“ദുരിതമനുഭവിക്കുന്നവന് സഹായഹസ്തം നീട്ടുന്നതിൻ്റെയും മഹാമാരി കാലത്തെ പാരസ്പര്യത്തിൻ്റെയും സ്നേഹത്തിൻ്റെയും സാഹോദര്യത്തിൻ്റെയും ദിനമാകട്ടെ ശ്രീകൃഷ്ണ ജയന്തി. കൃഷ്ണ സങ്കൽപങ്ങളിലെ നന്മയും നീതി ബോധവും അശരണരോടുള്ള പ്രതിപത്തിയും സമൂഹത്തിൻ്റെയാകെ ഹൃദയത്തോട് ചേർത്തുവെക്കാൻ ഈ ദിനത്തിന് കഴിയട്ടെ. ഏവർക്കും ശ്രീകൃഷ്ണ ജയന്തി ആശംസകൾ.”
Also Read:
കൊവിഡ് 19 കാലത്തെ പ്രത്യേക സാഹചര്യത്തിലാണ് സംസ്ഥാനത്ത് ശ്രീകൃഷ്ണജയന്തി ആഘോഷങ്ങൾ നടക്കുന്നത്. കൊവിഡ് 19 മൂന്നാം തരംഗത്തിൻ്റെ ഭീഷണി നിലനിൽക്കുന്നതിനാൽ അതീവജാഗ്രതയിലാണ് സംസ്ഥാന സർക്കാർ. ഓണക്കാലത്തെ ഇളവുകൾക്കു പിന്നാലെ പല മേഖലകളിലും കൊവിഡ് രോഗികളുടെ എണ്ണവും ടിപിആറും കുതിച്ചുയർന്നതോടെ ഇന്നു മുതൽ രാത്രികാല കർഫ്യൂ അടക്കമുള്ള നിയന്ത്രണങ്ങൾ നടപ്പാക്കുന്നുണ്ട്. കടകളിൽ സാമൂഹിക അകലം ഉറപ്പു വരുത്താനും പ്രാദേശിക ലോക്ക് ഡൗണുകള്‍ നടപ്പാക്കുന്നതിൽ സഹകരണം ഉറപ്പാക്കുന്നതിനുമായി സര്‍ക്കാര്‍ വ്യാപാരികളുമായും ചര്‍ച്ച നടത്തും. കൊവിഡ് സാഹചര്യത്തിൽ മുൻവര്‍ഷങ്ങളിലേതു പോലെ ശോഭായാത്രയോ കൂട്ടം കൂടിയുള്ള ആഘോഷങ്ങളോ ഈ വര്‍ഷമില്ല. വീടുകള്‍ക്കുള്ളിലായിരിക്കും ആഘോഷങ്ങള്‍.
Also Read:
കൊവിഡ് 19 മാനദണ്ഡങ്ങള്‍ പാലിച്ച് ശ്രീകൃഷ്ണജയന്തി ആഘോഷങ്ങള്‍ നടത്തുന്നതിൻ്റെ ഭാഗമായി അയൽപ്പക്കത്തെ നാലു കടുംബങ്ങള്‍ ഒരുമിച്ചു ചേര്‍ത്തു രൂപീകരിക്കുന്ന അമ്പാടിമുറ്റത്തായിരിക്കും കുട്ടികള്‍ ശോഭായാത്ര നടത്തുക. ഇതിനായി ബാലഗോകുലം ഇതിനോടകം നിര്‍ദേശം പുറപ്പെടുവിച്ചിട്ടുണ്ടെന്നാണ് മനോരമ റിപ്പോര്‍ട്ട്. വീട്ടുമുറ്റങ്ങളിൽ കൃഷ്ണകുടീരങ്ങള്‍ തയ്യാറാക്കാനും ഉറിയും ഊഞ്ഞാലും കെട്ടാനുമാണ് നിര്‍ദേശം.
