കൊച്ചി > കേരള സ്റ്റേറ്റ് കര്ഷക തൊഴിലാളി യൂണിയന് (കെഎസ്കെടിയു) എറണാകുളം ജില്ലാ കമ്മിറ്റി പ്രസിഡന്റ് അസീസ് റാവുത്തര് (70) അന്തരിച്ചു. ഹൃദയാഘാതത്തെ തുടര്ന്ന് വ്യാഴാഴ്ച ഉച്ചയ്ക്ക് 12 മണിയോടെയായിരുന്നു അന്ത്യം. രണ്ടാഴ്ചയായി ചികിത്സയിലായിരുന്നു. സിപിഐ എം കോതമംഗലം ഏരിയാ കമ്മിറ്റിയംഗമാണ്.
കെഎസ്കെടിയു ജില്ലാ പ്രസിഡന്റായിരിക്കെ എം കെ മോഹനന് കഴിഞ്ഞ മെയ് 19ന് കോവിഡ് ബാധിച്ച് മരണപ്പെട്ടതിനെ തുടര്ന്നാണ് അസീസ് റാവുത്തര് പകരം ചുമതല വഹിച്ചത്.
അഞ്ചുപതിറ്റാണ്ടിലേറെയായി കോതമംഗലത്തെ നിറസാന്നിധ്യമാണ് അസീസ് റാവുത്തര്. മുന് ജില്ലാപഞ്ചായത്തഗം, നെല്ലിക്കുഴി പഞ്ചായത്ത് പ്രസിഡന്റ്, നിരവധി യൂണിയനുകളുടെ ഭാരവാഹിത്വം- തുടങ്ങിയ ചുമതലകള് വഹിച്ചിട്ടുണ്ട്.
