തിരുവനന്തപുരം: തിരുവനന്തപുരം നെടുമങ്ങാട് യുവതിയെ ആൺ സുഹൃത്ത് കുത്തി പരിക്കേൽപ്പിച്ചു. ഗുരുതരമായി പരിക്കേറ്റ യുവതിയെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ആര്യനാട് സ്വദേശിയായ പ്രതി അരുണിനെ വലിയമല പോലീസ് പിടികൂടിയിട്ടുണ്ട്.
ഉച്ചയ്ക്ക് രണ്ടരയോടെയാണ് സംഭവം. വാടക വീട്ടിൽ താമസിക്കുന്ന യുവതിക്കെതിരെയാണ് ആക്രമണം ഉണ്ടായത്. 15 ഓളം തവണ കുത്തേറ്റ യുവതിയുടെ നില ഗുരുതരമാണെന്നാണ് ആശുപത്രിയിൽ നിന്ന് ലഭിക്കുന്ന വിവരം.
ആക്രമണത്തിന് ശേഷം സമീപത്തെ മറ്റൊരു വീടിന് മുകളിൽ കയറിയ അരുണിനെ നാട്ടുകാർ ചേർന്നാണ് പിടികൂടിയത്. യുവതിയുടെ പിതാവിന്റെ നിലവിളി കേട്ടാണ് സമീപവാസികൾ ആക്രമണ വിവരം അറിയുന്നത്.
