കേസിൽ ആദ്യ അന്വേഷണ സംഘം വിട്ടയച്ച യുവതിക്കുമുള്ള പങ്കിനെക്കുറിച്ച് ശാസ്ത്രീയ അന്വേഷണം നടത്തുമെന്ന് എക്സൈസ് ക്രൈംബ്രാഞ്ച് അസിസ്റ്റന്റ് കമ്മീഷണര്‍ മുഹമ്മദ് കാസിമിനെ ഉദ്ധരിച്ച് മനോരമ ന്യൂസ് റിപ്പോര്‍ട്ട് ചെയ്യുന്നു. യുവതിയുടെ പങ്കിനെക്കുറിച്ച് ശാസ്ത്രീയമായ അന്വേഷണം നടത്തുമെന്നും എന്നാൽ, നിരീക്ഷണത്തിൽ കഴിയുന്ന യുവതിയെ തൽക്കാലം അറസ്റ്റ് ചെയ്യില്ലെന്നും അന്വേഷണ സംഘം അറിയിച്ചു.
Also Read :
പിടിച്ചെടുത്ത ലഹരിമരുന്നിന്റെ ഉറവിടം തേടിയാണ് അന്വേഷണം മറ്റ് സംസ്ഥാനങ്ങളിലേക്ക് വ്യാപിപ്പിക്കുന്നത്. ഇത്രയധികം അളവിൽ ലഹരിമരുന്ന് എവിടെ നിന്നാണ് ലഭിച്ചത് എന്നാണ് പ്രധാനമായും പരിശോധിക്കുന്നത്. അറസ്റ്റിലാകുന്നതിന് മുൻപുള്ള ദിവസങ്ങളിലെ കോള്‍ റെക്കോഡുകളും അന്വേഷണ സംഘം പരിശോധിക്കും.
പ്രതികളുടെ കാക്കനാട്ടിലെ ഫ്ലാറ്റിൽ നടത്തിയ പരിശോധനയിൽ എക്സൈസ് ക്രൈംബ്രാഞ്ച് സംഘം ഫ്ലാറ്റിൽ നിന്നും പ്രതികളുടെ ലാപ്ടോപ്പും കസ്റ്റഡിയിലെടുത്തു. നേരത്തെ ലഹരിമരുന്ന് കേസ് അട്ടമറിച്ച സംഭവത്തിൽ എക്സൈസ് ഉദ്യോഗസ്ഥര്‍ക്കെതിരെ നടപടിയെടുത്തിരുന്നു. കേസ് അട്ടമറിക്കാൻ ശ്രമിച്ചെന്ന ആരോപണത്തിലാണ് അഡീഷണൽ കമ്മീഷണര്‍ അബ്ദുൾ റാഷി അന്വേഷണ റിപ്പോര്‍ട്ട് സമര്‍പ്പിച്ചത്.
നടപടി ക്രമങ്ങൾ പാലിച്ചില്ല. കേസ് സംബന്ധിച്ച് ഉന്നത ഉദ്യോഗസ്ഥരുമായി കൃത്യമായ ആശയവിനിമയം നടത്തുകയോ നിർദേശങ്ങള്‍ സ്വീകരിക്കുകയോ ചെയ്തിട്ടില്ലെന്നും റിപ്പോര്‍ട്ടിൽ പറയുന്നു.
അതേസമയം, കസ്റ്റഡിയിലെടുത്ത യുവതിയെ കേസിൽ നിന്നും ഒഴിവാക്കിയത് കാമുകനായ പ്രതി കേണപേക്ഷിച്ചത് കാണമാണെന്ന റിപ്പോര്‍ട്ടും പുറത്തുവരുന്നുണ്ട്. മയക്കുമരുന്ന് വ്യാപാരത്തെക്കുറിച്ച് കാമുകിക്ക് ഒന്നും അറിയില്ലെന്നും താൻ ആവശ്യപ്പെട്ട പ്രകാരം അപ്പാ‍ർട്ടമെന്റിൽ വന്നതാണെന്നുമാണ് ഇയാള്‍ പറഞ്ഞത്. കാമുകിയായ യുവതിക്ക് രണ്ട് കുട്ടികളുള്ളതാണെന്നും കേസിൽ കുടുക്കിയാൽ കഷ്ടമാകുമെന്നെല്ലാം പറഞ്ഞതോടെ എക്സൈസ് ഉദ്യോഗസ്ഥരുടെ മനസ്സലിഞ്ഞു.
പിന്നീട്, മയക്കുമരുന്ന് ഒളിപ്പിക്കുന്നതിന്റെ സിസിടിവി ക്യാമറ ദൃശ്യങ്ങള്‍ പുറത്തുവന്നിരുന്നു. കേസിലെ പ്രതിയായ ശബന മയക്കുമരുന്ന് അടങ്ങുന്ന കവര്‍ എടുത്തുകൊണ്ട് പോകുമ്പോഴും യുവതി അരികിൽ നിൽക്കുന്നത് സിസിടിവി ദൃശ്യങ്ങളിലുണ്ട്. അതിനാൽ തന്നെ മയക്കുമരുന്ന് ഒളിപ്പിച്ച കാര്യം യുവതിക്ക് അറിയാമെന്നാണ് കരുതുന്നത്.
Also Read :
അതേസമയം, കൂടെയുണ്ടായിരുന്ന മറ്റൊരു യുവാവിനെ എന്തുകൊണ്ട് കേസിൽ നിന്ന് ഒഴിവാക്കിയെന്ന കാര്യത്തിൽ ഇപ്പോഴും വ്യക്തതയില്ല. കേസുമായി ബന്ധപ്പെട്ട നിർണായക വിവരങ്ങള്‍ നൽകാമെന്ന ഉറപ്പിൽ കേസിൽ പിടിയിലാകുന്ന ചിലരെ ഒഴിവാക്കുന്ന രീതി എക്സൈസിനും പോലീസിനുമുണ്ട്.
