ബെൽഫാസ്റ്റ്
വിയ്യാറയലിനെ സഡെൻഡെത്തിൽ വീഴ്ത്തി ചെൽസി യുവേഫ സൂപ്പർ കപ്പ് ജേതാക്കളായി (6–5). ഷൂട്ടൗട്ടിൽ രണ്ട് രക്ഷപ്പെടുത്തലുകൾ നടത്തിയ പകരക്കാരൻ ഗോൾകീപ്പർ കെപ അരിസബലാഗയാണ് ചെൽസിയുടെ വിജയശിൽപ്പി. നിശ്ചിതസമയത്തും അധികസമയത്തും ഇരുടീമുകളും ഓരോ ഗോളടിച്ച് സമനിലയിൽ പിരിയുകയായിരുന്നു. ചാമ്പ്യൻസ് ലീഗ്–യൂറോപ്പ ലീഗ് ചാമ്പ്യൻമാരാണ് സൂപ്പർ കപ്പിനായി ഏറ്റുമുട്ടുക.
ഹക്കീം സിയെച്ചിലൂടെ മുന്നിലെത്തിയ ചെൽസിയെ രണ്ടാംപകുതി ജെറാർഡ് മൊറെനോയിലൂടെ വിയ്യാറയൽ ഒപ്പംപിടിക്കുകയായിരുന്നു. അധികസമയം അവസാനിക്കുന്നതിന് തൊട്ട്മുമ്പാണ് മെൻഡിക്ക് പകരക്കാരനായി കെപ ചെൽസി വല കാക്കാനെത്തിയത്. ഷൂട്ടൗട്ടിൽ ഐസ മാൻഡിയുടെ കിക്ക് തടുത്ത കെപ സഡെൻഡെത്തിൽ റൗൾ ആൽബിയോളിനെയും തടഞ്ഞ് ചെൽസിക്ക് സീസണിലെ ആദ്യ കിരീടം സമ്മാനിച്ചു.
