‘ഇഎംഎസിൻ്റെ കുടുംബം വാരിയംകുന്നൻ്റെ ആക്രമണത്തിന് ഇരയായി’; സ്മാരകമുണ്ടാക്കുന്നത് വിഡ്ഡിത്തമെന്ന് അബ്ദുള്ളക്കുട്ടി

തിരുവനന്തപുരം: വാരിയംകുന്നൻ കേരളത്തിലെ ആദ്യ താലിബാൻ തലവനാണെന്ന് ബിജെപി നേതാവ് എപി അബ്ദുള്ളക്കുട്ടി. വാരിയംകുന്നത്ത് കുഞ്ഞമഹമ്മദ് ഹാജിയുടെ പേരിൽ സ്മാരകമുണ്ടാക്കുന്നതെന്നും വാരിയംകുന്നൻ നടത്തിയത് സ്വാതന്ത്ര്യസമരമാണെന്നു പറഞ്ഞു കൊട്ടിഘോഷിക്കുന്നതും ചരിത്രത്തോടു കാണിക്കുന്ന ക്രൂരതയാണെന്നും അബ്ദുള്ളക്കുട്ടി പറഞ്ഞു.

വാരിയംകുന്നൻ്റെ ആക്രമണത്തിന് ഇഎംഎസ് കുടുംബവും ഇരകളായിരുന്നുവെന്ന് ബിജെപി ദേശീയ ഉപാധ്യക്ഷൻ പറഞ്ഞു. ഇക്കാര്യം വാരിയംകുന്നന് സ്മാരകം പണിയാൻ നടക്കുന്ന ടൂറിസം മന്ത്രി പി എ മുഹമ്മദ് റിയാസ് മനസ്സിലാക്കണമെന്നും അദ്ദേഹം കൂട്ടിച്ചേര്‍ത്തു.

Also Read:

ഇത് രണ്ടാം തവണയാണ് അബ്ദുള്ളക്കുട്ടി വാരിയംകുന്നത്ത് കുഞ്ഞമഹമ്മദ് ഹാജിയെ താലിബാനോടു ഉപമിക്കുന്നത്. വാരിയംകുന്നനെ മഹത്വവത്കരിക്കുന്ന സിപിഎം നിലപാട് ചരിത്രപരമായ വിഡ്ഡിത്തമാണെന്നായിരുന്നു അബ്ദുള്ളക്കുട്ടി മുൻപ് നടത്തിയത്. കേരളത്തിൽ അക്കാലത്ത് ക്രൂരമായ വംശഹത്യ നടന്നെന്നും മാപ്പിള ലഹള സ്വാതന്ത്ര്യസമരമല്ലെന്നും അത് ഹിന്ദുവേട്ടയായിരുന്നുവെന്നും കണ്ണൂരിൽ വെച്ച് അബ്ദുള്ളക്കുട്ടി പറഞ്ഞിരുന്നു. വിവാദ പരാമര്‍ശത്തിന് ഒരാഴ്ചയ്ക്ക് ശേഷമാണ് വീണ്ടും സമാനമായ പ്രതികരണം.

Also Read:

കേരളം ദേശവിരുദ്ധ പ്രസ്ഥാനങ്ങളുടെ കേന്ദ്രമാണെന്നു വിശേഷിപ്പിച്ച അബ്ദുള്ളക്കുട്ടി ഇഎംഎസ് രചിച്ച സ്വാതന്ത്ര്യസമരം എന്ന സമ്പൂര്‍ണഗ്രന്ഥം വായിക്കണമെന്നും വാരിയംകുന്നൻ കാരണം ഇഎംഎസിൻ്റെ കുടുംബത്തിന് ഏലംകുളത്തു നിന്ന് പാലക്കാട്ടേയ്ക്ക് പലായനം ചെയ്യേണ്ടി വന്നിട്ടുണ്ടെന്നും ആരോപിച്ചു.