരും പുറത്തേക്ക് വരുന്നത്. ഇതുൾപ്പെടുന്ന റിപ്പോർട്ട് പരിശോധിച്ച് പ്രാഥമികാന്വേഷണത്തിനോ കേസ് രജിസ്റ്റർ ചെയ്തുള്ള തുടർനടപടിക്കോ ഡയറക്ടർ ഉത്തരവിട്ടേക്കും. അഴിമതി നടന്നതിന്റെ തെളിവ് ലഭ്യമായതിനാൽ കേസെടുത്ത് അന്വേഷണത്തിന് ഉത്തരവിടാനാണ് സാധ്യത. അങ്ങനെയെങ്കിൽ അജിത തങ്കപ്പൻ രാജിവയ്ക്കേണ്ടിവരും.
വിജിലൻസ് കേസ് വരുന്നതോടെ അധ്യക്ഷയെ സംരക്ഷിച്ച ജില്ലാ കോൺഗ്രസ് നേതൃത്വവും വെട്ടിലാകും. ഗുരുതര ആരോപണമുയർന്നിട്ടും അജിതയ്ക്കെതിരെ നേതൃത്വം നടപടിക്ക് തയ്യാറായിട്ടില്ല. പകരം, ഗ്രൂപ്പുപോരിന്റെ ഭാഗമാണ് ആരോപണമെന്ന് വരുത്തി അന്വേഷകസമിതിയെ നിയോഗിക്കുകയായിരുന്നു. അജിത തങ്കപ്പനെ വെള്ളപൂശിയുള്ള റിപ്പോർട്ട് കെപിസിസി ഇതുവരെ പരിഗണിച്ചിട്ടില്ല.
പണം എവിടെനിന്ന്; ഉത്തരം പറയേണ്ടിവരും
തുടരന്വേഷണത്തിന് വിജിലൻസ് തീരുമാനിച്ചാൽ അജിത തങ്കപ്പൻ വിതരണം ചെയ്ത പണത്തിന്റെ സ്രോതസ്സ് വെളിപ്പെടുത്തേണ്ടിവരും. അഴിമതിപ്പണമാണ് നൽകിയതെന്ന് തെളിഞ്ഞാൽ ഏഴുവർഷംവരെ ജയിൽശിക്ഷ ലഭിക്കാം. ഓണക്കോടിക്കൊപ്പം 43 കൗൺസിലർമാർക്ക് 10,000 രൂപവീതം നൽകാനുള്ള പണം അധ്യക്ഷയ്ക്ക് എവിടെനിന്ന് കിട്ടിയെന്നാണ് വിജിലൻസ് അന്വേഷിക്കുക. കൗൺസിൽ തീരുമാനത്തിലാണ് പണവിതരണമെങ്കിൽ, അതിന്റെ മിനിറ്റ്സും രേഖകളും ധനവകുപ്പിന്റെ അംഗീകാരപത്രവും സെക്രട്ടറിയുടെ ഉത്തരവും ഹാജരാക്കേണ്ടിവരും. ഒരുവിഭാഗം കൗൺസിലർമാർ തിരികെ നൽകിയതിനാൽ പണം നഗരസഭയുടേതല്ലെന്ന് ഉറപ്പാണ്.
