തിരുവനന്തപുരം: കാലഘട്ടത്തിന് ചേരാത്ത പ്രസ്താവനയാണ് കൊടിക്കുന്നിൽ സുരേഷിന്റേതെന്ന് മന്ത്രി കെ.രാധാകൃഷ്ണൻ. തന്റെ കാര്യം നോക്കാൻ തനിക്കറിയാമെന്ന് പാർട്ടിക്ക് നല്ല ബോധ്യമുള്ളതുകൊണ്ടാണ് 1996ൽ ഇതിലും ചെറുപ്പത്തിൽ തന്നെ മന്ത്രിയാക്കിയതെന്നുംഅദ്ദേഹം പറഞ്ഞു. അത് എങ്ങനെയാണ് താൻ കൈകാര്യം ചെയ്തതെന്ന് ജനങ്ങൾക്കും പാർട്ടിക്കും അറിയാമെന്നും അതിന് കൊടിക്കുന്നിൽ സുരേഷിന്റെ സർട്ടിഫിക്കറ്റ് ആവശ്യമില്ലെന്നും അദ്ദേഹം കൂട്ടിച്ചേർത്തു.
പട്ടികജാതിക്കാരനായ ഒരു മന്ത്രിക്ക് ദേവസ്വം വകുപ്പ് കൊടുത്തതിനെ കൊട്ടിഗ്ഘോഷിക്കുകയും അതേസമയം മന്ത്രിയെ നിയന്ത്രിക്കാൻ പിണറായി വിജയൻ തന്റെ മനഃസാക്ഷി സൂക്ഷിപ്പുകാരനെ നിയമിക്കുകയും ചെയ്തെന്ന് നേരത്തെ കൊടിക്കുന്നിൽ സുരേഷ് നേരത്തെ ആരോപിച്ചിരുന്നു. ഭരണത്തുടർച്ചയുണ്ടായതും വളരെ മികച്ച രീതിയിലുള്ള പ്രവർത്തനങ്ങൾ നടത്തുന്നതിനാലും അസൂയയുണ്ടാകാൻ സാധ്യതയുണ്ടെന്നും അതിനാൽ മുഖ്യമന്ത്രി പിണറായി വിജയനെ തേജോവധം ചെയ്യാനുള്ള പ്രവർത്തനങ്ങൾ പല ഭാഗത്തുനിന്നും ഉണ്ടാകുമെന്നും മന്ത്രി കെ.രാധാകൃഷ്ണൻ പറഞ്ഞു.
കോൺഗ്രസിനുള്ളിൽ ഇപ്പോൾ നടക്കുന്ന തമ്മിലടി മറച്ചുവയ്ക്കാൻ വേണ്ടിയുള്ള ബോധപൂർവ്വമായ ശ്രമമാണ് മുഖ്യമന്ത്രിയുടെ കുടുംബത്തെ വരെ പരാമർശിച്ചുകൊണ്ടുള്ള കൊടിക്കുന്നിൽ സുരേഷിന്റെ ഈ വിവാദ പ്രസ്താവനകൾക്ക് പിന്നിലെന്നും അദ്ദേഹം ചൂണ്ടിക്കാട്ടി. പിണറായി വിജയൻ നവോത്ഥാന നായകനായിരുന്നുവെങ്കിൽ മകളെ പട്ടികജാതിക്കാരന് കല്യാണം കഴിച്ചുകൊടുക്കണമായിരുന്നുവെന്ന കൊടിക്കുന്നിൽ സുരേഷിന്റെ പ്രസ്താവന വിവാദമായിരുന്നു.
Content highlights: Minister KRadhakrishnan responds to the controversial statements by kodikkunnil suresh
