ലണ്ടൻ
തുടർച്ചയായ അഞ്ചാംസീസണിലും മുഹമ്മദ് സലാ ഗോളടിച്ച് തുടങ്ങി. സലായുടെ തകർപ്പൻ പ്രകടനത്തിന്റെ ബലത്തിൽ ലിവർപൂൾ ഇംഗ്ലീഷ് പ്രീമിയർ ലീഗിൽ വിജയത്തുടക്കം കുറിച്ചു. മൂന്ന് ഗോളിന് നോർവിച്ച് സിറ്റിയെയാണ് തോൽപ്പിച്ചത്. ഒരു ഗോളടിച്ച സലാ, രണ്ടെണ്ണത്തിന് അവസരവുമൊരുക്കി. ദ്യേഗോ ജോട്ടയും റോബർട്ട് ഫിർമിനോയും മറ്റ് ഗോൾ നേടി. പകരക്കാരനായാണ് ഫിർമിനോ എത്തിയത്. പരിക്കുമാറിയ പ്രതിരോധക്കാരൻ വിർജിൽ വാൻ ഡിക്ക് ലിവർപൂളിനായി കളിക്കാനിറങ്ങി. കഴിഞ്ഞ സീസണിൽ വാൻ ഡിക്കിന് കളിക്കാൻ കഴിഞ്ഞിരുന്നില്ല.
ചാമ്പ്യൻമാരായ മാഞ്ചസ്റ്റർ സിറ്റി ആദ്യ കളിയിൽ ടോട്ടനം ഹോട്സ്പറിനോട് ഒരു ഗോളിന് തോറ്റു. സൺ ഹ്യുങ് മിൻ ആണ് ടോട്ടനത്തിനായി ഗോളടിച്ചത്. സിറ്റിക്കായി ജാക് ഗ്രീലിഷ് അരങ്ങേറി. മറ്റൊരു മത്സരത്തിൽ വെസ്റ്റ്ഹാം യുണെെറ്റഡ് 4–2ന് ന്യൂകാസിൽ യുണെെറ്റഡിനെ തോൽപ്പിച്ചു.
