കൊച്ചി: സിറോമലബാർ സഭയ്ക്കെതിരെ എറണാകുളം അങ്കമാലി രൂപതയുടെ മുഖപത്രം സത്യദീപം. സിനഡ് ഇപ്പോൾ ചർച്ച ചെയ്യേണ്ടത് കുർബാനയുടെ ഏകീകരണമല്ലെന്നും വിവാദ ഭൂമി ഇടപാടിലെ അഴിമതിയാണെന്നും പറയുന്നു. ചിലർ നടത്തിയ റിയൽ എസ്റ്റേറ്റ് ഇടപാട് കാരണം ആദായ നികുതി വകുപ്പിന് പിഴയായി നൽകേണ്ടി വന്നത് 5.84 കോടി രൂപയാണെന്നും സത്യദീപം കുറ്റപ്പെടുത്തുന്നു.
ഭൂമി വിൽപ്പന സംബന്ധിച്ച ക്രമക്കേട് സിനഡ് ചർച്ച ചെയ്യണമെന്നും കുർബ്ബാനയുടെ ഏകീകരണം സംബന്ധിച്ച് ചർച്ച നടത്തുന്നത് കണ്ണിൽ പൊടിയിടാനാണെന്നും സത്യദീപം പറയുന്നു.
“എറണാകുളം-അങ്കമാലി മേജര്‍ അതിരൂപതയില്‍ നടന്ന ഭൂമി വില്പന അഴിമതിയുമായി ബന്ധപ്പെട്ട് സിനഡ് എടുത്തതും എടുക്കാതിരുന്നതുമായ നിലപാടുകളുടെ ദാരിദ്ര്യമാണ് സഭ ഇപ്പോള്‍ അഭിമുഖീകരിക്കുന്ന യഥാര്‍ത്ഥ സ്വത്വ പ്രതിസന്ധി. അല്ലാതെ കിഴക്കോട്ട് തിരിഞ്ഞാല്‍ മാത്രം പൂര്‍ണ്ണമാകുന്ന അസ്തിത്വ പ്രശ്‌നമല്ല.”
“യഥാര്‍ത്ഥ പ്രശ്‌നങ്ങളെ മറയ്ക്കാന്‍ തരാതരം ആരാധനാ ക്രമത്തെ വിവാദമാക്കുന്നവരാണ് സഭയില്‍ യഥാര്‍ത്ഥത്തില്‍ പ്രശ്‌നങ്ങള്‍ സൃഷ്ടിക്കുന്നത് എന്നതാണ് വാസ്തവം.” സത്യദീപം കുറ്റപ്പെടുത്തുന്നു.
