പ്ലസ് വണ്‍ അലോട്ട്മെന്റ് പരിശോധിക്കാന്‍ ഇന്‍റര്‍നെറ്റ് റേഞ്ച് തേടി മരത്തില്‍ കയറിയ കണ്ണൂരില്‍ നിന്നുള്ള ആദിവാസി വിദ്യാര്‍ഥി അനന്തു ബാബു ഇപ്പോള്‍ പരിയാരം മെഡിക്കല്‍ കോളേജില്‍ ചികിത്സയിലാണ്.
20 അടിയോളം ഉയരത്തിലുള്ള മരത്തിനു മുകളില്‍ നിര്‍മിച്ച ഏറുമാടത്തിനും മുകളില്‍ നിന്ന് അനന്തു പാറക്കൂട്ടത്തിലേക്ക് വീണു — അനന്തുവിന്‍റെ പിതാവ് പി. ബാബു സമയം മലയാളത്തോട് പറഞ്ഞു.
നട്ടെല്ലിനും കാലിനും പരിക്കേറ്റ അനന്തുവിന്‍റെ ആരോഗ്യനില തൃപ്‍തികരമാണെന്ന് ഡോക്ടര്‍മാര്‍ പറഞ്ഞതായി കുടുംബം പറയുന്നു. വയറില്‍ വേദനയുള്ളതായി അനന്തു പറയുന്നുണ്ട് – പിതാവ് പറയുന്നു.
കണ്ണൂര്‍ ജില്ലയിലെ കണ്ണവം റിസര്‍വ്വ് ഫോറസ്റ്റിനുള്ളില്‍ സ്ഥിതി ചെയ്യുന്ന പന്നിയോട് ആദിവാസി സെറ്റില്‍മെന്‍റ് കോളനിയിലാണ് അനന്തുവിന്‍റെ വീട്. ഈ പ്രദേശത്ത് മൊബൈല്‍ ഫോണിന് റേഞ്ച് ഇല്ല. ബാബുവിന്‍റെ മൂന്നു മക്കള്‍ക്ക് ആകെയുള്ളത് ഒരു ഫോൺ. പഠനത്തിന്‍റെ ഭാഗമായി അധ്യാപകര്‍ അയച്ചു നല്‍കുന്ന വിവരങ്ങളെല്ലാം മരത്തിന് മുകളില്‍ കയറിയാണ് ഡൗണ്‍ലോഡ് ചെയ്യുക, ശേഷം വീട്ടിലെത്തി അവ കേട്ടും കണ്ടും വായിച്ചും പഠിക്കും. ഓൺലൈൻ പഠനത്തിന്‍റെ തടസ്സങ്ങള്‍ പരിഹരിക്കണം എന്നാവശ്യപ്പെട്ട് വിദ്യാര്‍ഥികള്‍ നേരത്തെ ജില്ലാ കളക്ടര്‍ക്ക് നിവേദനം നല്‍കിയിരുന്നു.
*
കേരളത്തിലെ ഓൺലൈൻ സ്‍കൂള്‍ വിദ്യാഭ്യാസത്തിന്‍റെ ഭാഗമാകാന്‍ അനന്തുവിനെപ്പോലെ ആദിവാസി മേഖലകളില്‍ നിന്നുള്ള വിദ്യാര്‍ഥികള്‍ കഷ്ടപ്പെടുകയാണ്. ഇടുക്കിയില്‍ മാത്രം 14,000 വിദ്യാര്‍ഥികള്‍ ഓൺലൈന്‍ വിദ്യാഭ്യാസത്തിന് തടസ്സം നേരിടുന്നുണ്ടെന്ന് ജൂണില്‍
റിപ്പോര്‍ട്ട് ചെയ്‍തിരുന്നു. ഇടുക്കി രാജമലയില്‍ വിദ്യാര്‍ഥികള്‍ ദിവസവും ആറ് കിലോമീറ്റര്‍ സഞ്ചരിച്ചാണ് റേഞ്ച് ഉള്ള ഒരു പൊതുസ്ഥലം പഠിക്കാനായി കണ്ടെത്തുന്നത് – ഒരു
റിപ്പോര്‍ട്ട് പറയുന്നു.
ഈ ഡിജിറ്റല്‍ വേര്‍തിരിവ് (Digital divide) ഇതിനോടകം സര്‍ക്കാരിന്‍റെ ശ്രദ്ധയില്‍പ്പെട്ടിരുന്നു. സംസ്ഥാനത്തെ മുഴുവന്‍ വിദ്യാര്‍ഥികള്‍ക്കും ഇന്‍റര്‍നെറ്റും ഡിജിറ്റല്‍ ഡിവൈസുകളും നല്‍കുമെന്നായിരുന്നു മുഖ്യമന്ത്രി പിണറായി വിജയന്‍ ജൂണില്‍ പറഞ്ഞത് – വാര്‍ത്താ ഏജൻസി പി.ടി.ഐ റിപ്പോര്‍ട്ടു ചെയ്യുന്നു.
“ഇന്‍റര്‍നെറ്റ് സേവനദാതാക്കളുടെ യോഗം വിളിച്ചിട്ടുണ്ട്. എത്രയും വേഗം ഇത് (വിദ്യാര്‍ഥികള്‍ക്ക് പഠനസൗകര്യം ഉറപ്പാക്കാന്‍) നടപ്പിലാക്കാന്‍ വിവിധ മേഖലകളിലുള്ളവരുടെ കൂട്ടായ പ്രവര്‍ത്തനം വേണം. ഞങ്ങളുടെ ലക്ഷ്യം കുട്ടികള്‍ക്ക് ഓൺലൈൻ ആയി വിദ്യാഭ്യാസം നേടാന്‍ ഒരു തടസ്സവും ഇല്ലാത്ത സാഹചര്യം ഒരുക്കുകയാണ്” മുഖ്യമന്ത്രി നിയമസഭയില്‍ പറഞ്ഞതായി പി.ടി.ഐ റിപ്പോര്‍ട്ട് ചെയ്യുന്നു.
*
അനന്തു ഉള്‍പ്പെടുന്ന പന്നിയോട് കോളനിയില്‍ മൊത്തം 115 കുടുംബങ്ങളാണുള്ളത്. 72 വിദ്യാര്‍ഥികളുള്ള ഇവിടെ വേണ്ടത്ര മൊബൈല്‍ റെയിഞ്ചില്ലാത്തത് പഠനത്തെ പ്രതികൂലമായി ബാധിക്കുന്നുണ്ടെന്ന് ചിറ്റാരിപ്പറമ്പ് ഗ്രാമപഞ്ചായത്ത് പ്രസിഡന്‍റ് വി. ബാലന്‍ സമയം മലയാളത്തോട് പറഞ്ഞു
കോളനിയിലെ ഉയര്‍ന്ന പ്രദേശങ്ങളില്‍ മാത്രമാണ് മൊബൈലിന് റെയിഞ്ചുള്ളത്. പ്രശ്‌നങ്ങള്‍ പരിഹരിക്കണമെന്ന് ജില്ലാ കളക്ടറോട് അഭ്യര്‍ത്ഥിച്ചിരുന്നു. അതിന് ശേഷം ബി.എസ്. എന്‍.എല്‍ അധികൃതര്‍ സ്ഥലം സന്ദര്‍ശിച്ചെങ്കിലും നടപടികള്‍ പുരോഗമിച്ചിട്ടില്ല – വി. ബാലൻ പറയുന്നു.
വിദ്യാര്‍ഥികളെല്ലാം നന്നായി പഠിക്കുന്നവരാണ്. കേരളാ വിഷന്‍ ചില സൗകര്യങ്ങള്‍ ഒരുക്കാമെന്ന് പറഞ്ഞിട്ടുണ്ട്. ഇന്‍റര്‍നെറ്റ് സൗകര്യം ഒരുക്കാനായി കേബിള്‍ ഇടാന്‍ വനം വകുപ്പിന്‍റെ അനുമതിയും തേടിയിട്ടുണ്ട്. അനുമതി നല്‍കാമെന്ന് വനംവകുപ്പ് പറഞ്ഞിട്ടുണ്ട്. വിദ്യാര്‍ഥികളുടെ പഠനം മെച്ചപ്പെടുത്താന്‍ പഠനഗൃഹം പ്രവര്‍ത്തിക്കുന്നുണ്ട് — പഞ്ചായത്ത് പ്രസിഡന്‍റ് പറഞ്ഞു.
പത്താം ക്ലാസ് പാസായ അനന്തു ഇന്നലെ ഉച്ചയോടെയാണ് പ്ലസ് വണ്‍ അലോട്ട്മെന്റ് പരിശോധിക്കാന്‍ മരത്തില്‍ കയറിയത്. മരത്തില്‍ നിന്ന് വീണ് പരിക്കേറ്റ് ഉടനടി ഓട്ടോറിക്ഷയില്‍ കൂത്തുപറമ്പ് താലൂക്ക് ആശുപത്രിയിലേക്ക് കൊണ്ടുപോയി. ശേഷം ജില്ലാ ആശുപത്രിയിലേക്ക് മാറ്റി. പിന്നീടാണ് പരിയാരം മെഡിക്കല്‍ കോളേജ് ആശുപത്രിയിലേക്ക് മാറ്റിയത്. – അനന്തുവിന്‍റെ കുടുംബം പറഞ്ഞു.
ആനയും പന്നിയുമടക്കമുള്ള വന്യജീവികളെയും നേരിട്ടാണ് പന്നിയോട് നിവാസികള്‍ ജീവിതം മുന്നോട്ടുകൊണ്ടുപോവുന്നത്. അപകടങ്ങളോ രോഗങ്ങളോ ഉണ്ടായാല്‍ കിലോമീറ്ററുകള്‍ സഞ്ചരിച്ചു വേണം ചികില്‍സ നേടാന്‍.
അനന്തുവിന്‍റെ അപകടം ഒരു ഒറ്റപ്പെട്ട സംഭവമാണെന്നാണ് കണ്ണൂര്‍ ജില്ലാ കലക്ടര്‍ ടി.വി സുഭാഷ് ഒരു ഇംഗ്ലീഷ് വാര്‍ത്താ പോര്‍ട്ടലിനോട് പറഞ്ഞത്. ഇന്‍റര്‍നെറ്റ് കണക്റ്റിവിറ്റി ഉറപ്പുവരുത്താന്‍ ശ്രമിക്കുന്നുണ്ട്. ഇതിന് സമയമെടുക്കുമെന്നും കളക്ടര്‍ പറഞ്ഞതായി
ഓൺമനോരമ റിപ്പോര്‍ട്ടു ചെയ്യുന്നു.
****
(Additional inputs: വി.എം അഭിജിത്ത്)
