തൃശ്ശൂർ: 60 അടി വലിപ്പത്തിൽ ശ്രീനാരായണഗുരുവിന്റെ ഛായാചിത്രം പൂക്കൾ ഉപയോഗിച്ച് നിർമിച്ചു. എസ്.എൻ.ഡി.പി കൊടുങ്ങല്ലൂർ യൂണിയനാണ് ശ്രീനാരായണഗുരു ജയന്തിയോടനുബന്ധിച്ച് ഇത്തരമൊരു ഛായാചിത്രം തയ്യാറാക്കിയത്. ഡാവിഞ്ചി സുരേഷ് ആണ് ഛായാചിത്രം തയ്യാറാക്കിയത്. കൊടുങ്ങല്ലൂർ കായൽ തീരത്തുള്ള കേബീസ് ദർബാർ കൺവെൺഷൻ സെന്ററിന് മുന്നിലാണ് പൂക്കൾ കൊണ്ടുള്ള സൃഷ്ടി.
ഓറഞ്ച് ചെണ്ടുമല്ലി, മഞ്ഞ ചെണ്ടുമല്ലി, മഞ്ഞ ജെമന്തി, വെള്ള ജെമന്തി, ചില്ലിറോസ്, അരളി, ചെത്തിപ്പൂ, വാടാമല്ലി എന്നീ പൂക്കൾ ഉപയോഗിച്ചാണ് ഛായാചിത്രം തയ്യാറാക്കിയത്. ഒരു ടൺ പൂക്കളാണ് ഇതിനായി ഉപയോഗിച്ചത്. എട്ട് മണിക്കൂർ കൊണ്ടാണ് ഛായാചിത്രം പൂർത്തിയാക്കിയത്.
എസ്. എൻ.ഡി.പി. യോഗം കൊടുങ്ങല്ലൂർ യൂണിയൻ സെക്രട്ടറി പി.കെ.രവീന്ദ്രൻ , യോഗം കൗൺസിലർ ബേബി റാം, യൂണിയൻ വൈസ് പ്രസിഡന്റ് ജയലക്ഷ്മി ടീച്ചർ,ഡയറക്ടർ ബോർഡ് അംഗങ്ങൾ, യൂണിയൻ കൗൺസിൽ അംഗങ്ങൾ എന്നിവർ പരിപാടിക്ക് നേതൃത്വം നൽകി.
